قصيدة حكمت

قصيدة 

حكمت

وبينا سور داير مايدور، 
ولو الحب نور ونهار،
والشوق جوانا انهار، 
ومهما حاولنا نلف وندور،
وعلى ظروفنا نثور، 
صعب السور ما بينا ينهار،

والدنيا علينا حكمت 
نبقى جنب بعض، وكل واحد في ناحية،
مشاعرنا سوا اتدفنت 
في نفس الارض، بس الصلاة مش واحدة،
والعيون على روحنا صاحية،
وعيون الفرحة عنا قفلت

بالارض البور نزرع بذور، 
محبة وشوق وحياة، 
يرويها كل واحد باللي جواه،
وأعملك قلبي عصفور،
يطير عندك يطمن ويزور، 
ده بسكتك عمره ما تاه،

عارفة شعور لما قلبك يشور،
عليكي تهدي بايديكي السور،
ظروفنا دي زي الطوب،
ومجتمعنا عمره ما يتوب،
على مر كل العصور،
يشوف الحب زي الذنوب،

طريق العبور غرقان بالبحور، 
وخايف تكوني من الجمهور، 
الشك بيصيبني أوقات،
لسه عندنا نفس الاهتمامات،
ولا مليتي السنين والشهور، 
وبالافلام بس حلوة النهايات،

أصلك مش عارفة يا بدر البدور، 
أنا مش هامل من انتظار دور،
البطولة في قصتي ده الاساس،
حبك انتي جوايا زي البخور، 
لازم يتحرق عشان تشمه الناس،
ما أتحرق يمكن بناري يتهد السور،