أشعار الأراجوز

اتقابلنا من تاني في يوم، في مكان مفتوح  شبهت عليها وهي أتاريها، عرفتني على طول دي سنين الفراق لا تغير هوا ولا قلب مجروح  دي سنين الفراق طلع تأثيرها علينا معدوم  الشمس شمس ولو عليها غيوم  ايه رأيك نطلب قهوة، لسه بتشربيها مظبوط  هزت راسها موافقة، والقدر حوالينا مخضوض  هيرجعوا ولا في بعض هيوجعوا ويفضل مبسوط دي سنين الفراق طلع تأثيرها علينا معدوم  ذكريات بنشوفها زي ألبوم  ابتدي كلامنا هادي، و واحدة واحدة زاد اللوم عليا و ياه للدرجادي، عاش قلبها مني مظلوم  اتأسفت وطلبت تمشي، وقهوتنا بردت ملهاش وش بالظبط زي حالتي مقدرش اقولها بلاش تقوم،  ما كل الكلام مالوش لزوم 

كام يوم في سفرية وأغاني بحبها رومانسية  و واحدة جميلة وشقية  تخطف قلب في تكه  تشقلب حال بضحكة  تحلى معاها القعدة لحد الفجرية  ويبقى بنا كام ذكرى، صورة ع البحر وأكلة  واحنا راكبين عجلة ولا كأننا طايرين  ولما مع بعض نتمشى، و عشر مرات نتعشى  ومن كلامي الحلو كشه  ونوعد بعض مكملين  ويختفي أوام القمر، لما يجي وقت السفر  مفيش تاني سهر  وبالعافية نقول كلمتين  تفضل عايشه الحاجات، وتموت ع البوابات  نودع بعض في سكات  و نروح في سكتين

هتفضل لوحدك كده طول حياتك  تبعد عن حبايبك وتقرب من آهاتك  يا قلبي الحلو معاندك  مينفعش معاه عندك  كفاية بقى عندك، مشبعتش من إحباطاتك ياقلبي القطر خلاص أهو فاتك  تكتب على سطر وتسيب سطر  تدوق السعادة بالملي تبقى جرعاتك  وتشرب المر لتر ورا لتر  هتعيش ضايع في أحلى حكاياتك  هتبقى قانع إن ده نصيب وساكت  قصادك الدنيا موانع ولا القدر هو اللي ممانع  شاري الحب مش بايع، ما هو كل احتياجاتك 

عجبتني الضحكة ديا وحبيتها  وحياتي قبلها نسيتها في لحظتها  مش عايز أرجع لها ولا ترجع لي  كل اللي عايزه اروح لها بيتها  الوقت معاها عدى، وكإنه مالوش مالكه  اميرة وسلطانة وملكة  جميلة أوي طيبتها  بروحها ليها وجود، حرة ملهاش حدود، يا حبيبتي أنا موجود، سمعتها والكلمة بسطتها 

كل الحكايات صورة طبق الأصل تتغير الأماكن والأيام والبدايات  حتى الشخصيات يخلص فصل  يبدأ فصل ومفيش اختلافات هي نفسها النهايات  وكأني واخد مصل  ضد النهاية السعيدة وأي حاجة جديدة  وكأني ماضي وصل  تفضل روحي وحيده تفضل بعيده  تتحرك جوايا مشاعر بسرعة البرق  واتعشم المرادي تبقى أحلى حكاية  وتمشي على هوايا ويحصل فرق  و من غير حرق خالص للنهاية  هسيبكم تعرفوها معايا 

حبيت؟ أيوة طبعا حبيت بس ولا مرة اتحبيت  وخلاص بطلت ما أنا فضيت  عشت؟ أنا بجد حاولت بس يا خسارة فشلت  مامشيتش حاجة زي ما اتمنيت النتيجة صفر، فقر في فقر واحد ف البحر نازل حفر  الحقيقة تخوف، مبقتش بتشرف  بحياتي ومش هسوف ولا عارف أتصرف زعلت؟ طبيعي أكون اكتئبت والنفسية تحت  ملل والخميس زي السبت  والعمل؟ تفتكر فيه أمل، والهم زي الجبل  هيفرق معاه يعني لو ضحكت! 

حكمت عليا و كونت وجهة نظر من كل حاجة عندي إلا قلبي  و آه ياقلبي دي معندهاش نظر عايزه فلوس وليها طموح  وبتحب السفر  وانا بالنسبه لها حد مثالي  مشافتش قلبي محبتش طيبتي  خدتني كفر  لكل احلامها اللي في العلالي نفسها تخرج وتروح وتيجي  تشتري وتتفسح وحبيت ده كله عشان معاها  وكنت بتمنى جنبي تستنى  تحبني وتسرح في قلبي تقوله ساكن جواها