أشعار الأراجوز

شوفتوا الافترا، عايز هو يمشي و يسيبني،  بعد ما عمل اللي لا يعمل، بعد كل اللي جرى، وعايز عادي عليه أسال، يلاقيني وقت ما يحتاجني،  بس أفضل عايش في الدرى  شوفتوا افترا اكتر من كده على كل حاجة عايز يكوش،  شايلني لبكرة فيا بيحوش،  و يهوش بيا أي حد يضايقه  يخليه يجيب ورا  شوفتوا بقى الافترا  شوفتوا المهازل،  يظلمني معاه سنين ويهملني، ويقول انا اللي فيا العيب،  حبي تحصيل حاصل،  ولما يتظلم من القريب،  يلاقيني وقت ما يحتاجني، وأبقى لحزنه جدار عازل، لحبيبه اتنازل شوفتوا المهازل 

زمان كنت بسمع كلام،  عمري ما فهمته بجد، اللي يقول اهد الدنيا هد،  واللي مبيحبش أبدا حد، قد حبيبته ويجيب لها ورد، وأهو كلام في كلام ملوش رد، كلام رومانسي بس مش بيسد، قدام الأيام  وعرفتك انا دلوقت، ومع الوقت  حسيت اكتر ما فهمت،  الكلام يفضل كلام اتقال، بس فيه اللي خلاه أفعال،  وانت يا سيد الرجال عملت،  وعملت واثبت، وأنا خلاص صدقت زمان مفهومي عن السعادة، كل الناس ولو لوحدها، تعمل الحاجة اللي بتحبها، تفرح نفسها بقى بنفسها، بس السعادة لو شاركتها،  مع اللي بتحبه تحس بضعفها، و دي حاجة عمري ما صدقتها، طبعأ كالعادة 

مش شرط اللي انت بتحبه يحبك، زي ما انت بتحبه بالظبط، واحد يغرق وانت ليه شط  تشوفه نجمة يشوفك أرض  كل أعمالك الجميلة ليه، مش هتزود غلاوتك عليه، محدش بيتعلم الحنية، ولا تقدر تزرعها فيه،  ممكن حب الدنيا، يتردلك عادي قسية،  وممكن تتحب مهما قصرت، فا مش شرط  مش شرط يكتب اسمك كده زيك، في قلبه بنفس الفونت، وأيوة زي ما بتعمل يحط، تحت مشاعرك آلف خط

ده كل اللي حصل بنا، ملوش اسم ملوش معنى،  ده لا كان فراق، ولا فضلنا وكملنا، ولا فيه اتفاق على حاجة واتكلمنا، و ده كل اللي حصل بنا،  زي أغنية كان ليها لحن وكلام، فضل اللحن لحن والكلام كلام، هو يقول انا و زيه بالظبط انا، بعد كام سنة فضلنا نقول احنا زي فريقين وكل واحد ليه ملعب، كل واحد فينا بيفكر إزاي يغلب، نبعد بعيد ومشتاقين للمواعيد،  نرجع من جديد ولا هيزيد تعبنا

ده انا كنت فاكر بعدك الأيام مش هتعدي، وهموت  طلع الكلام مش مظبوط،  وكل حاجة بتعدي، وتفوت كنت زمان حاسب حبك نار، بقى رماد بعد أول يوم بعاد أنا وقلبي رجعنا جداد أهو زي النهار  كنت خايف حياتي عليك تقف،  بس الأيام أهي ماشيه عادي تمام  أنا وقلبي عندنا أحلام لسه عندنا شغف

لسه زي ماهي حلوة،  حلاوة مش معقوله، لا اتغيرت ضحكتها، ولا عينيها ونظرتها، لسه كده زي الصورة، بتاعتها اللي معايا من ساعتها، وقت الطفولة من سنة أولى،  اللي شايلها وانا كلي، أمل تملي،  والأسباب مش مجهوله، قربت منها وسلمت،  ما أنا ياما حلمت، وكلمت نفسي طول السنين، رسمت واتخيلت، فرصة تجمعنا احنا الاتنين،  بعد السنين دي إزاي،  لسه كده زي ماهي،  وأنا غيرتني الأيام، بس مع السلام، عرفتني من عينيا، أوام وفضلنا نتكلم كلام،  واللي فيا قولته في ثانية، اللي خوفت أقوله زمان، أنا من زمان، بحبك اد الدنيا ديا،  قربت منها ووقفت،  معقول يعني الوقت، دلوقت بيجري مني ومنها بعد ما اتوفقت، وقابلت حب حياتي كلها 

