أشعار الأراجوز

طب ايه اخبار السعادة، وشكل حياتك اللي كنتي، بتتمنيها ها عايشة في سعادة، ولا فيه حاجات مكسوفة منها، وبتخبيها سامع أخبار مش ولابد، دي بجد، طبعا هي مش هترد، عليها بيقولوا كلامه الحلو في الهوا طار، والحب خلاص هدي بعد ماكان نار، مش طايق يسمعلك صوت، زيك زي الفازة بالبيوت  يارب دلوقتي قلبك مبسوط، سلمي لي بقى على حسن الأختيار ما أنا ياما زمان قولتلك، أحمدي ربنا عليا إني، حبيتك  كل حاجة أنا عملتلك، فتحتي على ايدي وعني، بقيتك قدمت السبت والحد، وفاق الحد، صبري عليك ياورد، أستنيتك ليه بتقول كلام خايب، تتزنق تجيب سيرة النصيب، تساعد  أنا اللي مكنتش عاجب، مع ان مكنش فيا عيب، واحد  ده كلامك عليه أثبت، ولا أسكت، أحسن بدل ما أغلط، جامد

أحنا ممكن نرجع، أحسن من الأول، انت تجرب تسمع، وانا أحاول أتحمل  دي والله سهلة، احنا بس نتغير، حبنا يستاهل محاولة، قولت ايه قرر مفيش مستحيل قدام رجوعنا، أفتكر وجعنا  وقت الفراق افتكر دموعنا محدش هيشيل المسؤلية بدلنا، احنا غلطنا وعلى الغلطة دي أفتكر كبرنا أحنا ممكن نرجع، بس على شرط، نبطل في بعض نوجع، ونتعامل الند بالند تعالى نعمل أتفاق، بالحب نلقى حل، وبلاش يبقى الفراق، هو أسهل حل 

يا فرحة قلبي معشهاش الا لما قابلك، من نظرة تنسيني انا كنت ايه قبلك، وقف بيا العمر خلاص، عند لحظة ما قلبي حبك كان مين يصدق أو يقول، أنك تكوني حبيبتي، في يوم من الأيام  ده خيال والله أكبر من الأحلام، وياسلام لو ضحكتي، وآه منها لما تطول  دلوقتي لما بصحى أو بنام، معايا تملي أنتي، يارب كده على طول مش مصدق اني ممكن أطول، معقول حلم العمر، يتحقق بسرعة أوام مش عايز أفتكر زمان، خلينا في دلوقتي، ده أنا معاكي مرتاح ولقيت في هواكي أفراح، عشتي عمرك وانتي،  مستنية تحسي بأمان 

أنا مش عايز أكمل، ولما يسألوني ليه، هرد أنا بأيه، مش حابب الموضوع من الأول  أنا مش عايز أبرر، ولا أقول أسباب، أو حتى أعمل حساب، لحاجات ملهاش مبرر عارف انت احساس، انك زهقت من الحياة، ومن الكلام مع الناس، ومن جواك انطفيت  وأنا فعلاً خلاص، بجد تعبت وكل المشاعر، مش تمام زي ناس، وأنا منهم أكتفيت أنا مش عايز اتكلم، واحكي عن انسان، أو أحط عنوان، لكل درس فيا علم  أنا مش عايز حاجة، كده غير نفسي، وبيا مرة تحسي، وتبطل طيبة و سذاجة أنا مش عايز غير، يسبوني في حالي، لو مرة قولت مالي، مش هتسمعوا أي خير 

كانت زي الطيف ألوان، جاتلي وسط الأحزان، تقولي يا شاب، ليا في قلبك مكان  كانت أجمل من الأحلام، اللي بشوفها لما بنام، بتتمنى حب، سألتني هي أوام والدنيا صبحت جنة، في عينيها كلام يتغنى، من لمسة ردت فيا الروح  بقى للدنيا معنى، ده قلبها متحني بحنة، قالتلي معاك فين ما تروح  ده كلامنا سر بنا، حب لا فيه شك ولا إن، من بصة داوت فيا الجروح كانت ملاك وأنا إنسان، معاها بقيت ونسان،  دي عليها قلب، نساني حتى النسيان 

انت اللي زيك لازم يعيش على الأرض، سيب الناس اللي تستاهل تتحب، ف القلب،  تتشال وكمان ع الراس لما في الأساس، انت مالكش في الأحساس سيبها وأبعد  ملكش في الطيب قسمة، ولا تستاهل حتى بسمة من قلبنا يحرم عليك قربنا  ده الحب ألفة وجمع، وانت فرقه وقسمة شخبطة عملت راسمة، حتى لو كانت ورد انت اللي زيك عمره مايقدر أي ود، يتعامل عادي نعجب بيه جايز، ولو عايز، تحبه لأ مش للدرجادي ده واحد عادي ، وأقل كمان من عادي زيه زي أي حد

أنا اللي بحبك بتلون، كده كل يوم بلون، بتقول جنان  بس الجنون في حبك أنت عين العقل،  أنا في راسمك بتفنن،وأحط لون على لون،ومنيش فنان  بس معجون بحبك ده انت حلو بشكل، ايه الجمال ده كله، طب حد يقوله، ده يتاكل أكل  ايه يا حبيب عينيا، راعي حالتي شويا، كده على الأقل  ايه أخره الحيرة ديا، دي هتقضي عليا، ومش لاقي حل ليه ببقى مبسوط، ورعشة خفيفة بالصوت، كل لما يهل 

كان نفسي انتي تحبيني، نص ما بحبك  ايوة انتي بالذات من وسط كل البنات،  قدام عيني كتير وهي مش شايفة غير، كده قلبك... كل فرحة هتعشيها مع غيري مزيفة  مهما فرحتي فيها وحسيتي بالدفا  يوم يومين وتخلص حلاوة البدايات  وقيمتي هتعرفيها لما تدوقي الجفا  ويشوفك زي أي حاجة من الحاجات ده لو بتحسي انتي تجيني، وتقولي بحبك  مين ممكن يعمل أكتر ما أنا بعمل، ماشي معاكي المشوار وفي قايمة الإنتظار، حاطاني جنبك... 

