أشعار الأراجوز

وأنا كنت فاكر لما يبعد عني هموت، فضلت أماطل و أماطل والوقت يفوت، وفضل هو يفاضل بين طرق الموت، وطلع ده كله على الفاضي، ولما بعدنا عادي عادي كله عادي لسه الحاجات بتبسطني، لسه الدنيا بتسعني، لا ندمت ولا ضعت، ولا على بابه وقفت أنادي  لسه بسمع أغانيينا، معانيها مكنتش لينا، لما فوقت وفكرت، فهمت انه عادي عادي وأنا كنت فاكر هتمنى يعيش مبسوط، طلع ده كله وهم وأنا فيه مربوط، ساكت ليه ياعم كفاية سكوت، خايف لأ مش للدرجادي، هو هيفارقنا وماله عادي عادي عادي 

بقالي سنين مستنيكي، برسم بالحنين عينيكي، أمتى يحصل اتفاق، بيني وبينك في الأشواق، حبي سخن مولع نار، قدامك بنهار وأتاريكي  من الناس اللي بتكبر وتتكبر و بتحب تسقع، عملتلك جوة قلبي سكة، تمشي فيها مش شاكه، حفرت لك فيه ألف حفرة، واحدة منهم هتوقع  قلبك وهضحك ضحكة، تخلي الغيران يفرقع  جيبتلك كل اللي بتحبيه، تعالي يلا هنا شوفيه،  فرشتلك قلبي أكبر سفرة، و ف الغرام اديني بنقع قلبي تاكليه تشربيه، وتمضي روحك وتوقع 

لا أنا كامل ولا انتي كاملة، فا نستحمل بعض في المعاملة، بلاش نيجي على بعض، بدل ما نستقوى ببعض، لو هنحب بعض نص محبة، في زماننا ده يبقى أمله،  تعالى على نفسك وأنا برضه كمان،  اللي بنا مش شويا حرام ف النسيان،  مش كل موقف عنده هنوقف،  وبالكلام على بعض نحدف، خلي حبنا هو اللي يتصرف،  بالقلب بنشوف كل حاجة مختلفة، شوفي الدنيا في غيرنا ايه عامله، واحنا مش أغراب ما بنا مجاملة، ليه في نفسنا نظلم، والمفروض ع الحزن نردم، احنا اتنين أحباب لو فاهمة، المعنى الحقيقي للجملة،

خليك هنا بالمر و بالهنا، وبحنيتك وقسوتك، موافق أنا أسمع ردود كلها برود،  وتحييني ساعة صفا بنظرتك، تقول هنا وانت مش موجود، وهي دي كدبتك، كمل ولو بنص محبتك، بس خليك هنا، مقدرش على عنادنا اللي اخرته بالتأكيد بعادنا،  ولا يجي اليوم، اللي يا حبيبي يحصل فيه،  تشوفني وتشبه عليا من بعيد، ولا يجي اليوم، اللي أشوفك أنا كده فيه، وقلبي يقولي لأ مش هو أكيد، ونمشي والسلام ونشوف مواعيدنا، خليك معايا بالحزن و بالفرح، وبظنوني وشكوكي، أفهم بقى حبة والله بحبك محبة، واللي غلبني قدامك هو شوقي، قلبي ورداية ولو مشاعرك حابة، تاخد معاها شوكي، نكمل على ذوقك و ذوقي، ونظبط الحكاية،

هو ده اللي بتمناه بقالي عمر، مهما شوفت وعدى عليا ومر، رافض ومش قابل فكرة غيره أقابل،  هستناه يحن يحب يبادل، حتى لو مقابل،  إنتظار شوقه هيكون عذاب ومر معرفش أنا قلبي وإلحاحه، عليه هو بقاله سنين، هياخدني معاه بس لفين، ياترى هيقابلني في الاخر بأفراحه، وينسيني السكة والعمر اللي راحوا،  ولا هيخلينا ندمانين، نتوه منعرفش احنا مين،  يخرج من حزنه يروح لجراحه،  هو ده اللي بحبه وهموت عليه،  حلم حياتي وحياتي كلها ليه، بس هو متردد أو خايف مش متأكد، قلوب حواليا عليا بتسند، إلا هو بيبعد، وبرضه مش شايف حد يقدر يجاريه

