قصيدة الحب لو خطية

ياللي واخدة من الجمال كل الصفات 
لابسه سلسلة و خلخال من الدهبات 
نفسي في دقيقة نتكلم فيها ساعات 
قالت لي مليش أنا في شغل البنات

صوتك زي العصافير على الشجر
صورتك ليلاتي أحلى من القمر
حسنك بدري في السن أنفجر
دول غاروا منه و ذاعوه خبر

دة الحب لو خطية، مين فينا منه معصوم 
و يسوى ايه الجمال، لو في الكتب مرسوم 
حبيت صبية واحدة، و عشقت أنا المقسوم

بشم فيكي روايح من الجنة
طب ليه يا حبيبي بتتأنى 
حرام عليكي أنا عايز أتهنى
و خير الأرض بيكي اهو جالنا

قالت لي فيه ولد بعتالك معاه 
سلامي دور أنت عليه تلقاه 
ما أنا دورت سنين فين الإتجاه 
ضاع السلام أصل الولد تاه

شافني و فستاني الحرير على جسمي 
لقيته ناداني بس ما قال على أسمي 
قرب تاني قالي تعالي شوفي رسمي 
دة كل الصور تضوي لو بس تبتسمي

شبكاني بعشقك و دة اللي قلبي جناه 
شكياني للبيوت و تقولي السبب أنا
و أنا خلاص فوضت امري كله لله 
بتلوميني ازاي و عينيكي هما الجناة

بحلف أنا ليكي و بالعشرة دول 
مع أول باب يكون علينا مقفول 
لا أهز النخل بيدي يطرح و يقول 
ما يحل حبكم و لو سحر و معمول 

أنتي يا أم الكنز و العز مخفي 
يغني كل الأرض و يفيض و يكفي 
مغارة مجوهرات و بحفر بكفي 
طرحت الأرض عسل فيا يدفي