ومين غيرك يتقاله ياقمر، ومين يستاهل الحب ده، والله لو حتى الحب ما أمر، كنت هحبك برضه كده اللي زيك  يستاهل تجيله الدنيا كلها تحت رجليه، وانتي بقى تختاري منها كل اللي تحبيه، اللي عندك  شاغل قلوب كتير وبتتمناه وبتحلم بيه، بس كان من حظي تختاريني أنا وتحبيه،  يا أم قلب معمول من دهب  جماله يبان مهما حاولتي تخبيه  ومين غيرك يملك ع القلب، وينسي حبيبك اللي فاكره، ده انتي اللس حليتي الحب، عليكي بحمد ربنا وشاكره  مين غيرك فكري وقوليلي، يملى حياتي كلها أفراح،  مش هتلاقي غيرك صدقيني، أتعب ليكي وأبقى مرتاح 

خلاص أنا اتأكدت، مكتوبة عليا الحياة ديا، من يوم ما اتولدت  خلاص أنا واثق، هكمل كده مع نفسي أنا، ياقلبي اتماسك وحيد أه وحيد، ده شيء واضح أكيد، واشمعنا أنا بالتحديد أعيش الحياة لوحدي  كل الناس متجمعين، والأماكن بقلبي فاضيين، ومين يملاها مين أو حد عليهم يعدي لو اتولدت من جديد، الحياة ديا هي هي،  مفيهاش أي تجديد راضي أنا بقسمتي، بشوف الوحدة زي واحدة، مالية دنيني وحيد آه وحيد، وهو ده الاحساس الأكيد، قلبي سافر لبعيد وبدعي مرة يزورني  مبسوط ولا حزين، كل المشاعر موجودين، وفي وحدتي مأنسين، سنهم من سني 

زي الوردة بتفتح على ايديا، كمية براءة مش طبيعية  حاجة حلوة تفرح كده فيا، ربنا يحميكي ويخليكي  قطة مغمضه بتشوف الدنيا، من أول وجديد بعينيا زي غنوة بتتغنى بس ليا، سامع لحنها في عينيكي ده مفيش كده أبدا، واللي زيك موجود ازاي أصلاً، يا أحلى من الحلوين  أنا فعلاً بحبك جداً لا مفيش كده احتارنا، طلعت هي ملاك واحنا دورنا، وسط البني ادمين  كنا في حالنا وحبها غيرنا زي الفراشة الجميلة وهي طايرة، وبجمالها تحلي الدنيا دلالها مش زي أي واحدة تانية، وأنا شوفت ده بعيوني  هي عاملة زي البسكوته رقيقة، تعشقها في أقل من دقيقة زي كده وهي دي الحقيقة، هشيلها والله في عيوني

أنا أكتر واحد حبك، خاف كده على قلبك، من قلبه ومنه  عيونه ليكي حنوا، ولا مرة بيكي اتهنوا، ولا شافوا حبك قلوب البنات فيها العحب، تموت في اللي عليها قلب، قلوب البنات عايزالها قاموس، تجري ورا اللي عليها يدوس، واللي مات فيهم ولا عجب، في قلوبهم كل شيء معكوس، أنا أكتر واحد اتمناكي، مستعد عمره يستناكي، ولو الصبر طال  هو عنده آمال، مع إنه ولا مرة طال، ولا هيطول عينيكي  أنا اللي واقف معاكي، الوحيد قلبه ما اذاكي، كنت دايماً الحل  وانتي بتحبي الكل، وليا مفيش صباح الفل، كان ناقص اترجاكي حلمت باللي هنا وهناك، وأنا اللي تملي معاك، بس عنك بعيد بطل عندك أكيد، في الضيقة بالتحديد، سابق أنا خطاك 

يمكن تشوفني مش مهتم، وأنا بسأل عليك وأطمن، تشوف نفسك مش مهم، عندي حبيبي و تتجنن  صدقني مش بكدب ابدا، انت أكتر من حبيبي، اعذرني معلش ده فعلاً، كده طبعي وعيبي أنا مابقدرش أعبر، بالكلام عن احساسي، والكلام هيفضل كلام مش أكتر  عيبي عامل فيا عمايل، خليها بجمايل حبيبي قدر أنا مقدرش أصبر، وأشوفك كل ناسي،  الحب جوة القلب عمال يكبر بجري وبسابق وهبقى لايق، عليك يا رايق ليك بحضر  كلامي القليل مش معناه، انك عندي زي الباقيين، قبلك كنت في معاناة، بتحسن معاك بكلمتين  حبي ليك مالوش مثيل، والأهتمام زايد عن الحد، بس مش بابين التفاصيل، بس انت مش اي حد

كل واحد فينا لأقرب مالينا، مهما بيحكي اللي جواه وياخد راحته فيه أسئلة متنفعش إجاباتها تكون بأة بننكر الحقيقة منعرفش، ولا بنكدب على نفسينا بنخاف نبان قد ايه احنا ضعاف اوي في الحياة بتحبه لسه، لا مبحبهوش، تعرف فلان لأ ما أفتكرهوش ده فيه ورا كل أفكار قصة وحوار الجرح واجع، ايوة بس نسينا، ومنه زمان احنا عدينا  واحنا من جوانا نار وحيرة ومرار لا يمكن عينينا تفضح فينا، بقى سهل أوي التمثيل على كل اللي حوالينا مهما الدنيا علينا تميل احساس الضعف يكسف، يزيد الضعف لو حكينا  لازم نبان جامدين لازم كله يبقى حلو وجميل 

أنا ليا حكاية في كل مكان،  ولو مر الزمان، هتفضل حكاياتي جوايا كان ياما كان، بحكيها للي معايا، حكايات ملهاش نهاية، بس ليها عنوان فاكرة يا مطروح، كنت بشكيلك بقلب مجروح، وروحت لدهب، اللي عوضتني عن كل يوم ذهب، وإسكندرية، كانت الطبيبة العالمية اللي عملتلي عملية، عملية القلب المفتوح... آه يا بورسعيد، فرحت فيكي ومحستش اني وحيد، متنساش الأقصر، حبي عمري اللي فيها وعليا أثر، اما الإسماعيلية، لما الدنيا جت عليا طبطبتك مش عادية، رجعتني واحد جديد... مقدرش يا غردقة، انسى دي جمايلك عليا مغرقة، وارتاحت يا شرم، فيكي بعد طول اللف والبرم، يا سيوة انتي، تملي احلى احساس كنتي ولسه برضه مازلتي، وكفاية تحلوي بقى...  ولما آن الأوان، كان أجمل لقا فيكي يا أسوان، روحتلها بالأحزان، رجعتني من تاني إنسان، ومفيش غيوم، زي طير على وش المياة بيعوم في الفيوم، والسما كلها ألوان... 

