أشعار الأراجوز

شوفته وقولت مينفعش أسيبه، وبقيت أتمنى أكون أنا حبيبه، من وهو بعيد، دقات قلبي بتزيد،  أهو هو ده عيبه، بصلي بصة وقالي هحكيلك قصة،  وقبل ما يقول كلمة لسه  طبقني كده وحطني في جيبه، شوفت كتير قبله، بس مفيش في سحره، ميجوش نقطة في بحره،  و بالكلام ده هما قبلوا، كل واحد ونصيبه، سألت كتير عنه، وعرفت حد قريب منه، قالي غالي أوي مهره،  قولت نص عمري كفاية، ولا النص التاني أجيبه،

كنت بحسس ع الكلام لأحسن يحصل صدام  وتخلص على خصام  ونخسر سوا سوا  كنت بحسس ع الكلام، خايف لا حرف يوجع، ما انت لو بتسمع، وتفكر في الكلام كنت هفهمك إزاي يا حبيبي أودعك  بحلم بسنين قدام وسنين زمان ترجع  ونفضل كده سوا ويكبر بنا الهوى كنت بتكلم وأسكت  في اللي ما بنا متبت خايف من الأيام  في البعد تجري هوا 

بعد سنة وكام يوم فاتوا عليا، من وقت فراقنا شوفتها صدفة، وبعد ما عينيها جت في عينيا، وبعد نظرة مني خاطفة،  ومنها برضه كام بصة، كانت ملاحظة، وسكتت للحظة، وقالت لي انت لسه ده أنا لسه ولسه ولسه، لسه فاكر كل همسة، لسه حاسس منك اللمسه،  لسه يا حبيبي عايش القصة، الفرق الوحيد إنك لسه، حابب تبعد وتنسى، قولت كل الكلام في ثواني، والشوق باين عليا، وهي حاسه، سكتت تاني، وقولت باين قاسية، ومش فارق معاها لو كنت بعاني، فضلت ساكته وكده فاجأه، قامت تسلم وسابتني في مكاني، بصت وقالت أنا كمان لسه ده أنا لسه ولسه ولسه، لسه فاكره كل همسة، لسه بحلم منك بلمسه،  لسه يا حبيبي عايشه القصة، الفرق الوحيد إني لسه، مش قادرة أرسى،

ياللي في برج عالي، أنا على قد حالي، تحت هنا في القاع  بنادي وأنشد موالي،  لحد ما غنايا ضاع، ولا حد قالي مالي  من شبابيك القصر العالية،  عينيكي تشوف البلاد التانية،   فا إزاي تلمحني  صعبة حتى في خيالي  وأنا واحد من الراعية، ماشي على رجليا، مستحيل تعرفني  أو حتى مرة تسمع أحوالي  مش بطل ولا بيحكوا عليا، ولا أنا فارس شايل سيوف،  ولا في مقام حارس ولا إبن حد معروف، أنا قلب عادي  وانتي حب جالي  عينيكي دي اللي بصه لفوق، مستنيه من السما الشوق، يمطر عليها  كل يوم على التوالي  يملى ايديها وتدوق، واللي في الأرض مزنوق، يملى عينيها إزاي مهما كان غالي  وأنا شوقي من تحت لفوق، مخالف القوانين مخالف الأعراف،  مهما نط هيوصل لفين ابدا مش هيتشاف، ولو صلى لي شيخ  أو وصى لي والي 

ده عيون العاشق فضحاه، والتقيل أسلوبه لا مبالاة، نحن مرة طيب كده لله، مرة واحدة مش هتخسر، بس علينا والله هتقصر، سكة الحيرة والمعاناة اتقل براحتك، وخد وقتك ومساحتك، يا حبيب قلبي من التفكير  وبلاش تنسى، اللي حبك هنا لسه، بيحبك الدنيا مش هتطير  العاشق باين اللي جواه، و زي ما فيه لأ فيه اه، قلبي بيقولها والناس سمعاه، ما الغاوي بينقط بطاقيته، وأنا غاوي قلبك وحبيته، جرب تقولها معاه

