قصيدة ملعون

قصيدة 

ملعون 

ملعون حبي ده ملعون،
مجنون قلبي وملعون،
اللي خلاكي تبيعي وتشتري فيا،
ألف مرة وكام مليون،
لا مضطره ولا مرة تحسي بيا،
انتي بمكانك وانا بلف الكون، 

أهتمامك بيا شيء افتراضي،
اهتمامي يقل ترفع قواضي،
قلبك فاضي بيت مسكون
احاول احل وانتي تعادي، 
انتي المنافس وانتي القاضي، 
وقلبي عندك مرهون 

حبي نار والجحيم فؤادي، 
انا والشوق بحبس انفرادي، 
ما أنا لعقلي فعلاً مديون
واحدة الزنزانة واحد اذانا،
كنت سد خانة وخنتي الأمانة،
حضنك سجن فيه مسجون

روحت سكة مفيهاش رجوع، 
وانتي ساكه باب الموضوع،
وبرضه ماسكة في الزبون
دقه قديمة ملكيش قيمة، 
تمثيل وسيما وفيلم اللئيمة، 
وبريئة كده مع الاخرون

جوايا غضب بدل الحطب، 
يتدفوا بيه كل العرب، 
يمكن يقدر يسدد ديون
اديكي دفا تديني برودك،
ليكي الغنا تردي بارودك،
تهدي فوقي كل الحصون

ملعون الحب ده بلعنة،
من أيام أجدادنا الفراعنة، 
محكوم عليه يفضل مدفون
تفضلي ساكتة تستني نكتة،
واحد لقطة اجيبله نقطة،
لأ واللقطة عايزاني ممنون

تحاسبني على شرودي و الايموجي،
لو دلعتها وقولت أنوجي،
ولو مدلعتش متغير بكون
تعاتبني على الشاردة والواردة، 
ومع غيري بتكون وردة،
ومفيش معاها شيء مضمون