بنظرة عين هي بتندهني، من بين العينين قالت فرقني، تركت لي دليل بيه تعرفني، كان وصف الشكل زين.... وانا شايف  والطعم فراولة أو تين.... مش عارف  لمسة واتنين العسل ماسابني، وما بين البنين طعم غرقني، وكأنهم سيفين حدهم قسمني، يا قلبي بتبص حواليك، وتقول وحداني  والوحدة منين تجييك، وهي كده حباني  ياللي العين عليك، وبتقول نسيانى  مش برضه دول ايديك، هي اللي لمساني خلي الايدين جنبيك، دي اللمسة سحراني مقدرش أنا أنكر ليك، انها بجد عجباني  لو عليا أنا أوريك، حاجات تاني ده مفيش غير عينيك، هي اللي حكماني القمر فين الضلمة تخوفني، قمت بالكفين ضمتها لحضني، من الياسمين وريحته عرفتني، فاغرقت أنا بين تلين.... من الدهب  كأني كنت في يومين.... حصاد العنب  دول عنقودين ياللي شايفني، اللي حيلتي حبتين بس وفتشني، سيبهم متعلقين بلاش تكشفني، وكأنهم سرين لحرب كونية، الحل ف الشفرتين لإنقاذ الضحية، بس الشفرتين ع السن محمية، هي تنسيك ع البابين... الدنيا وقساها ويهرب ازاي المسكين... جوة المتاهة شجرة السنين ليها منحنية، لمسة جلسرين وطيب عليا، حلاوتها للعين تبان ولو متغطية،

ياللي غايب،  تصدق انك واحشني، ياريتك لسه بتشوفني، جوه أحلامك كل الحبايب  ياللي سايب، مكانك في قلبي، ياريتك بس تعرفني، لسه فاكرني وزي دايب  ولا نسيت كل اللي فات، وخلاص حاسبني من الذكريات، انا بعدك عن الحب والله تايب  قولتهالك زمان انك أغلى الغاليين، ولسه بقولهالك لحد النهاردة، بقينا بنحسب بعدنا بالسنين، لو انت راضي أنا مش هرضى، ياللي ناسي، أكتر واحد حبك، طب أسأل كده قلبك، وأعرف ليه بقى قاسي  يا كل ناسي، مين ده اللي قالك، هعرف أعيش من بعدك، وأدي لغيرك أحساسي  أنا مستني حلك تعالى، ده أنا والله حالتي حالة ولا مش همك انت خلاصي 

يا مالك أمري مالك يا عمري، عمري ما شوفتك حزين أنا، وعمري ما أرضى أسيبك كده، يا مالك أمري مالك ده أمري، قمري قايد ليل ونهار، عشان ينور لعيونك المشوار دي لو الدنيا مبتديش... كل اللي بنتمناه، يا ملاكي ميهمكيش... الحلم هنفضل وراه، ده حبنا كافي وبيه نكمل ونعيش  والبرد بيكي دافي ميهزنيش لأ أوعى مرة تخاف... هنكمل سوا للأبد، وتكون ازاي خواف... وانت ياحبيبي المدد،  مهما الكون حوالينا دار كده وطاف مايقدر ابدا علينا ودي الأعراف

روح شوف مصلحتك، روح شوف سكتك، أنا أهو نصحتك، باللي جوايا صارحتك  خاف على صحتك بلاش تضيع وقتي، وتعملي فيها فتك، وتتغر في نصاحتك، خاف على شكلك  خاف على سمعتك ينفع كده اللي كان عامل فيها كبير، شوفوا عامل ازاي، عمال رايح جاي، ويقولي الصلح خير بسرعة كدة الزمن أهو لف ودار، أنا كنت بجري وراه، دلوقتي سبحان الله، بيحايلني ليل ونهار تعالى طيب وخليني أحكي اللي حصل، أنا محدش هيلومني، عشان كنت في حضني، وكلامك عني وصل أبقى طيب ازاي وعمري ده اللي راح، أنا مش هسامح، جاي تقول نتصالح، انسى مفيش سماح 

يا طير ملون وجميل، ع الشجر واقف عمال يبص، مستني نور النهار دليل، يشق بجناحه السما بالنص، يا طير ملون وجميل، سحرني الجمال ده وتوهت، لفيت من الفرات للنيل، وراه كنت صياد وتوبت، قالولي أوصفه لو تقدر، قولت العشق ده مقدر، في عينيه أنا عاشق مش أكتر ده اللي زيه عشاقه بالملايين  قلبي من الدهب المكرر، أكله بأيدي حبات السكر، والطير الحر عمره ما يقرر يتحبس بقفص ولو سعره بالملايين  يا طير جماله خلاب، بغنيلك نفسي أشوفلك عودة، وقبل ماتقول عليا كداب، ياحلوة انتي اللي مقصودة،

جوة عمرك عمر  بيروح بين التمني وانك تفضل مستنى، من حلقك يروح، مرة طعم المر ويمر عمرك وعمري  ويروح علينا العمرين وبنسأل نعيش مين، يا حيرة الروح، عينيها دم وحمر نبكي على اللي راح  ولا على اللي بيروح  دي عزمتنا الأفراح  على شادر من الجروح  والعزومة لازم تتراح  ولا أي عذر مسموح  جوة عمرك عمر بيضيع في الشوق لحاجات زي الشوك، في قلبك تبيع، من غير سعر  ممر شرف احزاني  أصيل طريق واسع كله براح شاسع، وسريع التوصيل، لمحطة أخر العمر 

ايوة جوة العمر عمر تاني، بص على سنك في البطاقة، ملي عينك، تلقاه مجرد أرقام  تشوف نفسك مختلف بالمرايا، مع حبيبك يحلو من تاني، تملي عمرك، مهما عدت الأيام العمر هو حالنا وحالتنا، يتحسب بالناس اللي حبيتنا،  ولما تتسأل السن كام، يكون الرد بسرعة أوام  بعد ما نعد الحلو في حياتنا، ايوة جوة العمر عمر تاني، جربت تقيسه وانت زعلان،  ركز وحياتك، هتلاقيه زاد أضعاف  لو مر العمر وانت فرحان، هتلاقيه بيصغر بيك من تاني، ماتعجز ابدا، ولا عمرك مرة تخاف 

ده الزعل والخصام، ليه برضه أصول وفيه حساب  لو عايزين نكمل، لو حابين نرجع، لازم نعرف ده من الأول  لو خلصت الأيام، مفيش مكان للوم أو حتى العتاب  هنكون انتهينا، ورجعنا البداية، قبل مانتعرف يوم ما ألتقينا دي ناس بتحب التعقيد، وحياتنا مش ناقصة أكيد، ده احنا فينا اللي مكفينا دي ناس ف الغلط تعيد، واحنا ايه منهم بنستفيد، غير اللوم يجيبوه علينا لو احنا زعلانين، فترة من بعض يبقى بلاش  نقفل كل البيبان، ونحفل في القعدات، وبسرعة اللي جوانا يبان  وكأننا عدوين، ولا بينا عشرة وعمر أتعاش  طب وهنعمل ايه، بعد مانقول سلام، هنموت بعض ولا ايه