ضمير أبلة حكمت، علينا وفينا ومنا، اللي سجنت واللي دبحت،  واللي عززته في جيلنا، يادوب شويا فيه سحلت، عشان نخلص مصلحة سيبنا مصالحنا،  حتة ورقة على أكتوبر طلعنا،  وفي التجمع اتجمعنا واتختمت، وكل الأوراق اللي فيها جمعنا،  في الأرشيف أتركنت واتعدمت ضمير أبلة حكمت، علينا وفينا سنين، الكل عنده ضمير صغير وكبير،  السؤال هنا مين، اللي يأكد ان عندها ضمير،  سؤال صعب جايزة اجابته ملايين، واللي بيحاول يجاوبه ملايين، فا نقسم الملايين ع الملايين مش كتير، وعشان احنا عندنا مجانين،  اقتصادنا في اقتصادنا... تكبير  ضمير أبلة حكمت،  علينا وفينا و دبح، الحكم كرامتنا كسر فرحتنا، وانسانيتنا الاسفلت بيها اتمسح، الوحيد اللي صان لمتنا،  حكمت الأبلة وضميرها عادي سمح،  مفيش قانون يسري على شبح، يا باشا شبح بقولك عيب في سيرتنا، القانون قانون على بياع السبح،  وعلى نداغ اللبان هكذا تستمر مسيرتنا ضمير أبلة حكمت، علينا وفينا بالحزام، نلبسه وبالحزام نمشي على الردار،  وخلاص كل شيء بقى تمام،  طب الحق والمستحق طب الأسعار، تفهم ايه انت يا حمار بلجام،  ب...

بحبك بعشقك بهواكي  أنا كل افعال الحب، في اللغة وحالتي كل أوصافه، عرف الغرام عن قرب، كل اللي قابل قلبي وشافه، وعلى إسمه سماكي  نص عمري فات، والنص التاني آت، معنديش أمنيات، غير أعيشه معاكي  بحبك بعشقك بهواكي  بحبك بعشقك بهواكي  بشوفك جنبي ملاكي وقلب عليا أنا سهران، وعيون تملي ليا كده حارسه، متطمن مبقتش حيران، فهماني حافظاني و دارسه، محتاج لإيه في هواكي 

حاسه بوحدة وعايشه في ضيقة، بتموتي يجي ألف مرة في الدقيقة، وبتخبي عن كل الناس الحقيقة، أنا عارفها وهخليها في سري  يعني عرفتي من نفسك  دلوقتي قيمتي  وإنك مهما دمعتي دموعك  نقطة في بحري  خلاص ضيعتي من ايدك  الفانوس السحري  عارفك زعلانه ياعيني مقهوره، تدخلي اوضتك وتكلمي الصورة، وتناديني أمتى هتجيني معذوره،  دوري بقى عني وأتحري 

لو هتحكي الموضوع  احكي كده لنهاية، وقول ايه اللي تم  وقبلها عملت اية معايا، لما تبكي دموع  إبكي ومش كفاية، لو حتى دموعك دم  مش هتشفي اللي جوايا، انت مهما تعمل أو تقول،  ايه يصحي القلب المقتول، بطلت أحب في العموم، بطلت طيبة ملهاش لزوم، لو هتشكي سنين يشكي ليه الظالم، وهو معروف بالاسم ويشهد عليه كل العالم، 

أنا قلبي كان للحمام، قصر كبر فيه ونام،  مش مجرد غية، وكله ريش نعام، مكنش يعني قش  اتعلم مني الكلام،  وحلم أحلى أحلام، من اللي هي، كبر ونساني أوام، هج وساب العش وطار الحمام طار، في عز النهار طار، واللي قلبه كان عليه  اداله من طيبة عينيه  طب ليه يا حمام تكوش وتقش  أنا اللي دوقك السلام، ضيع عمره في العلام، أفتكر زمان وفوق، اللي خلاك رسام،  الغرور معلمكش  أنا اللي علمك الطير،  وفرق الشر من الخير، وإزاي تحلق فوق، وإنك مختلف وغير، مين علمك الغش  وطار الحمام طار، في عز النهار طار، واللي روحه كانت فيه  جه قدامه والجبروت ماليه  وبسهولة قال الحمام للملك كش   

 من سنين وسنين، وأنا هنا جنبك، أنا العاشق الولهان،  أمتى يروق الزمان، ونتقابل في مكان، تفهمي اللي مش فهمان، بإشارة من قلبك، حبك واخدني لفين، متاهات متاهات، وسكة طويلة كلها وقفات،  تخلص في ليلة، تاخدنا السكة لحبة منحنيات، في أخرها دليلة، وعيوننا التقيله،  ملهاش حيلة، بتسأل الجميلة، وأميرة الأميرات، قولي ليا  حبك واخدني لفين  بحر غويط، ومركب بشراع وسط المحيط،  تملي في صراع، مع الأمواج تبعده عن بيت، حلوة الطباع، والقمر بالإجماع،  تأمر تطاع، أغرق في القاع،  وينقذني خيط، ردك عليا  حبك واخدني لفين 

يعني مش هنخلص، منك بقى ومن كل ده، أيوة مش هنرخص، لده و ده أتأكد من كده، قلبي غالي وتمنه كاش الناس تشتريه، اديهولك ليه تاني ببلاش عشان ترميه، ده اللي مبيتعلمش عاش  حياته فيه تنغص  حبي كان فريد من نوعه فوق أي تصنيف، علشان عشت تحت طوعه افتكرني خفيف، أقلع قلبي من فروعه  لو فضل ليك مخلص  لسه فاكر تعبي وشكلي زمان وقتها، بس كان فين عقلي لما حياتي دخلتها، كلتني مشوي ومقلي  وفيا براحتك بتفصص قصة اتقفلت بلاش تفتحها وشوف غيرنا، جوايا مشاعر عملت فرحها لما بعدنا، بلاش بقى تجرحها  سقف لها وهي بترقص 

