أغنية أنا معزول

ده أنا قلبي كان عامل زي النيل،
تلقاه في أسوان أبيض وجميل،
يوصل القاهرة تحسه في مأتم، 
أسود من عمايلكم عايز يسب ويشتم، 
عملت لنفسي نضارة شمس اسود معتم،
معاها مأنتم بلبسها حتى في الليل، 
مش عايز أشوف منكم لا هنا ولا ويل، 
أنا مش هنا و ده خلاص السيستم،
دي العتمه نور ولو قتمه والعمى نعمة،
وصحة لو البصر لسه بيشوفكم دليل،
مش سامع صياحكم سمعي تقيل،
على نهاركم ياريت بقى نكتم،

أنا معزول مفصول،
عن كل الدنيا والناس، 
يعني تقدر تقول، 
معدوم الإحساس،
والفكر مشلول،
والقلب مقتول،

إتعلمت مهما أعمل كله بلح،
جبل الخير للغير عمره ما فلح، 
عمايل الملايكة للملايكة ودمتم،
ما اللي اشترى عزوة سابوه متيتم،
لو شبه الناس بالناس تقدر تتقدم، 
بس تتندم لو قلبك يوم سمح،
تعمل زيهم وتبقى منهم لو الحب لمح، 
اسمك مكتوب بالرصاص عليه يختم، 
ويقول مرفوض إنسان مفروض يبقى ودود،
وهو للأسف الشر من جواه طفح،
حبه تمثيل إخلاصه فعلاً شبح،
عايز أقولكم كلكم بعدكم متحتم