قصيدة ضمير أبلة حكمت

ضمير أبلة حكمت،
علينا وفينا ومنا،
اللي سجنت واللي دبحت، 
واللي عززته في جيلنا،
يادوب شويا فيه سحلت،
عشان نخلص مصلحة سيبنا مصالحنا، 
حتة ورقة على أكتوبر طلعنا، 
وفي التجمع اتجمعنا واتختمت،
وكل الأوراق اللي فيها جمعنا، 
في الأرشيف أتركنت واتعدمت

ضمير أبلة حكمت،
علينا وفينا سنين،
الكل عنده ضمير صغير وكبير، 
السؤال هنا مين،
اللي يأكد ان عندها ضمير، 
سؤال صعب جايزة اجابته ملايين،
واللي بيحاول يجاوبه ملايين،
فا نقسم الملايين ع الملايين مش كتير،
وعشان احنا عندنا مجانين، 
اقتصادنا في اقتصادنا... تكبير 

ضمير أبلة حكمت، 
علينا وفينا و دبح،
الحكم كرامتنا كسر فرحتنا،
وانسانيتنا الاسفلت بيها اتمسح،
الوحيد اللي صان لمتنا، 
حكمت الأبلة وضميرها عادي سمح، 
مفيش قانون يسري على شبح،
يا باشا شبح بقولك عيب في سيرتنا،
القانون قانون على بياع السبح، 
وعلى نداغ اللبان هكذا تستمر مسيرتنا

ضمير أبلة حكمت،
علينا وفينا بالحزام،
نلبسه وبالحزام نمشي على الردار، 
وخلاص كل شيء بقى تمام، 
طب الحق والمستحق طب الأسعار،
تفهم ايه انت يا حمار بلجام، 
بتسأل على ايه يا بيه سمعنا الكلام،
مقصدتش أنا بس بطمن على الأشجار،
والمناخ والمشاريع القومية العظام،
لو هما كويسين خلاص اعتبره هزار

ضمير أبلة حكمت،
علينا وفينا بسياسة، 
بلاش الكلام في السياسة،
وعلى رأسي كلام كل الساسة، 
انا اصلا مش مهتم غير بالراقصة، 
اللي اسمها لورديانة ومعاها جوهرة، 
معمريش أهتميت في المدرسة بالزعامة والرياسة،
ولا عمري أهتميت بالدراسة،
أنا حمار سعادتك بالوراثة وعشان القافية ساكن بالدراسة، 
بيحب يتفذلك ويعاتب ضمير القاهرة