أشعار الأراجوز

حصل خير وأهي كلمة بنقولها وقت ما بيحصل، كل حاجة غير،  غير الخير  مفيش نصيب  ودي كلمة تانية زيها كلام مأصل، جوانا بيترص للغريب  و أقرب قريب  جملة لكل حالة، ولكل موقف مثل،  وكأننا بقينا آلة، بنردده ايوة حصل، كلام لا هو حقيقي ولا وافي بيخلي شكل الواحد متعافي  وبالنسبة لكل مكسور ده كافي  ما كفاية بقى في بعضنا نخم ده لما حبوا يحطوا السم، كان ف العسل اتعب واجتهد كلام بنقوله عادي و معلهوش جمرك،  مالك ده انت أسد  وهو مجرد هدد  متشالك الاحسن  وتفضل تستنى وتستنى ويضيع عمرك،  مش عايزك تحزن ولا تشيل وتخزن  وأديني أهو بقولك كلام،  فض مجالس يا عسل،

هي دي دنيا ولا غابة،  مش كل سؤال ليه إجابة، ف البرد ندور ع الدفا، في قلوب ماليها الجفا،  والحزن مالوش شفا،  و زي ما بيستنوا الغلابة، مجرد ساعة صفا، ساعة من سنين شقى، من حبة ناس كدابه، والأمان في عز بابه،  هي دي دنيا ولا غابة،  مش كل سؤال ليه إجابة، بني ادمين بس شويا بتعمل ملايكة،  وهما أعوذ بالله شياطين ايوة بشر بس شيل كده حرف ب، تبقى شر وكده واضحين  ليه بندعي المثالية، واننا أصحاب رأي وقضية،  مع اننا لما بنحب، و يرفضنا أغلى قلب، بنقومها معاه حرب، ونعمل تصرفات غبية، لا يسلم منا قرب، ولا ينجى فيها الغرب، واقول كل عيوبي ديا هي الطيبة اللي فيا،

حبيبتي دي عليها حاجات، تشيب وتغيظ أسئلة كده ملهاش إجابات، وعايزه تقيس  الحب بالوزن وبالمسافات، لو انتي ليلى انا بقى قيس،  لو انتي الميس انا أشطر تلميذ، لما تبقى رايقه انا ببقى بيس،  وبدون تفرقه او تمييز  انتي أحلى من كل البنات لو انا عنتر ايه غير عبلة، لا رمح ولا قوس موتيني بنبلة، أنا بحبك اكتر افهميني يا هبلة، الكل جنبك زي التنابلة يا عوضي عن اللي فات 

من كل علاقاتي السابقة،  أحب أقول العشق مسابقة، وانت الجايزة واللي عليه السحب،  عايز تتحب طب خد بالك طب،  هي اختارت حبيبها بالقلب،  و زي ما بيقولوا اختارت بقلب، وهوبا احتارت عايزاك دايماً توب،  تدخل الورشة ما انت بيجامة عايشه عشان تسيب فيك علامة  طارت أوام فتحت الفوتوشوب، يشيلوا ده و يزودوا تعديل، لو كنت عدل يخلوك تميل، ولو كنت مايل يحبوك حب، بس برضه يحشوك تفاصيل، ومتقدرش تقول ابدا ستوب، عندهم كل حاجة عادي ممكن،  عايزينك غلبان وعايزينك متمكن، عكس عكاس قسمة وضرب، تبقى طيب بس مع حبة اكشن، متخافش لسه مجاش الصعب، 

بيقولوا بيختارونا بنفسهم، وإحنا عايشين على حسهم،  وهي دي وجهة نظرهم، لو مختلف روح قولهم  انا متفق مع رأيهم  بس مفيش حال وسط، و دي المشكلة الوحيدة فقط،  اللي شايفها عندهم، يا تبقى بطلهم يا لصهم  على حسب طريقة سردهم قدام المنافسين والمنفسنين انت الحبيب الغالي،  انت حب السنين  تسمع مدح يعليك، زي الوالي معاليك، شايلها في عينيك،  هتلاقي زيك فين، انت بالناس كلهم  وهي دي وجهة نظرهم، لو مختلف روح قولهم  انا متفق مع رأيهم  بس مفيش حال وسط، و دي المشكلة الوحيدة فقط،  اللي شايفها عندهم، يا تبقى بطلهم يا لصهم  على حسب طريقة سردهم ولو تبقوا لوحدكم يا بختكم تسمع منها كلام، وكلام معظمه عيب انت فيك وفيك، وحاجات بتتقال ليك، بيسمعها بس اللي حواليك  وماله مش عيب، المهم بس شكلهم 

مهما تقول بتبالغ، قال مش قادر تنسى،  ده كله كلام فارغ، والفارغ بنسيبه رهن، ايوة طبيعي نقسى، لو ملقيناش حضن، أحلى علاقة تتحول خناقة، وجذب وشد  لو كان طرفها الجفا والعند، مش الدفا والود مهما تندم بتمثل، قال لسه عايز فرصة  كنت زمان بتفصل، العذاب علينا بالملي، أيوة طبيعي نقسى، نهد فيك ما نخلي

حنيته عليا كانت شويا عزيزة، معلش ما الراجل طبعه الاسية، فرحتي نصها كانت بتبقى معاه، والنص التاني من وراه ولوحديا ولو عاتبته يحكي لي عن المعاناة  ما هو شاطر في قلب الترابيزة يبدأ يهاجمني، يتهمني ويحاكمني، يقولي اشرحي وميدنيش فرصة، ومكمل لسه بأداء عظيم مسرحي،  وبتفرج واقول ازاي مستحملني، كل عيب فيه يحسسني انه ميزة،  معلش ده طبع رجالة الدنيا، نخرج سوا ألقاه يسبقني بخطوة،  يتباهى بالسيطرة والسطوة عليا، افتح موضوع يفتكره شكوى، ما هو شاطر في قلب الترابيزة،