قصيدة كله بياكل عيش

قصيدة 

كله بياكل عيش 

ده الواقع فيلم واقع، قصة هابطة
فاضي يا شباك التذاكر،
وبطل السيما مالوش قيمة، ولا ليه جمهور
في حياته زي ما انت فاكر، 
كله بياكل عيش، ولو عايز تعيش، بطل تحلل وتذاكر،

ولع لنفسك النور، انت البطل والجمهور،
متستناش وحياتك تشجيع من حد
متستناش في حياتك تاخد دور
عيش نفسك مبسوط، دلعها قبل ما تموت،
متخليش في نفسك حاجة بجد
متخليش منافسك فيك يشوط

 
عايز تاكل كل، عايز تخس بطل،
وبلاش تخاف من نظرات الناس
لا عاش الخواف ولا عجب الكل
ايه يعني تخين، ولا الوسط شبرين،
ماله هو وأهله من الأساس
قالوا ما خلوا كده في الاتنين

الصورة اللي شايفها، في الفيس ولا انستا،
شبعانة فلاتر من كل البرامج 
بهتانة يا شاطر بس ليها ناسها
بترضى عن نفسك، بكام لايك على صورتك،
وتعيش ليالي أسود غامق 
مفيش يا غالي غالي منك