أشعار الأراجوز

شوف كام مرة عليك ناديت  وقولت حبيبي  شوف انت بقى كام مرة  غلطت في اسمي  وفاكره موضوع هين  دي حاجة بسيطة بتبين  مكنتش حاببني كنت خصمي كنت بسامح كتير وانت ولا بتماين،  الإختلاف بنا واضح باين للأعمى، أنا الصاين أنا النعمة، وانت البايع الخاين، حبيبي ومن غير تطويل جيت عليا، حاببني إزاي والنتيجة النهائية سوا،  ياخدني شوقي للسما، ترجعني انت للدنيا ديا، 

سنين وأنا بحبك ومع كل الناس بتكلم، سنين بتعدي من عمري و يا عمري فيك متعشم، وانت قلبك متبرشم  كل ما تشوفني تتبسم وعينيك عليا تسلم، اتجرأ وأقرب اقرب تقولي ياحبيبي بتحلم، وكفاية حنية اتحشم طالب الجواز،  مستني وجبت جاز، قلبي تعب وباظ، مستني تحن عليه، بيجري ويعمل شقلباظ، ولا أبطال الجمباز، كسب الصبر وفاز،  ولسه مردتش عليه، علشان خاطر يوم يجمعنا الشقى ولا يمنعني، وبعمل البيت على مزاجنا هتحبه جداً صدقني، يلا شويا شجعني  يلا حبة دلعني مش عارف انت ايه مستني،  عشان أقدر أكمل كلمة حلوة تسمعني، وانت بتتقل وتلوعني

جاي ليا عادي تهز طولك، راجع ليه وايه الموضوع، سمعني قولك  أتكلم إيه اللي مانعك  راجع ليه مش فاهم رجوعك، مش زمان مكنش الموجوع، هو موضوعك ولا كأنه كان يخصك مرة كانت العين في العين،  و خبطوا في بعض الكتفين، لفيت وشك كملت تشوف رايح فين، مكنتش صدفة خير من آلف ميعاد، ولا شوق ولا لهفة عندك كانوا موجودين، واحنا مع بعض ولا لما بقينا بعاد، الحكاية ديا مش قفلنا عليها، طب ليه عايز تصحيها،  حتى في دي انت برضه بترجع فيها،  مكنتش غلطة ولا لحظة شيطان وعناد،  سيبك من الأونطة ترجع لمين بيها، ده اللي فات عمره ما هيتعاد،

يعني لو كلنا مظاليم، وفي الدنيادي كلنا مجاريح، طب مين فينا اللئيم،  واللي ماسك ضربات الترجيح،  وبيشوط فينا تفاريح، ده الكل نازل كده تسبيح، ومشغلين تواشيح، وماشيين ع الصراط المستقيم، بندعي المظلومية، بشخصيات مثالية،  وندعي على بعض ونحسبن،  ولكل شخصية، طريقة في الأذية،  وحالنا يا صديقي يحزن، مفيش فينا قديسين، كلنا مجموعة من التماسيح،  على غربان لسه نايمين،  ونص كلامنا عبارة عن فحيح،  والنص التاني تشريح، خبينا عن بعض المفاتيح، حبينا القبيح، و نرجع نقول محسودين، 

الدرس أهو اتعلمته، شاطر و للأخر كملته، والجرح اديني خدته، بروزته وفيه بتغزل، لو هتعمل حاببني، مش هعمل زيك وأمثل، لو تفضل تكلمني، مش هرد عليك وهكنسل، نزلت من نظري، مش هنزل أجيبك مكسل، قلبي راحت هيبته،  بيتباهى دلوقت بخيبته، معاك انت بهدلته،  دوبته لحد ما نسل،

عينيها خضرا زي الفستق، وشفايفها حبتين بندق، الدقيقة معاها بسنين،  حلوة حلوة يعني، انتوا مش متخيلين، مينفعش غير بس تصدق، أنا وقلبي مرتاحين، ولا العايشين في فندق، وعشان نخزي العين  عندها عيبين، وعادي محدش كامل  بتتعصب ساعات كده من ذوقي،  واقولها ياحبيبتي طب روقي، تديني كده كلمتين،  عاملين زي التين، أقصد التين الشوكي  وعشان نخزي العين،  عندها عيبين، و ده العيب التاني بتتردد ساعات وتحيرني معاها، واقولها يا حبيبتي طب بلاها، تديني كده كلمتين، طالع سلبي لمين، وأسكت وأمشي وراها

دول قافلين قدامي كل باب، ومش قابلين مني حتى العتاب، انت تحب وبس لكن تتحب وتتحس، دي فيها كلام وجروب واتساب،  وقعده كبيرة تاخد وقت طويل، فاكريني بابا نويل، في زيارة نص الليل،  وقلبي شوال جميل، والحب اللي جوايا،  اعتبروه مني هدايا، عبي ياعم وشيل، دي ناس غريبة أوي و طماعه،  حتى الإخلاص ناقص ولا المجاعة، قلوب بتتمصلح عايشه ع المسرح، عندهم الحنان زي أي بضاعة، ليها سعر وميزانية وفيها تغفيل،