قصيدة ال 33 في 22

قصيدة

ال 33 في 22 

بكتبلك اليوم، بتاريخ 3 مارس،
عمرك ما هتقري، ولا حتى الفهارس،
بغنيلك مهموم، ومحدش حاسس،
ما أنا مهزوم، قدامك مكنتش فارس،
ولا مستني، بيوم معايا تغني،
قلبي عايز، يشوفك جنبي ولو هلاوس،
لو هي بالتمني، زماني واخدك بحضني، 
خمس ست سنين جوايا حابس، 
كلام لو بيوم، قولته هتجري،

ال 33  في 22 
الناس نايمة وعنيكي نايمين،
الشوارع فاضيه ومشاعرك هادية 
واحساسي بين نارين، أخرجي وقت صلاة الفجر 
هتلاقي بدر، عليه ندر نوره في الحجر، 
حالف ما ينور ولا على نفسه يدور، 
إلا لو طلبتي منه وانتي راضية، 
بحبك حبين بحبك مرتين،
مرة حبيبتي ومرة بنتي، ومرة احتياطي 
علشان الاتنين التانيين مش نافعين،

بكتبلك هنا، ما الورق بيحتويني،
أكتر منك، ما هو منك بتخوفيني،
بغني أنا، ولا يمكن تسمعيني، 
بسري الغنا، مش هتعرفي تلوميني، 
مش منك، وكل حواديتي عنك، 
والكلام بنى، حواجز بينك وبيني، 
بتكلم مع نفسك، شافك حفظك صمك 
شايفك الهنا، وبصورتك بتلاحقيني، 
ومبسوطة عيني، مش أسف على حبك

عيد ميلادك ال 33 في سنة  22
أيوة بعد سنين، سنين عمري الغاليين، 
بالبوح قررت، من الشوق والحنين، 
في حبك كتمت، اسرار مدفونين،
انتي معايا دلوقت، ياعالم بكرة فين،
هتكوني مع مين، وتسيبيني قصة مرمية، 
وخلاص وقتها كنت، شخصية ومنسية،
بعد ما صدقت، كلامك الحلو ليا،
بعد ما بدأت، احس عنيكي متقبلين 

بالفونت العريض، أقول مع الجسمي، 
أغنيهالك وأعيد، يرعش معاها جسمي،
بحبك مريض، أخف لو تبتسمي،
فيه بنا تقليد، وانتي بتقولي اسمي 
العنقريب اللي قنيته، مع منير غنيته،
سبع سنين استنيته، وبايديا تترسمي،
كان نفسي انورلك قمري، طول عمري،
وانتي بقلبي وببيته، بس ربك لما يريد،
أبقى قريب وبعيد، وبين المسافة تتقسمي،

ترتيب قصيدتك، في شعري 760
الستة رقمك، ومقسوم على اتنين،
تلاتة شهرك، والتلاتة التانيين، 
يوم صورتك، ما اتشافت بالعين،
السبعة حبك، معرفش هو بدأ منين، 
الصفر حالتي، تملي معاكي معايا،
يمكن قدري، أعيش بحبك جوايا،
ومش بدعي، أتحرم من هوايا،
لسه بدري، اشواقي ليكي مكملين،

والنهارده خلصت، ليكي 33 أغنية،
من أحلى ما كتبت، من أصدق أغانيا، 
ولو طال العمر وعشت، أو مطالش ومت،
أديني أهو بوحت، قصيدتك دي وصية، 
عمري ما فيها لومت، ولا كلمة ردية،
انما بلوم البخت، مفيش حاجة بأيديا، 
يا ديني ليه فرقت، ليه المحبة خطية، 
وأنا عمري ما فرقت، لا مع حد ولا بأي وقت، 
أنا بس طلبت، ولو بالكدب تحس بيا،

بعشق لحظات الخوف، بعشق يا ست البنات،
بعشق ومش مكسوف، بالرايحات والجايات، 
بعشق كل اللي فات، وروحي ياروحي تطوف، 
ما احنا بنا مسافات، وظروف ألوف ألوف، 
هسيب الكلام ليكي، يشهد عليا وعليكي، 
ولو حبيت بعديكي، مش هخبيه عنها بالذات،
خليها بعينيها تشوف، قلب حبيبها الملهوف،
على حب مكنش قديم، ولا اتعمله تكريم، 
ولا خد أي تقييم، وفضل متعلق بالنهايات،

حبك كان أفضل، عمل فني شوفته، 
فيلم ترتيبه الأول، بعيوني انتجته،
ملحمة اه لو تكمل، يا حلم وحلمته،
ولو مرة غرامي، بعيونك لمحته، 
احساس كنت خلدته، والوقت وقفته، 
متقوليش ما كنت قدامي، ليه مجتش ليا،
كبيرة أحلامي، وهتشوفيها عادية،
تلمي حاجتك وبسلامي، تنهي برقة عليا،
في اللحظة ديا، قلبي كنت قتلته،

أنا خلصت خلاص، معنديش كلام تاني، 
قصتك كانت كاس، عارف هو عنواني،
حبي كان إنجاز، غير مشروط بجوايز،
ومش متأكد الأغاني، اللي جاية جايز،
علشانك وعلشاني، او لناس غيرنا،
يمكن يكون احساس، بوداع مواعدنا، 
ايوة أنا الجاني، وحبي كان مجاني،
باخد منك رصاص، بديكي سلام جاهز، 
وطول ما انتي قدامي، هيفضل فيه معاني،

حبك مكنش بالدماغ، ده بالقلب والعقل،
حبك مكنش فراغ، ولا كان عمره بالشكل، 
بحبك بدون صراخ، ولازم يدوق من الأكل،
صنعه ايديه الطباخ، ومنها ميقدرش يقل، 
لو وصلك كلامي، والاحساس اللي فيا
بلاش تكوني مستغربة، بلاش تلومي عليا، 
راجعي مواقفنا وركزي، هتلاقيكي كنتي قريبة،
هتلاقي تفسير للحنية، هتلاقي رد على الاسئلة،
كانت جواكي متكركبة، هتشوفيها دلوقتي مترتبة،
تدوم ضحكتك وتركزي، 
وكل سنة وانتي طيبة،