كان نفسي أغني وأقول، بكرة ترجعي لي على طول، وانتي منهارة ومكسورة وتتقطعي قدامي وبعيني دول، اخدلك ألف صورة وأسيبك انتي وقلبك للمجهول، يا خسارة دي كلها أحلام، ما أنتي أهو حالك تمام،  وأنا اللي أتلعب بيا الكورة  يا خسارة طلعت ضعيف، مش قد أذاكي المخيف،  في القسوة قد مية أسطورة كان نفسي أعملك مقاطع،  وانتي بتتكلمي وفيكي بقاطع، بعد ما كنتي الأولى  في الأوامر اللي بشكل قاطع، تقولي الرأي شورى  وأشوف غرورك قدامي راكع، 

ليه تشغلي بالك ليه وانتي قلبك يمتلك، ضهر وسند وحب يعمر بلد،  قلب ولد وراجل زي الوتد،  ليه تشغلي بالك ليه وانتي معاكي ملك، مش لما مرة طلبتي، نجمة من السما،  بعدها بابك خبط وانتي فتحتي،  لقيتيها هنا، زي ما حلمتي، ليه تشغلي بالك كتر التفكير كلك، مش لما كنتي بتقولي،  أنا نفسي ونفسي، وقفت قدام الدنيا لوحدي وبطولي، علشان تحسي، السعادة و تطولي، ليه تشغلي بالك والفرح معايا كحلك،

 رسينا يا حكيم، يا عليم بالأمور وفهيم، الحب مبقاش كريم، لو بجد حبينا قديم يقولوا علينا، واللي نكرمه يعادينا، اه والله العظيم، دي الناس هتخلينا عن الحب نتوب، و المفروض التوبة تبقى عن الذنوب،  وبغني لمين ما أنا منهم محسوب،  داوينا يا طبيب، ليه الحبيب يروح يغيب، وشوقه في علم الغيب، واللي ناسيينا يسيب جراح فينا، أكبر اعداء لينا، متقدرش بنصها تجيب،

هي حقيقة الناس بتبان في الأخر، ولا الناس بتتغير كده مع الأيام، هو الحلو بيجي تملي في الأخر، ولا نختار من الأول حاجة تمام، فين الحكمة وكل كلمة بترد عليها كلمة، صوابعك مش زي بعضها ودي نعمة ولا نقمة،  ولا جملة بتتقال فض مجالس، وكله لابس في كوارث، وحياتنا زي الملاكمة،  هي المحاولة و الإعادة فيها إفادة،  ولا التكرار بأستمرار اخره ملل، هو الحب ممكن يغير الواحد، ولا محدش بيتغير مهما اتعمل،

لأ خلاص كله انتهى، ومعايا قلبي اتفق، من السعادي وبعد النظرة دي بقيت حد عادي، واللي في أخر النفق، ده مكنش نور كان برضه سور، مكسور يا قلبي بردها، مش حباني و دي مشاعرك و ده قرارك، ليه بتقاسييني وبكون قدامك وتنسيني، ايوة قصداني أهو بنظراتك تدبحيني، و بتعايريني علشان صبرت على مرارك، مش بتحبيني فهمت ما عليكي بان، كنتي تقدري تبيني احترام وتقدري،  ولو هتسيبيني كان بالكلام تواسيني، وتوصليني بسلام ده أنا حبيتك زمان،

عمال أحايل واسايس  وكل لما اقابله، لازم اهدي غضبه، وأعمل اللي يرضي قلبه،  ولا اللي شغال سايس  شاطر ومتمكن، في زعلى أنا أركن،  وأفضل أصالحه واحضن، وعلى قلبي هو دايس لا لا مش طريقة دي، رد لي مرة اللي بديه، من باب الذوق والأدب،  أو حتى بار وعتب، يسمع كلامي وألقيه، أوام كده وشه اتقلب، لا لا مش نافعة القصة، هو فيا حاجة ناقصة، تخليني أبات على بابك، تمن عليا وبمزاجك، قام بصلي حته بصة،  يعني مش عاجب جنابك،