بتسألني بحبك ليه، طب أقولك ايه ولا ايه،  ده كلام مقدرش عليه  حبيبي الحياة معاك حاجة تانية قلبي حبك ماليه، عارف انت بالنسبة لي ايه، زي طفل وانت كل اللي ليه  مينزلش عينيه من عليك ثانية تحبني عن طيبتك اتكلم، ولا بلاش دي ميكفهاش كلام، حتى جمالك عن نفسه بيتكلم، حقيقة واضحة مفيهاش كلام بتسألني طب هرد عليك، وأقول وأعيد في نفس الجملة، بحبك ياعمري وبموت فيك، وبحبك دي تبقى أقل كلمة

مكنتش عارف إني هقابلك، بعد السنين دي كلها، ونقعد سوا وتسيبني أطلبلك، القهوة اللي بتحبها، مكنتش قاصد إني أعاتبك، بعينيا أو كلمة قولتها ولما عليك ندهت، وبالغلط قولت، أخبارك اية حبيبي، لقيتك انت ساعتها زعلت  مبقتش عايز تقعد، ده مجرد تعود، ما انت برضه حبيبي، ع الكلمة دي أنا متعود كمل قهوتك وأمشي، أسف معلشي، خليك عارف حبيبي، الكلمة دي لغيرك متقالتشي مكنتش عارف إني هقابلك، بعد السنين دي كلها، وكنت فاكر لسة في قلبك، ليا مكان من وقتها، مكنتش عايز حبيبي اضايقك، كلمة اعتبرني ولا قولتها

وفي عز البرد بلقاكي دفا، وفي الربيع حضنك بساتين  وزي نا القرب دوا للجفا، حبك ليا عوضني السنين طاير طاير قلبي بيكي فرحان، وهلت البشاير، لما حبتني زهرة الياسمين  أنا من الهنا بقالي كتير عطشان، ونجمة من السما، سقتني من ايديها الحنينين ياريت بنا يدوم الغرام، وتدوم الحنية جوة العينين  طبطبتك عليا من غير كلام، بتهون الأيام الصعبين وعد عليا أحافظ عليكي، وأعوضك قبلي اليوم بيومين  بدعي ربنا انه يخليكي، ليا يا نجمة عالية جوة العين 

عايز قدام الناس تبين، انك زي الملاك حنين، وأنا اللي جاي عليك  طب تمام اتفقنا على ديا، كلامك صح مية في المية، وقول اللي يكفيك أنا الظالم  قولها قدام العالم، وربنا لوحده العالم  مين اللي جرح مين  أنا الظالم  قولها قدام مرايتك، لو هتلقى فيها راحتك، هتروح من ربنا فين يلا في كلامك كمل، وزي ما وعدتك من الأول، مش هقول غير آمين  مش مهم عندي كلامك، المهم أخلص من أيامك، وارتاح من هم السنين 

يا واهب الحب للقلوب، في الدروب وفي البيوت، وفي طريق سفر أو ساعة سهر، بالحظ والنصيب، سهمك ياحب يصيب، رزقك ياقلب أتعرف ياللي غنايا واصل عندك، عايش زي كده لوحدك، في حد هنا اللي هو أنا،  هيديك قلبه سلف  ويقولك بالهنا عايزه سنة،  او حتى اتنين براحتك، ده ضمان مدى الحياة، كل اللي عايزه هتلقاه،  المسؤل أنا وأهو على ده حلف  يا عايش حياتك تستنى، مرة تتهنى انا موجود،  أنا بدور عليك أعمل اللي عليك، أحضر يا غايب  بالسلامة أنا دايب، والعلامة بقلبي تتعرف 

انت جاي تهزر، ولا بتستظرف، أنا عايز أعرف  وأفهم هو في إيه  انت واحد عاقل، ولا مجنون، ازاي عايزني أكون  لسه بحبك وليه ده احنا استنينا، اوي المانجا، من شجر زينة، أدعي وأتمنى  وأصبر ياقلبي وقلبي يصبر وشجر الزينة هيطرح ايه  فتحنا ايدينا، وقولنا نستنى، ولما فتحت عينينا، ملقناش الجنة لقيت نار طلعت ياقلبي..... ولا بلاش اقولها دي  بتعمل زي التاجر، لما يفلس، يقلب في الدفاتر، ويفضل يغلس في اللي رايح في اللي جاي وفي كل واحد كده حواليه  قلبي ياشاطر، شطب خلص، الحب على الأخر، وممكن يتقمص دور الحكومة تعالى نتحاسب ونشوف كل واحد عليه ايه

أنا مفيش مني اتنين وقولي فين، تلقى مجنون وحنين حبتين، كلمته كلمة شرف  أنا شايل اللي حاببني، جوة مني، ازاي أخون نفسي يا ابني، محدش ابدا عرف أنا مختلف  في الطريقة والطباع، وفي الحب أه طماع، مكدبتش أنا معترف  أنا مختلف  كده عن كل الناس، قلبي عايش بالاحساس، مواعدش مرة وخلف بأختلافي أنا مميز، وتقدر تميز، بين الناس وتشوف وتفرز، اللي ماشي زي الألف  أنا كده زي تركيبة، تحسها مريبة، عايش مخلص للناس القريبة، وعلى حبهم قلبي حلف 

ها وبعدين، طب وايه كمان، سمعني الكلمتين، اللي بسمعهم بقالي زمان  ياعم قصر، اوبا نزلوا الدمعتين، عمل متأثر، والشويا بتوعه والحبتين انزلي بأسطوانة انك بتحبني، واستحملني شويا لو بتحبني، وهو انت لو مش تهمني، كنت عليك أنا أستنيت  انزلي انت وفي عيني بص لي، مش أنت برضه اللي قولت لي، دي اخر مرة وسألتني، بحبك بجد وعليك رديت غاب يومين، وجاي يقول وحشتني، لو بحب اتنين، مشوفش اللي فيه عيشتني  عتاب وخلص، قالي الحب فين، ومني اتقمص، انت حبيبي تستحملني سنين 

لو شوفت عيب واحد فيك، لا يمكن العيب يكون فيك، هيكون العيب في عينيا لو سمعت كلام من حد عليك، لا يمكن أصدق همسة عليك، ده يكون أخر يوم ليا ده مش كل يوم  هقابل حد زيك، ناس تصوم وتصوم، ولا عمرها تقابلك  تحلم بيك ف النوم وأنا بنام وأقوم، كده كل يوم، ألقاني هنا جنبك سيبت ايه لكل ملايكة الجنة، وأوصف بأيه اللي شايفه بعينيا ولا يكفيه كل الأغاني

