أشعار الأراجوز

أنا لا فاكرك ولا ناسيكي، بلاش تدي لنفسك، قيمة اكبر منك،  وتضحكي الناس عليكي، أنا لا بكرهك ولا بحبك،  مبقتش خلاص شايفك، وبجد بقولك، شوفيلك بر يرسيكي، بلاش تقولي أكيد فاكرني، هيجي لي تاني ويرجعني،  أرجع لمين يا ماما، دي مكنتش إشارة ولا علامة،  دي كانت حادثة والمفروض بالمناسبة تيجي، أنا كده هنا وفي قلبي تعزيني، مات وحزنتيني  عليه ياما ياما،  مين قالك لسه بتوحشيني، انا لو رديت ممكن تحبسيني، واحشه مين يا ستي، سيبيني بقى في مصيبتي، دي كانت حادثة والمفروض بالمناسبة تحمدي، ربنا ومن هنا وهنا تبوسيني،  علشان موتيني  ومخدتش حق موتي،

سألت نفسي والاسئلة كلها نكد في نكد، مين حبني واستنى وقعد، مين كان في ضهري سند،  ملقتش غير نفسي  والباقي يا حسد يا حقد، وكأني عبيط وسط المحيط، لا كان عنده مركب في يوم، ولا بيعرف يعوم، ضحكت عليه الحيتان والقراميط،  وكأني عبيط وسط المحيط، ايه جابني هنا فين الطريق، أنا مش بطريق، ولا حتى كنت إنسان حويط، استحليت حبسي، جوايا ولا كبريائي معاه عند، الشغف للحياة خلاص اتفقد،  اشتغل اتجوز اخلف ولد،  إزاي وأنا بنفسي  معرفتش أربي غير عقد، 

واحد هلفوت  عدى الشارع قدامي وقعد ع البحر، بيكلمه في سكوت وكأن بينهم سر،  وأنا مش فضولي  بس أنا مستني لسه مجاش دوري والدنيا حر، ركزت معاه لقيته بيحكي له عن قصر،  هو بيتمناه عشان حب مكبوت جواه، عدى الوقت مر واتحول كلامه لمر،  صرخ بعلو الصوت أنا ليه مش حر، وتملي كده بطولي، وحيد في الوجود والبحر ولا عنده ردود، وافتكر أخينا انه مجرد هلفوت مجنون يا بلدينا ولا حكايتك إيه، بتحكي للبحر نفسك في قصر بيتبني ع البر، ومستني رد ده بجد طب لو رد، إبقى قولي قالك إيه، واحد هلفوت  عدى الشارع قدامي وقعد لوحده، هو نفس الهلفوت والحكاية عنده،  خدني الفضول تاني، وبيعدي دوري واحد في التاني يلا اللي بعده،  وتركيزي عليه اخينا ده مين بيسانده،  طب ليه هو مش مبسوط وليه، مش على بعضه وكأن حد مده، لقتني فجأة بفوت ودخلت في أرضه،  كانت مرايا عجباني، قدامها مخضوض لقتني مش موجود،  وضحكت أتاريني أنا كنت الهلفوت مجنون يا اخينا زيك أكيد، مش لوحدينا كتير وادينا بنكلم نفسينا، هيرد على مين ولا مين كلنا مجانين، والبحر هو صاحبنا الوحيد،

أوقات 5 دقايق بتاخدني وترجعني، ل 5 دقايق بين الحصة والحصة، بنحكي بسرعة قصة، ونغمز هنكمل لسه، اصل ده وقت الفسحة، وأنا اللعب بيتعبني، واحس بحاجة ناقصه، وتوديني كده و تجبني،  أحلام لحد النهاردة، أيوة لحد النهاردة بتعجبني، كل 5 دقايق بنعيشهم، بعد 5 دقايق زيهم  أقل حبة ولا سنين هتكمل،  هنرجع تاني نفتكرهم، كنت رايق ولا حتى مضايق  هتقول عليهم كانوا الأجمل  أوقات 5 دقايق بستناهم واتمناهم، يبقوا دقايق اشوف نفسي فيهم،  ع البحر بجريهم، وعيلتي بنادي عليهم، اللمة متبقاش غير بيهم، أسهر لصبح معاهم، وأغاني كتير بنغنيهم، انت اكيد زي فاهم،  دي دقايق من حياتي،  دلوقتي عشان يرجعوا بترجاهم،

هي الناس دي عايزه ايه،  أهو سؤال وأديني بسأله تملي، طب مين يديني إجابة تجيبلي، الراحة و ديني اعمله اللالي، وكل اللي نفسه فيه،  الناس بتجري بتجري ورا حاجات، وناس بتجري بتجري من اللي فات، في نفس الحي ونفس المدينة،  وفي نفس الحال يا ولاد اللذين،  نفضل نبعت لبعض مسدجات، وليل نهار دايرة مكالمات،  الخروجه الواحدة محتاجة تظبيطات، بالسنين مش بالساعات وبرضه ساعات، النار تبقى فينا والوحدة بنزينة، و دي قصة حزينة تشوفها في عينينا، لو عندك حد أسال عليه  كل الناس دي بتحلم بإيه، هي الزحمة ونس ولا هي دوشة، نعيش في قفص في حته روشة، ولا سوا نتحبس على حته فرشة، والصحبة في المكان بتحليه،  جايين الدنيا علشان نشقى عارفين، ومش ملاحظين اننا مصعبنها حبتين، على نفسنا كلنا مش ف الجنة،  علشان نتمنى نرتاح يا دنيا، بس أكيد لو كنا قريبين،  من بعض أزيد شويتين، كان حالنا أحسن ومفيش تايهين، كان محدش هيحزن لو كنا حنينين، ولا بالوجع يتغنى ولا عشنا، في بيوت تعزلنا عن اللي ساكن قدامنا،  ومنعرفش حتى اسمه إيه 

انتي زعلانة ليه، مني ولا من إيه،  طب خلاص متزعليش، طب خلاص معلش  كان في أيدي ايه، ومتعملش  كان في أيدي إيه، ومتجبش  عشان انتي متعيطيش، ده المفروض يتقالي أنا، متزعلش الدنيا كلها دي جايه عليا،  والنور ضلمه والسكة مش باينه، قيدت صوابعي العشرة شمع،  مشيت متغمي بالطاعة والسمع، ولا نفعني حتى ببصله، الأذية واصله للركب عالية، الدنيا كلها كانت بتلعب ضدي،  على أرضها وسط جمهورها وأنا وحدي، ولعبت وانا مليش في الكورة،  كسبتني سكور في كل فورة، سجلت هدف بس في مرمايا، على قفايا ياما بتدي،

ياريت ناخد بالنا شويا من كلامنا، أوقات العسل بيسم البدن  ساعات الصراحة تجرحنا، حاجات تخلينا بحالة شجن،  وحاجات بسيطه تفرحنا، دي الكلمة يا تبقى سلاح أو مفتاح،  ممكن نعيش ناس في أفراح،  بشويا مجهود بس لو ركزنا ياما ورينا ناس مر وجراح، منفعش معاهم أصل مخدناش بالنا ياريت ناخد بالنا ومنعملش من بنها، خلينا نركب للكلام فلتر، خلينا نخاف ع اللي بنا، بينا نبدأ بلاش نكتر، فينا الوجع وفي أحبابنا،