مسكينة بناتك يا حوا، تضحك لآدم بعفوية، يقول دي مايلة ليا،  وهي ولا في النية، دي ضحكة عادية،  مسكينة يا عيني وبلا قوة، تختار غلط تتلام، تقفل على قلبها أوام، ترد السلام بسلام، بقت تخاف الكلام، ومن الأيام ومن أي محاولة، يعيبوا عليها لو حبت مرة، يجيبوا فيها اللي جوة وبرة، تحب تموت تلزم البيوت، حابة الموت  أكتر ماهي عيشتها اللي عاشتها مره، بتختار صح بالوقت الغلط، تاكل جرح وتبلع بالزلط،  تقابل الصريح راجل بصحيح، تفتكر التجريح بتاع زمان تلقائي تلاقي قلبها رفض،

إزاي أنساك وانسى كل اللي فات، واللي دخل القلب وعاش عمره ما مات، هيفضل مكانك متشال على جنب  هفضل شايل ليك شوق وحب  ومهما نحب ناس تانيين، منقدرش نقول ناسيين، بنفضل محافظين على حبنا ليه  زي اللي حافظين واتعودنا عليه  و ممكن منحبش بعديه، لا دلوقتي ولا بعدين، إزاي أنساك قولي لو عندك اجابات، مهما زاد البعد و زادت معاه المسافات، هتفضل انت أقرب من القرب  ما انت عايش هنا في القلب إزاي أنساك وليه اصلاً أنا أعملها، يا حب صادق وحياة صعب تاني أقابلها، في قربك وبعدك حبك لسه فارق وطول عمري كنت بالحب بادئ 

ولا بيرحم ولا بيخلي رحمة ربنا تنزل، فيا بيظلم كده تملي بالجرح بيغزل، وفي قلبي بيعلم  بيحب يشوفني بتألم  بيحاوطني وعن حبايبي بيبعدني ويعزل، لحد ما خلاني أسلم عنده عقدة وأنا في ورطة، حبيته وكانت أكبر غلطة،  وازاي اقدر اصححها ضميره ميت وفيا متبت، النية بالقسى كان مبيت،  قصة نفسي أمسحها لا بيحب ولا بيعرف يتحب ولا حتى بيقدر، بالغلب هو بيحلف ويبان عادي مش بيغدر، بس الحقيقة كدب  غدار وخاين ويتدب  في عينه رصاص وبعينه ثانية أفكر، أتحمل وجع القلب

بيتدلع عليا كل شويا موقفني عند بابك، وعلى قلبي وشوقي انت حاجز،  يتدلع ويقول ما الدلع ده هو اللي جابك، وده موضوع أكيد مش جايز، استمتع حبيبي بالدلع وبلاش عتاب ومواعظ ويدلع وانا جنبه أولع، مبنطقش بس بسمع،  وانت ملاحظ يدلع أكتر لما بنتجمع، مبقدرش حتى أجمع،  قدامه عاجز  مش عاجبك دلعي تلقى في ثانية سابك، قلبي خليك بقى للبعد جاهز،  اروح له واصالحه واقوله بلاش عذابك، ازاي تسيبني هتقل وهخليني راكز، يا مالكني على راحتك و براحتك انت الفايز

ضعت وقلبت موازيني، قولت أبعد لتأذيني، أكتر من كل اللي حصل خدتها على كرامتها، ما اللعبة هي حبتها، وقلبي اتكوى واتغسل هو فيه ناس يا ناس مؤذية للدرجادي، تديها حب واحساس، وفي نفس الكاس، يرد بيه، تلاقيها تكره وتعادي، فهمت معني يعني ايه قاسي موت، يعني تخليه مبسوط، ولما قدامه تفوت، وتصبح عليه، يرفع عليك قواضي، كرهت عشتي وسنيني، حلي عني وسيبيني، كده أعيش لي وبس  معرفتش لسه مخلصتش، هتمشي ازاي ومكملتش، نهايتك اللي بالنص

