غنيوة ياللي في العلالي

ياللي في العلالي، أنظري كدة حالي، 
دي طويلة الليالي، والسكة محتاجه شرح 
ياللي في العلالي، مش عارف أنا مالي،
طبطبي على موالي، حوليه لغنوة فرح

حبيبتي ريحانة جميلة، الشكل فعلاً حلو، 
نسيمها يحلي الجو
بس الطبع صعب ومر
انتي شجرة زينة، أي مكان تحليه، 
وقلبي لو يعمل إيه 
ما يدوق تمر ولو بعد عمر

ياللي في العلالي، سافرت أنا أزمان،
شوفت الزمان، ونفس المسافة باقية لي

يا روحي انتي نخلة، لا برد الشتا يهزك، 
ولا حر الصيف يبتزك
عاشق البلح رطب ياتمر
روحي طويلة وصابره، تقدري تقولي صبار،
والشوك للشوق ينهار
لو لمح منك بس أمر

دي طويلة الليالي، ماليها فجر،
مقاضيها بالحجر، حجزت هي على مالي