أغنية سكك حديد وبس

اتولدت حر، مع اني اتولدت بالأمر، 
طب ليه العمر، بيمر
طعم مشاريبه المجانية، مر في مر، 
وفيها الحرية، زيرو في المية،
جنبها موجود سكرية، فاضية وخالية،
عمر يزيد وينقص نقص، وده مش سر،
يعني كل حاجة بالعكس

عايشين
بنوزع في أعمارنا، وبنبقشش بيها على دلعنا،
صاحيين زي ما نمنا، 
وكأن أيامنا محسوبين ملايين، 
بندفعها للدنيا تبس
ماشيين
بندوس في حزننا، اللي عشش جوانا و ذلنا، 
ومين داس عليه مننا،
طول عمرنا رايحين و جايين،
في سكك حديد وبس

خيال ولا علم، الاتنين زي الفيلم، 
فيهم بقى الحلم، ظلم 
وحمل فوق كتاف، صاحبه وهم،
ومنه بخاف، وفشلي اكتشاف، 
جوة منه يتشاف، ومش إنصاف،
يتحكم عليه دايماً بالحبس، ويتقاله أتلم،
يفضل متكتف بالجبس