أشعار الأراجوز

احنا فوق الفوق بحبة كتار وانتوا تحت التحت سالب أصفار  قلبنا زي البفته البيضا، قلبكم كله صفار  مفيش ميزان يساويينا،  لو في أسوان نعيش في سينا  ده انتوا جنتكم نار  غاويين نحب غاويين بدون حساب ندي  ولو غايبين طيبة قلبنا بدالنا هي اللي بتمضي  محليين مرار عيشه غيرنا بس غيرنا تتار حاسدين وغلاويه ف الشر مركز أول ووصافة  مشاهدين و زوار أنتوا في حياتنا بدون إضافة  رايحين جايين على قلبنا هنا وهنا تقولش مطار

كفاية غم إحنا مش ناقصين  دايره السكين ع الكل ياعم  قول للي مضايقك كلمتين جامدين  والحب اللي تعبك خلينا واضحين  هنخسر ايه ما كده كده خسرانين  كفاية والله ناكل عسل في سم  دي سرقة الفرحة وخطف الأمال  أكيد حلال مش هنتحاسب عليها يعني  نجاح ومكسب ولا فرحة بالعيال  كله شغال حتى لو في الحمام بتغني ستوب خصام و زعل بين الأحباب  وقفل الباب في وش الأحلام  انده ع البعيد مستنيك يا أبو الصحاب  قرب من الوحيد اقسم معاه العذاب  بتكسر اللقمة ساعات مع الأغراب  طب والقريب مش اولى بالسلام 

ده اللي دمرنا وفي الأرض هبدنا حته دين هبده  كنا نجوم وخدنا  أوام أوام طفانا بأعصاب بارده فاكر  غيرته وأمراضه شكه وعناده  زي الزبدة  متكملش ولا تحلى الا بيها  اكل كل علقة وعلقة  شاطر  وكلامه هجايص واحد ناقص  هجمة مرتدة  وأهو أتفاجأ أوي بيها  لما لقانا بنقدر نقول لأ ده اللي خلانا  نتمنى ضل حيطانا ومشكلة جامدة بنشاور اهو سمعانا توكسيك أوي بأمانة ميستاهلش ضفر واحدة 

مين يحب يحبنا كده زي ما احنا  ميقعدش يفصص ولا يفضل يفعص تعبنا من الفصال يا عمنا عايز تحبنا اتفضل ليك جزء مخصص  عايزينك في ضهرنا و تزوقنا على نجاحنا  اللي غاليين عليه، بيبان في عينيه  قرب خايف ليه  بيبان قلبنا مفتوحة هنا أكمننا  هو غالي برضه عندنا، عشان بتحبنا  وبنموت فيه  مين يحب حبنا  ومشاعرنا وطريقتنا ميفكرهاش شروة ولا داخل غزوة وعيوبنا متخرجش لغيرنا  عايزنا طب تعالى واثبت انها مش نزوة  عايزينك في ضهرنا مش حمل على كتافنا 

جيل موكوس  فاشل جايز ويمكن منحوس  عمال يدوس يدوس  بنزين يجري شمال ويمين  وشوف لتر البنزين  بكام فلوس  متدنيش سمك  لأ علمني الصيد أصلي فتك  ومعييش تمن الطعم  رميتها فاضية واستنيت القاضية  وكسبت ايه يعني  غير الدروس  قاعد ع البحر  في ايده عصير لزوم السحر  الستوري والانستا  و دافع ف التيكيت مرتب شهر  و قال المهم اللقطة ويجز بالضحكة للضروس وبين كل ماركة  غرقانة السمكة عايشاها في زنقة  جزمة وفستان وشنطة  ما الحياة محظة وهي حاطه  أغلى ميكاب  يارب عريس لاحلى عروس 

سيبني النهاردة أحبك حبة، بعيد كده عن كل الناس،  ولومها اللي ملوش أساس، ونفوس عايزه علينا تدوس  وعيون الخير لينا مش حابه محاكمة  اقرب ناس عليا حاكمة، عشان بحب بقيت متهمه، ولو كرهت أبقى بطلة، خانكة وأنا عايشه في وسطها، ترابيزة اللي يشيلها ويحطها، مجنونه والحب لوثها ولطها، سيبني النهاردة أحبك حبة، من غير مواعظ ولا تنظير، قالولي زمان لسه عليكي كتير،  والنهاردة و بان قالوا مش حقها  وبكرة كمان ياريت تراعي سنها  الحقيقة كده معروفه  عشان طلبت المحبة، خلوني عيبه وسبه  و مادام كده كده مخطوفه  اختارت احبك واقولك ومش هستخبى 

 تعالى نفضها مش نافع نكمل، ولا شافع نتحمل، الحلو كان في الأول، وخلاص كله انتهى  تعالى نفضها  ونقعد على تلها  مشاكل في مشاكل، ومحدش فينا عاقل، حكايتنا قالوا عنها  فاشلة من وقتها مستنيين إزاي نتأكد، كلمتين مننا تتعقد، اكتر واكتر ونقعد، نقول للتاني حلها