جاي تقول أسف، طب وأسف على ايه، على القلب اللي في حبك ضاع  على الأمان اللي لقيته أوجاع  عايش هو خايف، من كل يوم بيعدي عليه، أمشي وميهمكشي  القصة ديا، هكتب أنا النهاية بأيديا أمشي ومتفكرشي  تاني فيا، سيب كل حاجة عليا وأنا من عينيا ديا قبل ديا، هشرفك متخافشي روح وقول أناني، وجيب عليا كل اللوم، مفيش حد ولا أنا هنراجع وراك  نفس اللي هتقوله أنا هقوله معاك  مفيهاش كلام تاني، أنت أشطر واحد يلوم، 

قاعدلك  أنا وبخطط، في الخطة وبتكتك، وعقلي قرب يفوت  مشاعرك  حاجة تلغبط، ليه الشتا حر، وفي عز الصيف بتكتك انا كنت فاكر مليش حل وشاطر فاهم في الجمال وللعيال بذاكر وده كله انتهى لما شوفتها رقة كلها مخاطر لا ع البال ولا ع الخاطر طب أعمل جميل وللتقيل خاطر دي كلمة بحبها بتكه قولتها سهران لك  أنا ياقدري، كده كل ليلة، وبصحى الصبح بدري  اتلكك  واشوفك معدي، ولا ترمي السلام، خلصت مني كل حيلة 

خلصنا خلاص، حكايات بنا وبين ناس، كانت أحلى لمة، والفرحة فيها الأساس  خلصنا وانتهينا، النهايات دي مش بايدينا، نتمنى لهم السعادة، زيادة من بعدينا لا بنا مشاكل ولا مصعبين المسائل، هي دي سنه الحياة كانت فرصة سعيدة وفرص جديدة، الفرح معاها جيباه  فاكرينهم بالخير ومفيش في قلبنا غير، بس اللي قولناه خلصت الأيام، ومفيش بنا غير الإحترام، لا اتكلمنا عليهم، ولا ليهم نية الإنتقام 

الدنيا فيها ناس كتير حلوين، يستاهلوا بعض، للقا محتاجين  الدنيا فيها ناس دايماً واضحين، معانا ع الارض، بس قليلين  الدنيا فيها ناس وناس تانيين، فرق السما من الأرض، معانا عايشين الدنيا فيها وفيها، صوابعك مش زي بعضيها، فيه ناس عينيك تديها، ولا يرضيها الدنيا فيها وفيها، لقمتك الهنية يفرحوا بيها، قلبك قصر مالي عينيها، ويكفيها كل اللي عليك فيها، تختار تعيش مع مين الدنيا فيها الحلو مالي العين، بنقفلها ليه، ونقول هو فين  الدنيا فيها الأمل مرفرف بجناحين، فارد ايديه، احنا اللي ماشيين  الدنيا فيها الشر وفيها الزين، كله باين بعينيه، احنا ليه محتارين

جولك وحكولك عني حاجات وانت صدقتهم  جولي و حكولي بس في ثانيتها انا سكتهم  وسيبتهم بسرعة أوام ومشيت  اللي قالولي مش بيحبك انا عليك راهنتهم  ثقتي فيك كبيرة خليتني عمري ما أسمعلهم  وخسرتهم في وقتها ما استنيت  أحلفلك بأيه إني مخلص ليك، أحلفلك بأيه  عشان يمكن تثق فيا  لو مش بحبك هتمسك ليه بيك، وانت بتصدق كل حرف يتقال عليا  مش قادر أفهمك ليه بتعمل كده، ولا قادر أفهمك  انك كل اللي ليا  لو تفتكر دي مواقف كتير ممكن تثبتلك  بس انت مش عايز وخايف على شكلك  وانك تقولي حقك عليا  بتعب لما بشوفك بتصدق ده و ده، بتصعب عليا نفسي من حبيب عينيا 

مش مهم الشكل ايه، طب والاسم مهم ليه، ده لما بنحب بنعشق قبل الملامح كل تفصيلة اللي حبوا أسألوهم، ليه بتحبوا اللي بتحبوهم، نشوفهم عادي وهما شايفنهم حاجة جميلة للحب عظمة وللشوق معنى، غير كلام الشعرا والمغنى  وتسألني طب ليه وأشمعنا، هقولك هتعرف لما تحب  للحب عظمة ولهفة للمواعيد، ف الكلام تعيد وتزيد لا تمل ولا تدور ع الجديد، غير كده ده مش حب  الحب 24 قيراط، بس مش في كل أرتباط مش كل اتنين ما بينهم حكاية يبقوا مغرومين الحب ده حاجة تانية، العمر يعدي في ثانية وياما كتير عاشقين مع ناس تانية مكملين 

بتقول هي تعبت وملت خلاص، مش عايزه تعيش تاني معايا بتقول مش حاسه بأي انجاز، وانها حاسه لحد كده وكفاية أسمعي ياروحي ومش غرور، مش هتشوفي في نص هوايا هفضل في قلبك، مهما عملتي، حبيبتي ده أساسي  وكده كده، مهما انتي حبيتي مين  هفضل في عقلك، مهما حاولتي، وقلبك يقول ناسي  لده و ده، محدش هيصدق ثانيتين بتقول هي هتبدأ حياة جديدة، وخلاص نسيت أيامنا اللي فاتوا بتقول وبتخلف مش هتعيش وحيدة، ده كتير بيتمناها وعليها ماتوا وانتي لو روحتي لأخر الدنيا، هتعيشي تحلفي بقلبي وحياته

شايفة ايه فيا، بتحبيني أنا طب أشمعنا، المغنى ده ليا، ولا فيه حاجة في سمعنا شايفة أنا المطلوب، صدقيني أنا بجد مصدوم، واليوم بقيت محبوب، فوقيني لو كنت موهوم أنا الكئيب تملي  أنا اللي قلبه ولا مالي، أنا اللي الكل باعني  لقيتك انتي شارية وفرحة قصداني جاية، نست قلبي اللي واجعني  شايفة شخصية، معرفش انها موجوة عندي،  وعندي حسباه حرية، وانا مسجون جوه وعدي  شايفة فيا حسن، و رومانسية  كدة في عينيا، وهي الحقيقة حزن، وانتي شايفاه حاجة تانية 

صاين الوعد باين البعد، نساه  ده حلف بالله، بالأرض وسماه  وكل الحيطان ليها ودان  كانت سمعاه وعليه تشهد هصون ياحبيبي وعمري ما أخون  لو الكون أتهد وعدنا هيفضل ويكون  ومصانش الوعود غير الحيطان  ده الطوب أحن من كل القلوب، أصيلة كل حاجة مفيهاش روح،  كاتم السر ياعيني كان عايز يبر، ويعمل خير بس فاضيه الجيوب، خيره إنه يحكي ويقول ويبوح،  ده البحر الهايج أحسن من البر، اللي عليه ناس وحوش عايشة، ده القرش عن نفسه عمره مقالش، ولا كتب عن طيبته قصايد شعر،  ولا التعابين بسبح قاعدة وفارشة،