يا روحي وقمري وشمسي، بتمنى من قلبي تنسي، بتحبيني وحساني بطل، وأنا بطل لكن منسي، كده زي الضل  تشوفه العين لكنه وهم وخيال، وده ان دل فا أنا أصعف من نقطة مطر،  لو عندك عقل  أهربي وسيبيني كده في الحال، أنا حق يضل  تقربي ليه بس من الخطر، بلاش بقى تطلبي مني، أخدك كده في حضني، بحس تحتنا زي بركان، والدنيا كلها بتهددني، مرة واحدة من نفسي، عايزك تفهميني وتحسي، فكراني مش عايزك جنبي، ده أنا نفسي ونفسي ونفسي،

خايف أحضنك ل الزمن يلمحنا، خايف علينا منه بجد ل يحسدنا، بخاف يكون القدر وإحنا مش واخدين حذر كاتب على حكايتنا الفراق  أديكي شايفة يا حبيبتي بالعين، الدنيا بتعمل اية في أي اتنين، قالوا عشاق  وأديكي جنبي يا حبيبتي سنين، مش قادر أقول بحبك في ثانيتين، وقد إيه مشتاق  بتتمني أقول للدنيا بحبك، وأنا بتمنى والله زيك، بس بنا إتفاق  بخبي شوقي ونظراتي عنك، لتكشفنا يا حبيبتي لقدري وقدرك، نلقى الكون فاق 

أيوة أنا بيك مغرور، ع الكل عايش الدور، وصلت معاك للنهائي  ما أنا بجد معزور، تطل كده يهل النور،  محسود عليك والله بحبك ياللي فاهمني، في سكتنا ساندني، بتعرف إزاي تبسطني،  و ترد لي الحب اتنين،  انت لوحدك مالكني، كلي مش حته مني،  عرفت ليه حسدني،  بتخبيني منهم في العين، لو هتكلم عن جمالك، الكلام مش مقامك، مهما أغني قدامك، مش هخلص بعد سنين، شكراً إنك موجود، جنبي وعليك مسنود،  وحبك مش مشروط، شكراً إنك عليا أمين،

أنا وحداني  ولو حتى عشت في كوكب تاني، هفضل فرداني  زي الزيت في الماية بقيت، في البحر بحفر، بكتب ع الرملة،  سري متشفر، وأنا زي نملة، شايفة نفسها أمله، وبالمنطق بتكفر، زرع شيطاني طارح ومفيش حد مرة سقاني،  والصحرا عرفاني هناك بعيد عايش فيها وحيد،

أنا واحد ولا اثنين،  ما أنا كل يوم، بصحى وأقوم، بوش  وأبص في المرايا، القى غيره وش  غير بتاع النوم، ويقولي معلش  سيبلي النهاردة، عشان اليوم ده  محتاج كده كدبتين، متخافش من اللي بيدور على نفسه، وتملي بيسأل  عشان يعرف ينام، خاف من اللي بيعمل سعر لنفسه، ويقولك هسأل  وأرد عليك بكام،  أنا طيب ولا شرير، مغلوب الحال، ولا بلعب على الحبال، مهرج بقدم مساعدة، مرة و ١٠٠ بتفرج  متوهني السؤال، مش لاقي مخرج بقيت شبههم، و واحد منهم  ولا لسه عندي ضمير، 

اللي زرع محبة، حبة حبة، لما طرح شجر، فرعه هجر،  وساب الأحبة والغريب مليان الجيب، يا دي العيب  لم الخير وعبى يا قلبي الجرح مفتوح، واللي اتعمل ممسوح، ما هو مكتوب على قلوب، زي الهوا بيروح، اللي لف الأرض، بالطول والعرض،  وضاع العمر سفر، قلبه بحجر، من البعض  اتحدف واسمه اتحذف، لما أتعرف  هيردهلهم ورد

لأ لأ واحدة واحدة عليا، انتي مش واحدة عادية،  كلمة في نظرة واحدة ليا، قلبي عصرته، عصير و عملته، بكوباية حطته، وهوب شربته، آه من قلبها، وطيبته و حنيته، مجتش ناحيته، لسه وقلبي حبها قلبي دوبته، وبجمالها توهته، غير سكته، وراها مشته، عايز يقولها، ما الجرأة حتته، والغيرة أكلته، لما بتكلم اللي جنبها 

