قصيدة متعرفيش الأدب

قصيدة

متعرفيش الأدب 

متعرفيش الأدب،
انتي واحدة متعرفيش الأدب، 
والله واحدة متعرفش الأدب، وملكيش فيه،
لا انتي ولا أهلك ولا أصحابك، ولا حتى اللي هتحبيه،
متعرفيش الأدب ولا ينفع عليكي العتب، 
ما ده اللي اتربيتي عليه 
ماهو اللي اتكتب ليكي انكتب، علشان انتي تقريه،
يا ست هانم يا ست الحسن، امال أنا بكتب ليه،
معرفش ان الشعر بيركب نجوم ورتب

حبك شاعر واسمك كان الخبر... والمبتدأ،
الفاعل والمفعول واللي بدأ قلمه يكتب بيه،
كلامه وحش... جامليه، كلامه حلو... ألبسيه، 
راضي تلفيه خلخال، تعمليه سلسلة على رقبة الغزال، 
حتى دبوس يتشبك بالشال، تعامليه معاملة المال،
لا لبستيه ولا حتى خبتيه،
الكلام كان دهب وحق الدهب تصونيه تحميه، 
بس لقطاع القلوب سيبتيه، كشفتيه لشمس الخيال،
وخليتي العيال تلعب فيه، مركب غرق وسط الصخب،
طيارات ورق بالهوا ترميه، وانتي عملتي ايه،
ولا حاجة ولا حالة تستحق العجب، ما انتي السبب،
متعرفيش الأدب، لا قيمته ولا سعره ولا حجم التعب،
ولا الشقى في الكتب، متعرفيش ريحة الأدب، 
ولا عمرك كان ليكي فيه، وأنا قلبي عمره ما كدب

مؤدبة بس مفيش حد علمك الأدب،
مغيبة بس تعرفي قلبي اللي منك اتصلب،
بنات جيلك تافهين، وانتي منهم يعني هتكوني مين،
شويا منهم مثقفين، يتمنوا المشاعر يوصفها شاعر، 
يكون بيهم حاسس وشاعر، وانتي بنت الحسب والنسب،
بتقيسي مشاعرك بالنسب، 
وقلبك بإيدك بتوهميه، أكمل أقول ايه، 
وانتي عندك الشعر والنثر مجرد كلمتين،
حبك شاعر ولو كان رسام بيرسملك بورتريه، 
كنتي وقفتي بين ايديه، حابه ثابتة بالسنين،
حبك شاعر ولو كان مغني ولحنك بيغنيه،
كنتي عرفتي صحابك عليه ما هو سعادة البيه، 
ومشاعرك ليه ممدودين، والفرحة بالعينين بلونين،
ما هو دايماً الأدب معليهوش طلب

اجيبلك فيروز تغني، أنا لحبيبي وحبيبي مش إلي، 
تبيعي فيا وفي الكل تشتري، أنا الظالم أنا المفتري،
وبعد ما قلبي عليكي قلب، في عينك أهو حلي،
دلوقتي سعره غلي، ما هو ياما بسببك دمه غلي،
أصفالك ويهدى اللهب، ترجعي فيه تنزلي،
وتمارسي هوايتك في الشغب،
بقيت منك والله بترعب،
حبك شاعر لو كان مهندس ولا طبيب تحبيه،
تتفشخري بيه كله عندك قدام الأدب للأسف كسب،
أنا اللي غلطان قصيدة ايه اللي تتكتب لك بحنان، 
وبأحساس جميل وصدق وايمان، متعرفيش الأدب،
ولا ليكي فيه، يبقى الذنب على اللي حبك بيه،
وخلاكي بطلة قصايده في الديوان، أيوة غلطان، 
بس برضه انتي اللي مشوفتيش ريحة الأدب