قصيدة مفيش في الحب حر

كان نفسي أقف لك في الصف،
أخبط قلبي يطبل زي الدف، 
كان نفسي قلبك عليا يتزف،
نمشي مستأنسين مهما خدنا اللف،
العين قصاد العين وكف في كف،
كان نفسي ونفسي في لمحة شوق، 
كان نفسي والنفس أمارة بالسوء،
طب القلب دب والناس بتكدب،
كان فين العقل والبصيرة ليه ع الرف،

كان نفسي تكوني أحلى أغنية،
حروفها بترقص وكلها رومانسية، 
وكل كلمة فيها من قلبي أصلية، 
أغني كلام جديد مغنهوش قبليا،
مع لحن يشرح يفرح كل الدنيا ديا،
كان نفسي ونفسي أخليكي فوق،
كان نفسي ومش بأماني المخلوق، 
ترتيب عجيب غريب نتعلق بنصيب، 
ملوش في الأغاني ولا حاجة فيا،

كان نفسي السكة تبقى بنا واصلة،
حياتي معاكي بعد نقطة وفاصلة،
والحب رايح جاي بنا بالمراسلة،
لو تنسي ثانية أنا عمري ما أنسى،
أي كلمة ونظرة وكل حاجة حاصلة،
كان نفسي ونفسي أسكر بيكي ما أفوق،
كان نفسي لكن يمنعني الوضوء، 
و رضا ربنا ما أنا أمير وانتي كما،
الروح الشريرة الساكنه في السحرا، 

كان نفسي أوصل لقصرك العالي،
وكل واحد فينا قلبه عليه غالي،
إديته ليكي فا طلبتي كمان احتلالي، 
رحبت بيكي ومبقاش حاجة باقيالي،
كان نفسي والقصد كان حلالي،
كان نفسي ونفسي تكوني ليا شروق، 
وللأسف انتي ليل مفيهوش ضوء، 
ضلمة عتمة لطمه وراها مية لطمه، 
على خدي تنزل غدر في الليالي،

كان نفسي أشوف معاكي الشمس،
واثبت برائتي براءة مفيهاش لبس،
واخرج للنور من بعد عيشة الحبس،
قضيت المدة وكانت شدة ويأس،
وانتي حاده وأنا لا خبر ولا حس، 
كان نفسي ونفسي من الحرية أدوق،
قولتي اختار بين الغرقان ولا المخنوق،
البر حر والبحر عالي وشر،
ومفيش في الحب حر لأ بالعكس،