صادق يا سيدي صادق، والله بس ما انت حالف، بالسؤال تملي انت البادئ  واحشك أوي أنا عارف، آه يا ناس  لو عايزاك تلاقيها جاياك بشنطة،  معبيين فيها أونطة، ولو عايزهم بلقطة، تنده وتدن في مالطة، ده الاحساس  بقى مصفر دبلان كده زي الخضار، اللي بيكدبوا شطار،  سوقهم ليل ونهار، ماشي كده ولا الدولار، آه يا ناس  قلبها من برة يبان حتة جاتوة، والحب الحقيقي خدوه، أوام أوام حنطوه، وبتابوت جواهم حطوه،  ده الاخلاص  بقى سعره غالي ونادر ولا الآثار، ممنوع فيه الاتجار، وليه ناسه تجار، موجود شراء وإيجار،

بعد انتظار طويل  يعدى كام نهار وليل  الزمن غاوي تكرار  وويل  مفيش فيه اختيار  وبديل  كلنا بنفس الطابور، والكل ليه دور، تبور لحد ما توصل  وايه بعدها يحصل  تسمع بس أعذار، خلصنا جرد وتقفيل شبطنا والله ياجميل،  وتحس انك تقيل، مشكلة كل الجيل  وعايز تعرف الدليل  أنا وانت هنا قدام المرايا،  تتغير الأسامي واحدة الحكاية،  تختلف الظروف ثابت الخوف، ونسيان المعروف في النهاية، تخلص الأيام  وتطير  و نجري كده أوام  للسرير نتطمن لسه الأحلام  بخير الصبح هو المتلام  والشرير  بياخدنا من أحلامنا، لواقع بيألمنا  ويتهمنا تملي بالكسل  واننا غاويين فشل  ويقول كمان كلام، أكتر من ده بكتير  قبل صباح الخير  وتحس بالتصغير، ويحسد قلبك الطير  دي الحقيقة يا كبير 

بيقولوا إنك زعلان، وقاعد بتسح لأ وكمان ندمان، يعني لو ده صح أحب أقولك يا عشمان، حب زمان و وقت الدلع والحنان، خلاص شح  انتهينا انتهينا ولو الزمن خلص، وأنا وإنت بس بقينا، وشنا في وش بعض  هنخلص على بعض  بأيدينا مننا فينا  ويبقى ريحنا الأرض وفر بقى المناديل، والقطرة والمرهم  مش بدموعك هميل، ياريت نفهم كلامي واضح يا جميل، ميحتملش التأويل نرجع ده مستحيل، البعد أرحم 

الحلو طبيعي لوحده حلو، وانت حلو محلي، بتاع بلده محلي، في المستورد بتخلي، باير في محلي، واكل منه تملي الجو، ياللي بروحك وجمالك  وعينيك الطيبين من طيبة النيل،  بيها معقدهم  أسمر وماله سمارك  القمر مبيظهرش غير في الليل،  يطلع ويقعدهم  سلو بلدنا الغالي غلو،  يتشال جوة معسكر،  وبابه يفصل متسكر، واقف قدامه عسكر، خايفين علينا لنسكر، لو شمينا ريحته في التو،

انت مش عارف قد إيه بحبك، وأنا حبي مصير مش اختيار، لو ملقتش فيك، مكان بيا يليق، يبقى بتلعب بالنار، يبقى هأذيك، وعادي جداً أحرق قلبك يا أكون معاك موجود، يا ميكونش ليك وجود، تحب الجنة ولا العذاب،  حبي أمان أو إرهاب، أصلي لما بحب بحب موت، الجملة دي غريبة بصراحة، وبرضه حقيقية، صريحة وقوية، مفيهاش مساحة، لمعاني تانية، قلبي لوحده مش هيموت

واقف ورا الشباك، بتفرج ع اللي فات، كده من بعيد  بتدارى وراه هناك، ومفيش ف الجايات، أبدا أيه جديد كل ذكرى زي مقطع، في شريط فيديو قديم جداً بيقطع حتى النهاردة ولا بكرة،  بيطلب قبل ما يجي وقت مستقطع واقف محلك سر، بيعدي عليا الحلم، يرمي السلام  ويعدي معاه العمر،  تنزل نهاية الفيلم، والبطل ينام

بستنى أشوف تملي الصبح لما تطلي، ومبتطليش  ويطول ليلي يحلي الأسود بالكحلي، ومبينتهيش  وعايزاني أعيش متهمني  أبعتي لي قلبك يفهمني  متنسيش في واحد هنا بحبك ملعون، في يوم ما حبك وأنا مسجون، يعدي ليل في ليل وشمس العون،  مبتجيش  قالوا الحب شموس ومع ليلي محبوس،  ومسهرتيش   زيارة السجين واجبه، طبطبه ويا وجبة،  مزورتنيش  عايزاني أعيش بقاموس  دي تبقى حكاية صعبة  متعجبنيش