أشعار الأراجوز

صباح الخير  عليكم وعليا يا كل بلاد العالم  سيبتوا السرير غسلتوا وشكم  حلو لبسكم بالظبط زي غشكم  اللي ف التقارير وخفة دمكم  لو إيه يصير بس بعيد عنكم  نسيت اقولكم مش فاضل غير  تصحوا الضمير اللي نايم ظالم العالم غابة وبقينا وحوش  فين العصافير مين يحوش  لابسين وشوش تعالب وديابه  والحق منعرفوش غير ع الغلابة  مساء الخير  عليا وعليكم يا ولاد الحلال المصفي  رجعتوا البيت بالسلامة يا ناس  عاملين إنجاز قاتلين إحساس  طفل برئ ومولعين بجاز  في كل طريق وحلم بينداس   بالجزم وكل شيء والضمير  ع السرير أهو مستنيكم متدفي دي عالم كدابة يمسكوا تليفونتهم  لايك وشير قبل نومتهم وهي دي حياتهم وحياتنا الخلابة  الحق منعرفوش غير ع الغلابة 

انساها تلاقيها بتجري عليك و قساها ترميه تحت رجليك  بعد ما تكشر تضحك اوي ليك  تامر تأشر وتقولك شبيك لبيك  الحظ لو ماشي عكس عكاس  مع بعض الناس،  هتعمل ايه يعني فكك خلاص  بلاش تبقى حساس  بلاش تبقى حساس  مطرح ما ترسى انت دق لها  كل ما تقوم ترقصلك نقطها  لو مرقصتش ايه يعني في بيتها  المهم متزعلش ولا تتأثر بكآبتها 

لو عاد بيك الزمن  هيعمل فيك اللي اتعمل  ترجع يوم ترجع سنين  النتيجة واحدة مفيش أمل  فشلت إمبارح فا مستني بكرة  وانا مش مسامح كل فكرة  لعبت بيا وهمتني إني صالح  وممكن انجح وانا صفر من عشرة خلتني احلم وفيها عشت سارح  هبقى نجم إزاي وانا نكره  ياما خططت عشان أبقى  تعبت واجتهدت ومش فارقه  كنت أمين وعمري عمري ما سرقت  مجهود غيري مليش ولا سابقة  ف التطبيل ولا في حد ظلمت  مكسبتش حاجة ولا حتى ورقة 

في الرزق محدش بيصطاد ده هو الصياد يختار على كيفه، يرزق ضيفه  واللي ميحبهوش ميلمحش طيفه  يسحب من تحته كده البساط  ميشوفش ولا لحظة انبساط  يا نصيب عشمتني  خرمت أنا وداني، وقولت استناني  واستنيت العوض عن اللي فات  ولا جيت ولا شوفتني ثبتني وقولت لي حرام الاختلاط  ناس بتدور ع الحظ بملقاط  وشياط شياط  مع ناس تانيه، الدنيا والعة  بتعمل ثروة في ثانية إلا ثانية  وبتحقق أحلام في كل المحطات  وغيرها بينام من كتر العياط 

يا دنيا يا جاحده  واقفه لى ع الواحدة  وتملي واخده  مني كل حاجة محرمه عليا السعادة  وكل فرحة واعدة  زاد الاحباط، و شغل الاستعباط  تعشميني بالمكاسب، تنوري الملاعب  اتحمس بصحيح، وقلبي كله نشاط  ونسيت إني بلاعب، النصيب أشواط  شوط مصايب، وشوط ف الخلاط  وايه ياخد الريح، كده من البلاط  كل اللي بيحبك  واللي قال يأمن لك  تقلبي وشك  وتنشفي دمه تاخديه على مشمه  تعصريه في حضنك 

ياريت كل البنات  تحط في عينها  حصوة ملح  ده أنا من جرح لجرح  لحد ما لقيته وقلبي ارتاح  أظن مش محتاجه شرح  خمسة خمسة في عين البنات  زرقا على بابنا حدوة حصان  وخرزة في سلسلة كده تبان  قدام كل الناس الصفرا  دي عين الحسود  حطوا فيها عود  ف الفرح والحزن  بيحسدوني و ده مش سوء ظن  دي حقيقة وأحب أقول للكل  مين فيكم عليا حن ولا من 

دي رفضاني  مش عايزاني  و بتأكد ده كل يوم ورا التاني  لا بصت لي  ولا ابتسمت لي  واتعب وأجري ولسه في مكاني  هي دي العبارة  مستني قيراط حظ ولا فدان شطارة التراب يبقى كنز تبني مية عمارة  طريقه مفيهوش إشارة  والتعبان يفضل شقيان  الفشل في نفسه يحز  مالوش نصيب ف العز  ولا يسمع أخبار سارة  حاجة تحزن  بشيل وبخزن وساكت خالص مستني الاحسن  أرجع و أبدا  والأمل ضيق  عمره ما صدق فيا ولا ليا أذن