أطمن كده أنا هنا  أنا أنا، جنبك وخلاص مش سايبك  أطمن بقى قلبي ألتقى  كل الشقى، عنك وشايل هم قلبك أنا ليك هكون، أرض وسما، هغنيك عن الكون، وهكون حامي الحما أنا هنا موجود، تتكلم أسمع، ومفيش أي حدود، للمجهود عشان تدلع  انت ليه قلقان، كدة أزعل، من ايه حيران، تعبان حضني أجمل انت أوعى تخاف، انت في قلبي، الخوف أهو خواف، وشاف قد ايه حبي

اللي بيحبك عمره مايسيبك، واللي سابك  عمره ماكان حبيبك، ولا تزعل ابدا عليه  أفهم بقى ياقلبي وسيبك، أفهم بقى  ياقلبي وشوف نصيبك، هو العمر فيه قد ايه كل حكاية بتبتدي مش عارفين على ايه هتخلص  ده العمر بيزيد صحيح وفي نفس الوقت بينقص  اللي عايزك بجد في كلمتين حبه ليك يتلخص  وقت الحزن هو قبلك وقت التعب شريك في ضهرك انت مش محتاج تتحايل، على حد وفي همه بداله شايل، عايزك بس تهتم بيه  باين في عينه وقلبه قايل، كلام بجد زي حاله كده كلام مايل، خايف يواجهك بيه  دي أي علاقة بندخلها دايماً في أولها بنشوفها جميلة  ومع مرور الوقت تفهم ايه هي أخر الليلة  تعرف اللي بيحبك ومشاعرك يستاهلها من بس تفصيلة  تملي صاين هو بوحك بيعامل روحه زي روحك 

نفسي في يوم، منعملش فيه حاجة، وجودنا مع بعض يبقى كفاية، أنا نفسي وعارف انتي برضه محتاجه، ليوم تبقى فيه ذكرياتنا حكاية، نحكيها لولادنا قبل النوم بحلم بيوم يكون بتاعنا احنا وبس،  نلف الشوارع، رايح راجع، ونروح أماكن، ما نعرفها ولكن، مادام مع بعض مايهمنا غير ببعض نحس  بحلم بيوم يكون بتاعنا احنا وبس، ناكل تين، ونفضل ماشيين، و نشوف خطوتنا، لفين ودتنا، نطلب من الدنيا تدوم في قلوبنا الشمس  نفسي في يوم نوقف فيه شويا عقلنا، نرتاح كتير، من التفكير، وبلاش نتكلم، نبص ونتعلم، ازاي نقدر نحقق ويحضر مرة حلمنا

ماتيجي نحب تاني، يا قلبي مابلاش، تقدر تقولي كان ايه، حلو في اللي أتعاش  مش لما حبينا أولاني، يا قلبي ماخدناش، غير تعب الليالي آه، وخسرنا مكسبناش حبينا أبو قلب طيب، اللي الدنيا ظلماه، وأول ما بقى قريب قام علينا أتكبر، وشافنا حلم صغير، من اللي عينه عايزاه  حبينا أبو قلب محير، كل القلوب حواليه، طبيعي معاه نتغير ننسى طيبة زمان، وننسى لقلبنا عنوان، وتعبنا كتير بعديه 

طب هي السعادة  ليه محتاجه لورق  تصريح وأذن وأمضى وختم  هي دي بطاقة! ده احساس ياناس  ولو مستوفي الشروط  طب فوت علينا يانجم  بكرة عشان ملفك أتحرق دي سعادتنا جوه قلوبنا، مش دوسيه ولا ملف،  خد أول ملف يلا نوريهم سكتنا ونفرح قلوبنا بأيدنا  عادي من سعادة اللي حواليك تنقل وتشف، والهم يخف لما يسمع ضحكتنا ترن والدنيا تجيلنا بيشوفوا السعادة ليه كالعادة روتين  ومهما تعمل هو هو الرتم  تلقى طاقة كبيرة في التكشيرة ايه اللي جابك  هنا جنابك ده القسم   واخد أجازة لمدة سنتين

ده كل يومين يجي ليا، يفضل يصالح و يتحايل عليا، ياعم خلاص ما قولنا نسينا ياعم خلاص مش سيرة هي  سايق عليا طوب الأرض، قال ايه عايز نرجع لبعض، والله خلاص مش هينفع  أه والله أنا استحليت البعد أحب أقولك كالعادة بطل بقى ساذجة، أيامك مش هحن لها لو الحب عندك بزيادة وانت مصدر السعادة، فالله الغني عنها عشت بعدك حاجات أحلى من اللي فات، مين فهمك إني ندمان أيامك شيلتها من راسي لا بعاني ولا بقاسي، ولا ترجع يا زمان 

بحبه وهفضل لحد أمتى مخبي، يا قلبي ممكن حد يخطف قلبه، حواليه كتير يتمنوا له الرضا يرضى، ولحد النهاردة هو محدش عجبه جايلك ولعينيك هقولها، بحبك قد الدنيا بحالها،  بيهرب كلامي مني، غصب عني مش بيدي  بحبك في كل حالاتك، هعوض أنا اللي فاتك،  قريب هشوفك بحضني، ده محدش هيحبك قدي    دي فرصة لو ضاعت انت هتزعل، هتوصل لفين ده الحب زي البورصة، حلم عمرك هتنول له جمد قلبك،  قولها بحبك ما أكيد هي حاسه 

أبص لروحي ألقيني مضايق، أشوف أموري بجد أستعجب، بيبعدوا ويبعدوا كل ما أقرب، الحزن ده عليا ابدا مش لايق عايش أعرف عن الفرح بالسمع، ورفيق العمر كان الدمع  كل ذنبي حبيت قلوب، كانت تماثيل من شمع   ليه الحب ليه ناس وناس، هما يحبوا يتهنوا تملي، وانا الحب عمره ما ملي، وبضرب أخماس في أسداس ليه عايش أنا وسط متحف، فيه تماثيل وشويا موظفين، كام أمضى على حبه روتين، وقلبي على مشاعرهم أتشحتف

ما كفاية حلاوة بقى كفاية، مش مصدق نفسي وانتي معايا  كل ما أشوفك تضحكي ليا، أدعي تدوم الضحكة ديا لملا نهاية شوفتك حبيتك بشكل مش معقول، مش عارف صاحي أنا ولا بحلم، دي لو الدنيا حلوة كدة على طول، طب ما كان حد يقول أو يتكلم، ايه الحكاية لسه احنا ف البداية، ده جمالك ده لوحده آية على طول أنا معاكي في أمان، الجنة في كل مكان وانتي معايا الشوق خد قلبي معاه لفوق، من الحلم ده مش عايز أفوق، زودي الحنان على قد ما تقدرى، منين ما تحضري الدنيا تروق شوفتك اديتك قلبي المقفول، وكل حياتي ليكي مسلم، الحياة أختلفت جوة العيون دول، والضحكة لما تطول في القلب تعلم، 