والله منستكيش  ايوة بعيش و بروح وباجي، وقدام الناس بضحك عادي، و تسمعي اخباري تقولي للدرجادي، معاه مفرقتيش بلاش متفكريش حتى، ولا يخطر في بالك ثانية،  بشوفك في كل حته، هي صورتك والأسامي تانية،  ايوة منستكيش وعايشة، جوايا في كل دقيقة ولحظة، صح اللي بيه حاسه، الناس بس هي اللي مش ملاحظه،  انسى وأعيش  ازاي ومفيش جوايا روحي، متستغربيش ما انتي روحي، ولو عايزه تتأكدي لمكاننا روحي، مستنيكي ومبتجيش

اتغيرت خلاص  وقل شوقك ليا، ترد ببرود عليا، و الصورة واضحة مية في المية، يعني الموضوع مش سر، مش هستنى تقولها بالكلام،  ما أنا قلبي برضه بيحس، اتغيرت زي النتيجة والأيام، ومعرفش ليه كل ده بس، بقيت حساس من كلمة بقولها، ولو مكنتش أقصدها، بتحاسبني عليها ولا كأني غريب، ومفيش عمر بنا مر، اتغير الاحساس  وزي ما على طول، كنت ليك بقول، لو بعدت عني أنا ممكن أموت، مبقتش ترد بعد الشر،

أنا مبلقحش، عن غيري مبتكلمش، أنا باجي وش مغتبش،  مش بس تربية، ولا علام التجربية، أنا مش بكش مبخافش،  انت يا لعيب، واللي بسيرتي بتجيب، بموت بكلمه كش اللي مامتش،  تنزلي ياض جيم، مبلعبش مع بهيم،  نازل كده في النجيلة حش،  وارمه مني، تيجي تقولي فش، مش بحب غير الفيش، حية و حنش الكل قدامي معش  اطلع لي فوق اصلي أنا مبنزلش  للمستوى ده يا ذوق اسف معلش  اقولك الشجرة، دي ازرعها بلح لو مطرحش لو مبلحش ليك حق يا صاحبي في القفش كلامي مبيتغيرش، مؤدب مش وقح،  و صانع بطيبتي سبح، بتاع أمانة، وانت عنها متعرفش، فا ربنا عليا فتح، وانت بالسلامة، ظني فيك مخبش،   وانت إثبات انه فلح،  مليش في الغش، ولا صحوبية التنح، واللي بجر الشكل يصتبح، اللي يكسبه، بايده راح يتدبح،  واللي يخسره ربح،  أنا دبور، ع الكتاف متخافش، الطيبين مش بنجرحها، وانت عصفور، ساكن في عش، تطلب بأدب مفتاحها،  عندك جناحات، بس يا عيني مبتطرش، والطيور مليش في تلقحيها،  دماغي طيارات، في ايدي الدش، بمزاجي اقفلها افتحها، وكلمة أخيرة، أنا معاك فريش، متخلنيش بقى أخربها،

فاتح لك حضني من زمان، واحدة واحدة بعلمك الاحساس، صابر عليك وانت ليه تبقى، واحد مالهوش أمان، وحالتك مش نافع معاها شفقة، بديلك الحب كده بالمجان، بس يا عيني فيه ناس، مبتحبش الحاجة إلا سرقة، يعني بالذمة  بيحبك حد تخونه ليه، مش قادر تحبه قولها ليه، مش أزمة انت هترحمه من العذاب، وحيرة قلب ومشاعر غراب، وكسرة نفس مالهاش لازمة،  أنا حبي ليك كان كبير، وكنت في عيني زي النعمة، ليه تسرق فرحتي مني،  ما أنا ياما فرحتك كتير، من غير حساب على قد ربنا يعيني،  حاجة غريبة ملهاش تفسير، وأنا يا عيني كنت أعمى، وفعلاً ليك الحق تسرقني، 