قولوا معايا وسمعوه  يمكن واقف بعيد، مش معايا في الجديد،  مشغول ورايا مواعيد، تاني مش هنجتمع، فين كرامته واعوه، قولوا معايا سمعوه، عنده مشكلة ف السمع،  لو الحب نصيب أنا طلع نصيبي ازازة دوا  لو الحب قسمة قسمتي بقى جابتني ورا  لو الحب اذواق انا ذوقي كده كده...  ايوة اللي نقصده سوا  شاورا معايا اوي، باي باي يعني بح،  يفهمني مرة صح، ع الجرح حط ملح، خلوه يجي يشوف،  مين فينا كان القوي،  شاورا معايا اوي، عنده مشكلة ف الشوف، 

والله نسيتك انت ليه مش مصدق  محدش بعد الحلو بيرجع تاني يحدق  كام مرة نصحتك بطل في الكلام تحرق ذكرياتك نسيتها، وفي أقرب حته أوام رميتها،  وعن أي سكة ليك ببعد  حكاياتك كرهتها، لو سيرتك جت بتقفل منها، واليوم بسببها بيبقى اسود النهايات أخلاق، وأنا حمدت ربنا على الفراق، اختيارات الواحد لنفسه تفرق 

واحد صاحبي جاي يقابلني ومفرفش، مالك يابني قالي اصلي مفركش،  وبقيت زيك يا بختك،  على عشا هيعزمني وللصبح ندردش، ونفك بقى شويا ونروح الفجرية والله يا صحوبيه حياة العزوبية،  مش زي ما انت مفكر،  حلوة الحرية من غير مسؤولية، حلوة جدا مش هنكر، بس بفكر إزاي هكمل وحديا، انت عايز تكون مكاني وتهيص، وأنا لو مكانك بجد كنت هرقص، بحسدك يعني و بتحسدني، محدش مبسوط لثواني كده يا ريس، ياريت الدبلة ديا كانت في ايديا 

مرهقه  زي ورقة شجر قدام الريح،  مهزقه  يمين وشمال ومينفعش تصيح، لا بصحيح انا داخله ولا آلف معركة  يا ناس ما كفاية بقى ليه حياتي كلها مشاكل، حد عليا بيتواكل، وحد شايفني بتاكل، و رسمة في فنها ده انا والله بني آدمة، مش تخصص خدمة، وتلخصني في هدمة، وتحكم عليا منها خلصانه  ومبقاش عندي وحياتك صحة، و بأمانة  حواليا ناس واخدين فسحة، من مصحة و حطني معاهم في نفس الخانة وأنا عاقله مش عيانه

انا البائس أنا اليائس، أنا اللي حابس نفسي جوه نفسه، وموقف قلبه عليها حارس، كلاكيعه دي كتير جواه أنا الدارس التاريخ، وعلوم وجغرافيا بوركينافاسو، ومعلموناش يا خسارة ف المدارس،  ازاي نعيش في الحياة خدوا الحكمة من أفواه المجانين،  يا متعلمين  تعليم مجاني ولا أمريكاني،  و واخدين  شهادات ومؤهل عالي عالي،  هقولها تاني  خدوا الحكمة من أفواه المجانين،  الله العالم في العالم،  أنا الحالم الوحيد بدنيا مختلفة، مفيهاش مظلوم ولا ظالم،  أصحاب العقول سبب المشاكل أنا راسم الطريق، وكل حاجة بطريقة محترفة،  امشوا ورايا إطلعوا السلالم، اه مجنون خدت إيه يا عاقل

انا قلبي متشمع، لا بيحب ولا بيسمع، لا بيرسل ولا بيستقبل، وبحاله متقبل، وهيفضل كده في المستقبل، شطب من المنبع، اللي مستنيه الله يعينه،  مستني ايه  مستني ليه ده حب الأيام دي ليه  ملاعينه اللي لعنينه، للمصلحة واخدينه، مرجع اللي حضر زمان يحكوا جبتلهم القمر  ولا فيهم طمر  ده حب الأيام دي خطر وبيشكوا من شوكته، ليه للي دوقته، أرجع 