بيقولي تعالى يا حبيبي نعيش العمر، نعيش اللي فاضل فيه، موافق لو هتجيب لي بدل العمر عمر بيقولي تعالى نعيش ولو فاضل يوم، وهيتبقى لنا احنا ايه، بعد مانشيل وقت الحياة والنوم على ضهر أسرع فرس، ركبت كل الفرص  وخرجت في البراح، ضربت جرس المرواح  تعالى لو تقدر، أحضر وحصلني  صدقت أنا كل الأماني، فا راحت لحد تاني  بسرعة زي القطر، لا عطل ولا ساب سطر شايفه بيقول توت، وبيفوت دايسني بيقولي تعالى يا حبيبي الدنيا ألوان، دي أحلى كدة من الأسود،  وأنا علشان أنسى زمان محتاج لزمان

يا بحر أبيض متوسط، عايز حد يتوسط، ليا كدة عندها يا نهر النيل بيجري، يروي بحري وقبلي، ولا يستغنوا عنها يا سبع قارات العالم، ربي وحده العالم، قد ايه بحبها ياللي واخد الحسن حصري  كسبان في المقارنات، ياللي قلبك جنتي وقصري  يا ملاك بجناحات  يا مكاني يا أماني يا عالم تاني، عشت فيه أساطير، يا عنواني وأحلى من كل الأغانى  خلتني بقدر أطير يا كل جبال الأرض، هنفضل احنا لبعض، ولحد أخر عمرنا يا زهرة البستان الخضرا، لو ايه حصل هرضى، قلبي مسلم أمرنا يا طير حلو وملون، عمال فينا يجنن، ويشغل تملي قلبنا

وايه أخره السفر وطول المشوار، الولد اللي عاش ١٠٠ حكاية، بص معرفش نفسه قدام المرايا، كان العنوان لقصته سؤال محتار المحبوب مش محبوب  ولا عند الغالين أتحسب  عملوا من الفالسو، أشي فضة ودهب  خد جرح ورا جرح  ملحقش يبلع حتى ريقه  مالوش مكان وسطهم، دي المحبة طريقة يقلب في دفاتره أسامي أحباب، يفتح حضنه ياخده بالحضن حزنه، الحبيب مكنش حبيب خاب ظنه، قلبه حبسه قفل على نفسه الباب  ده بنى الولد لأحبابه جواه قصور، عاشوا فيها بس عاشوا مع حبايبهم، عمل لهم قلبه جسر يمكن يعجبهم، سابوه ما صانوه وقت ما كان مكسور

يا أميرة قصر الجمال  لو عاد بيا تاني الزمان  هحبك مرة تاني كمان  والقصة من تاني أعيدها يا حلوة زي أفروديت  ياللي في جمال نفرتاري  قدام جمالك ولا نطقت  اتاري حبي كان مداري  أعدلي الحال وبحبك حسسيني  لو مرة تلمسيني تزلزليني  ياللي مولودة من النحوم  والقمر هو والدها واحد من الراعية، طلب ايد الأميرة ركب الفرس عدى الحرس، وعدى الأسوار الكبيرة صوبوا ناحيته السهام، للخطر رنوا الجرس  يجروا هنا وهناك، دربكة في قلبي القصر كهنة أقاموا الصلوات، من الفجر لحد العصر فات الأوان و ياهناك، أصل الأميرة في حبي  وقعت أسيرة يا أميرة ليكي متداين  حبك ليا مش هاين  مش مصدق اني بعاين جمال ما ورد على ملاك  يا أسطورة زي ايزيس عديتي ف الجمال فينوس  تتاقلي بالغالي والنفيس  ما يكفي فيكي النص  عشانك أحارب جيوش وحدي  وابني مدن جديدة بيدي  واعملك من الضلوع  دروع هي فداك 

وانت كنت فاكر ايه، لما تسيب ناسك حواليا  حتى لو فعلاً بيحبوني، ده ممكن يهون عليا قولي كنت فاكر ايه، اغمض مرة وأفتح عينيا ألقاهم عرفوا ينسوني، بقى هو ده ظنك فيا القرب يا حبيبي تحسه القلوب، حتى لو بينهم مسافات،  والقلب يا حبيبي بعدك يتوب، يعيش بس ع الذكريات،  يا حب خالي من العيوب، يارب يرجع تاني ليا  بجد حبيبي بعدك جننني، متقولش عادي بتحصل، البعد حبيبي قدر يغيرني، وأخباري أكيد بتوصل، وبعد حبك ايه يفرحنى، رد عليا يا عزيز عينيا 

عيني منها البنية ديا، أم العيون حلوة عسلية حلم عمري قصاد عينيا حني ياعمري ردي عليا لو كان على الجمال،  بصي لقلب الرجال،  هتختاري قلبي تكسفي وتخبي وتحبيه  لو كان على الأدب، قلبي بسهولة أتغلب، متربي ع الغالي حتى تعالي وفتشيه  لو كان على الاخلاص، أسألي عليا الناس، عمري ما أخون ولا هكون ابدا يا بيه  لو كان على الكرم،  الإجابة طبعا نعم، اللي في جيبي كله لحبيبي يتهنى فيه  انا لا بعاكس ولا ليا، لحركات الشباب والملاغية كل الموضوع شوفت الحنية ماشية بكعب عالي شويا 

لما عرفت حقيقة مشاعري ليها، وإني بجد بحبها وعيني منها، زعلت وقالت هبعد في وقتها، مع إني مطلبتش من عينيها، غير تسيبني أحبها زي قبل ما أقولها راضي أتعلق في حبال الهوا الدايبة، محدش عارف الدنيا لينا ايه جايبة، على الأقل أنا واضح وصريح،  حبيت قولت كان لازم توضيح، نخاف من اللي بيحبونا ولا طالبونا غير بشويا تقدير لقلوبنا المحبة لما قولت حقيقة مشاعري ليكى، كنت بحاول أطمنك وأقدر أفهمك، ثقتك فيا بمحلها واني مقدرك، مكنتش برمي حمل جديد عليكي، كنت بس بقربك مني وأعرف أسعدك 