انا اللي بايدي عليتكوا،  وكتفي ده ياما شالكوا،  ما ناب قميصي غير طينكوا،  ناب الحزن وجودكوا بحياتي،  وعمل الواجب وزاد في آهاتي، مشوفتش زي عمايلكوا، إبن حلال مصفي، مين واقف بصفي،  وحدي قصاد ضعفي، ما أنا إنسان  عرفت قلب مطفي، وقلب ناره ما تطفي،  وقلوب تانية تخفي، عني الحنان  اللي بروحي يصفي، يعصر قلبي ويشفي،  واللي بيكدب بوصفي، مالوش أمان  أنا اللي مهموم بقضيتكوا، اتعلمت القانون وانقذكوا، ما ناب قلبي غير محاكمكوا، واتعاب فيا لبستوني مشاكل، و أتعاب تعبي عليا بتتاكل، معرفتش زي قسوتكوا،

أنا الخير للغير، أبو قلب أبيض زي الفل، ياما عليكوا كتير، كان بيغير، و لقلة التقدير فتح محل،  ذمتكوا واسعة رايحة جاية زي النفق،  قلوبكوا ناصعة ومن جواها كلها غرق، سواد في سواد، والنفاق أهو ساد،  مسافات شاسعة ما بنا مين معايا اتفق، أنا الطير يطير، يفرد جناحه في عين الشمس، تناموا وترتاحوا على جناحه الحرير، وتصحوا وانتوا ليكوا نفس، 

الحب مش حرام،  والقلب اللي يحب ليه كل الإحترام، ومش بأيدينا نحب مين والساعة كام  الحب حب خام،  لا بيعرف عادات ولا دين ولا بكام، لو مش قادرين نفهم نحس كده تمام حبيتك وأعمل ايه، اختلافنا محدش فينا كان ليه يد فيه، فكر يمكن تصيب، ليه كده النصيب  خلاني أنا اسيب،  كل بنات حوا، ويحبك انتي بقوة، تدخلي قلبه جوة، وتملكيه   حبيتك وأعمل ايه، واختلافنا مهمنيش ولا اللي بيقوله عليه، عايزاني أبلغ عني، أروح للقسم أسلمني،  وقدام الكل اتهمني،  والتهمة هي المحبة، لبنت الناس الشابة، اتسرسبت حبة حبة، يا بيه  حبيتك وأعمل ايه، اختلافنا اهالينا ديننا طب واللي ما بنا،  برضه قدرنا تحترميه، بس انتي بترفضيه،  مبتشغليش بالك بيه، سايبة لي الحزن،  وبتدي بعينيكي الإذن، يلعب بيا الظن، يشقيه  

عمري نقص، وانا لسه في ال process صبري خلص، وقاعد جنبي مستني  الطموح غلس، على فشلي رقص، وقلبي اتحبس، قاعد جواه مستني البنت اللي بحبها، لسه بتشاور عقلها، بتفكر وتحلل وعندها، meeting مع قلبها، بتقولي خليك مستنى  قعدة صحاب، ما كل واحد غاب، كلهم عندهم أسباب، كرسيك لسه متساب، مكانه وقصاده مستني  ده بادجت الشركة، قليل وحاجة زرقا،  السوق مفيهوش حركة، خليك معانا بركة،  هروح فين مستني  السالاري على تكة، واقف بطوله في العركة، بقيت عايش بالفكة، وكلها ماشية سرقة،  ولفرج ربنا مستني بقدم على job، سيلز وأنا اصلاً طب، ما هي ماشية بالحب، والحلم بيقولي ستوب، يادوب تفضل مستني 

عملت كل حاجة قدامك، اتعلمت طريقة كلامك، حلمت احلامك بدالك، وحققتها كلها وجيبتهالك، عملت كل حاجة يمكن تحس،  يمكن تشوف حتى النص،   قد ايه عليك ملهوف وبقيت باللمس، يعني بعد إذنك لو تقدر تقدر عملت إعلان شاهد قبل الحذف، وكتبت كده في الوصف،  حبيب يا جدعان واقف في الصف،  عايز يقرب منك أكتر و أكتر عملت كل حاجة تتعمل، واللي مينفعش يتعمل، عملته برضه وكمل، وبرضه مفيش أمل، عملت كل حاجة وقدمتها، ومشاعري ليه تلجتها، الشمس وهي في عزها، يمكن تطري قلبها،