أغنية ع الانستا

واحدة قهوة ع الريحة،
بماية ساقعة من فضلك،
جوة مصر في شوارع وسط البلد، 
لسه بيلفوا السريحه،
و ينادوا أقرا الفضيحة اقرا الفضيحة،
شوف كده يا استاذ حظك،
دي أبراج فلك ليها علم وليها سند، 
وبنات قدام التسريحة، 
بتقوله والله يا بختك،
كون نفسك براحتك، 
هبقى معاك صريحة، مش مهم الشقة تبقى مريحة، 
بس لو كانت في الأبراج إياها تبقى ولد 

ناس مقسومه نصين، حبه شمال حبة يمين
كله ألسطه ع الانستا، كل الفلاتر شغالين
وحبة لايصه ف البوسطة، ولا طابور التموين 
وحبة هنا فاشونستا، والباقي مش عايزين

واحد موكا فرابتشينو، 
ضيف عليه بستاشيو، 
ايجيبت اللي جاي منها بيعود،
والحال والله مش فاهمينه، 
عربي في فينو ولوي اللسان وسنينه،
واحد مستر والتاني بلياتشو،
كله بيعدي بالبار كود ولازم الدريس كود،
والسوشيال سوق فرشينه، 
بصور فل ميكاب ع البلاجيو،
وأهو كل واحد وقرشه، 
مين يقدر يدينه، محدش ما احنا مش شايفينه،
محبوسين ف الأسانسير والحارس مش موجود