قصيدة المتزحولين

على كوكب زحل، طلعنا كلنا،
لقينا اللي في نفسنا،
والحياة هناك جميلة،
و كل متزحول مننا، عايش هنا،
ومن ضمنهم أنا،
عرفنا معنى الفضيلة، 

شمال يمين احنا المتزحولين،
باحلامنا معديين كل الكواكب،
ناس مسجونين النتيجة سالب،
مش موجودين ناس عقارب،
ولا عندنا ناس كده بتحارب،
عشان تموت بعضها مبسوطين،

مع بعض عايشين، على نفس الكوكب، 
ومحدش فينا فيه بيخرب،
وعندنا ماية وكهربا،
بس محدش بيكهرب، غيره ويتدرب، 
برصاص حي يضرب، 
في الاخوة مش العدا،

عندنا في زحل، إنترنت سريع، 
بس محدش بيعمل شجيع،
ورا الكيبورد دكر،
مفيش حاجة بتضيع، وقالها الجميع،
زحل مش للبيع،
سامعيني انتوا يا بشر،

معندناش بضاعة فاسدة، ولا بنهتم بالمادة،
قلوبنا رحيمة مش جامدة،
ولا التموين بالنقط،
عرفنا معنى الضمير، وعمايل الخير،
والمسئول مش كبير،
ع الحساب لو غلط،

مفيش هنا اصبروا، ولا ترند ولا فولو،
ولا في نفسكوا كلوا،
ما احنا مش مواشي، 
فيه هنا حرية، وعدالة إجتماعية،
الكل هنا سواسية، 
قانون ع الكل ماشي،

مفيش هنا فاسدين، ولا تجار دين،
ولا عقار بملايين،
وحواري وكمباوند،
مفيش هنا ديكتاتور، والباقي ديكور،
ولا طبال عايز دور،
طبلته هي المستند 

مفيش مجلس نواب، ولا مال متساب،
تملي هنا الجواب، 
هو سعادة المواطنين،
مفيش بايدن وترامب، ولا سلاح وبومب، 
وناس بتكسب من حرب،
يحيا يحيا المتزحولين،