فين فين فين الحب بتاع الأفلام،  اللي فضلنا سنين،  نستناه كده طول الأيام، مالي الشوق الأحلام  ليه ليه  ليه كبرنا بسرعة أوام،  للزمن اللي إحنا فيه، وبنفس السرعة طلع أوهام، والدنيا واخدانا أقلام بقى ده إسمه كلام، والله حرام  هموت من الصدمة قلبي في عز شبابه، قفل بابه  مرفوع من الخدمة 

هي كل حياتي، هي الغالية والماليه دنيتي عليا، هي أفكاري وأحلامي هي آهاتي، هي اللي متعرفش انها هي، ببعت لها تحياتي،  بتونس وحدتي من غير ما تعرف إسمي ولا فين عنواني بتنفس محبتي ليها وعليها بتعرف كل يوم بشكل تاني  بتعمل اللي عليها خيالي بيتصرف ومخليها تملي قدامي لو في اخر الدنيا من غير ما أحلف كانت معايا من ثواني 

بعد ما غبت و مشيت، بعد ما روحت لبعيد،  بعد ما قولت اللي في نفسك، جبت قديم وجديد  تفتكر برجعتك ديا تاني ليا، ممكن أبقى سعيد  الحب بيخلص زي باقي الحاجات، ما بالك وانت غلطت فيا كتير  لو أقدر ألخص يعني اللي فات، انت واحد ميستهلش أي خير  بعد ما فضيت الدنيا،  كلها كده من حواليك، فكرت ترجع لي تاني والفكرة، أحلوت في عينيك معقول فاكرني بجد مستني، والله ما رادد عليك 

انت لسه عندك طموح، نرجع تاني ونيجي ونروح، مكنش سهل عليا تروح، تسمع الحقيقة ولا لسه بتحب النفاق صوتك بيفكرني بزعل وخناق، صورتك بتفكرني بعذاب الفراق، عايز تعيش معايا أيامي، طب اعذر كلامي، مبقتش قادر أشوفك قدامي، عشان يحصل بنا أي اتفاق،  انت لسه باني آمال، على مستقبلنا سوا وعمال، تضغط أوي عليا وشغال، كل دقيقة تترجاني وتقول مشتاق

بتقولي إني أنا هو الحارس ليكي والحبيب الأمين،  وبرضه أنا سبب كل الكوارث  وحيرتك طول سنين،  ده انتي زي مارس، حبة حر يا بردانين، الحب ليه مدارس، وطرق مختلفين  وأصول بتتمارس، من اتنين عاشقين  ومن مين بقيت وارث، الشك في اليقين  بتقولي إني محل ثقة  وتفكيري تملي سليم، وبرضه مني قلبك اشتكى وكان الله بالسر عليم،

 تعبت  وتعبت معايا كل البنات، من كتر المراهنات على علاقات،  كلها كدب وحوارات، هفلح المرادي أساسي، أجري على ناسي، ايوة مختاره بأحساسي، وألبس ف حيط، وأمشى ف البيت، أكسر على راسي كل الفازات ياعم حب فين قسم الشكاوي،  أنا طالبه حب جايلي كتير بلاوي، انت هاوي ولا فيه لغبطة اوردرات إزاي ياحب انت معندكش دعم، واحد شكاك والتاني معندوش دم، خلاص ياعم جوزوني جواز صالونات  تعبت  بجد زي باقي البنات، دي كل الحكايات زي المرايات، شبه بعض في النهايات، باخد لوحدي قراري، شوفوا المرادي اختياري، اتعلمت والفرز جاري، وهوبا لبست، خلاص اتأسفت، سيبوني لناري مش عايزه تقييمات 

اللي يحبك بس في السر، واللي حبه مكنش خير ليك عمره،  يأذيك بقربه وكلامه عن الناس كله شر، ده تبعد عنه على الفور،  ده ايدك منه والبحر دي العيون يا إما تكدب يا إما صادقه، زي الفرق بين الحاجة الحلوة والحادقه، لو ضايقته يغضب لو ضايقك مش فارقه، ويغيب عادي عنك بالشهر،  ده أيدك منه والبحر دي القلوب يا إما حنينه يا إما ناشفه، ركز مع الأيام دي هي لوحدها كاشفه، وهتعمل ايه يا انا في راسك الناشفه، مش هيفرق ع الحجر الصبر، ده ايدك منه والبحر