عيني عليها هي وبس، وامتى بيا مرة تحس  أحساسي بيها معدي السحاب  عيني مش شايفة غيرها، دي مشاعري ومش هغيرها بتمنى نبقى أكتر من صحاب سرحت بالخيال وشوفتنا في بيتنا، وكملت بتفكيري قصتنا،  طب انتي عارفة هتبقى حكاية في منتهى الجمال  على بعض لايقين وبشهادة صحابنا، ولو نسيب مرة احساسنا، ياخدنا معاه في خلال بس يومين هنكون حبيبين تحبي أتغير عايزة ايه فيا، والله وعد عليا، ما ارد لك كلمة وكل اللي عايزاه أعمله وأكتر سبيني أقولك بحبك قد ايه، وعارفة انتي ليه، لأن مفيش في الدنيا حد عنده قلب وي قلبك 

عامل فيها رومانسي بالجامد، بس هو في الحقيقة قلبه بارد، ده لا يمكن يكون كسوف، أو حتى يبقى خوف، ده طبعه و بقى معروف، ما أنا قلبي جرب وحكم أعمله كتير حاجات تفرح، وهو ثابت زي الصنم  أقعد أتكلم بالساعات وأشرح، ماترد عليا يقول نعم  نشوف فيلم نروح مسرح، طب أغنيلك فجأة يسرح  عشان يفوق عايز ١٠٠ قلم  عامل فيها أبو قلب كبير، وهو في الحب صباح الخير، مابنش عليه ولا مرة شوق، ولا حلو ولا وحش تدوق، مع إني بكلمة بروق، هو مش مقدر حجم النعم 

يا الله على حسنك، منه يا واد أنا خايف  أنا لو قولت عنك، ما اقول غير قطايف  أحلى من الحلو بشويا، طب ما براحة عليا أنا لو توهت منك، هتلاقيني عند الشفايف سمرا العيون أبيض يالون  القلب بجد قام له الكون  وجن جنون كل الورد حمرا فراولة خسرانة محاولة قدام الخد حدود دولة وأنا لا حول الند بالند سنك كام قولي، ياللي واصل للكمال  غيرتني أنا كلي، ولسه التغيير شغال  ده كل اللي يعرفني، شافني وما عرفني  حيرتني بالحسن تملي، والسر ولا اتقال 

لو هقول وصف دقيق، لحكايتي معاها  هو بالظبط احساس بالضيق، وأنا وياها لو هطول في الشرح، أغنية متكفيش  بالأسم حب والحقيقة جرح، ميتنسيش كانت أحسن حاجة عملتها،  أني سيبتها، وكملت بعدها، وعرفت أعيش  القصة كلها على بعضها،  تتبخص في بعدها، ومن وقتها، الحزن مابيجيش  كل يوم كان بيعدي، عليا في حبها كنت بحس إنه تحدي، ليا مع قليها كل يوم حالتي تسوء، واللوم ميرحمنيش  وجه  اليوم اللي فيه أفوق، وميوحشنيش 

عينك ع السما، ليل ويا نهار،  أشكر ربنا، على كل مشوار، عايش في هنا، حتى لو منهار، فيه غيرك هنا، شايف نعمك الكتار، كل الأيام اللي عدت على خير، والأحلام اللي اتحققت من غير، أي مجهود او منها بصدمة تعود كل النار اللي فضلت دايماً حطب،  والكلام اللي قولته ساعة غضب، ايوة لسه عندك ياحبيبي فرصة كل الأشواق اللي كانت لحبيب،  والفراق اللي لومت فيه النصيب، عمل معروف وبكرة انت تشوف

أغنية  ابقى خلي بالك  ابقى خلي بالك من نفسك يا حبيبي بعدي،  مش كل الناس بريئة، وهي دي الحقيقة، مش هتلاقي زي طيبتي ولسه عند وعدي، أول ما تحس بضيقة، هبقى عندك في دقيقة، مكنش عاجبك عنادي، طيب دور في الدنيا دي، يمكن ملايكة تقابل  وعلى كفوف الراحة، يشيلوك وتعيش في راحة، يحبوك بدون مقابل تقدر تحب غيري حبيبي بس تقدر تخمن، ايه هيحصل لو سيبتك، مش هتلاقي سعادتك، ابقى خلي بالك حبيبي وخليني مطمن، تملي عليك بس براحتك، اللي يهمني سعادتك، لسه بحبك وهفضل، وبتمنى ليك الأفضل، حتى لو بعيد عني  عايز جديد طيب، الدنيا قدامك جرب، وهفضل فاتحلك حضني 

بحبك ليه  يمكن عشان انتي اللي قدامي  يمكن كمان علشان شوفتك زمان في احلامي  بحبك ليه  معرفش السبب بس الأكيد لو في أي مكان جديد انا هحبك تاني بحبك من غير شروط ولا أي طلبات ولا حتى أمل  بحبك عايش مبسوط أنا كل الأوقات مفيش ابدا ملل  وحبك ليه مربوط بتقاليد وعادات مفيش فيها عمل  ده حب جنوني حب افلاطوني يعيش طول الأجل  بحبك ليه  يمكن فراغ جوايا عايز أملاه  يمكن عشان لقيت فيكي كل اللي بتمناه  بحبك ليه  معرفش السبب بس تمام ان اللي بقوله كلام  انتي مش سمعاه

الأيام اللي عدت في خصام، واحشني فيها هو أضعاف، لو عليهم العذاب أضاف، عليا هتخاف وترجعلي أوام واحشتي صوته  سكوته  مع كل دقايق بيقوتوا، قلبي بيقرب  من موته  ولا بغيره أرجع للحياة أيام كتير اتشاركنا الأحلام، واحشني تاني نرجع نكملها، وحدتي صعبة مقدرش أتحملها، وبكلمة تقولها يرجعلي السلام 

يا حب صادق تملي وصديق، وأنا من الصحبة محروم  عايش حياته تملي وحيد، وكل حياته مفيهاش جديد  بكلم نفسي فاهي تقوم، ترد يا منسى من الهموم  الدنيا بتناديك من بعيد، هي فرصتك الوحيدة حبتك  يلا أخرج وأنسى الضيق  وأشمعنا أنا نصيبي كده، الصعب يختارني برضا، والسهل أه كدة كدة، عامل نفسه ميعرفنيش  مع أني أنا طالب الهنا، رد يا الصعب يا مفيش  يا بحر عالي أوي وغريق، بس أنا متعلمتش العوم  يغرق فيه أشطر سباح، يقول المراكبي الصباح رباح  وأكبر سفينة بحرت يوم، مرجعتش المينا لحد اليوم  عايزني أنا أبو القلب جراح، يأمن سكتك يرجع بسمتك  يبني جواك جزيرة وطريق 

ليه بقينا مبنضحكش، غير بس في صورنا  حد يفهمني معلش، مين بس اللي غيرنا ليه بقينا مش بنحس، بحاجة في عز فرحنا ايه اللي حصل بس، اللي عنده رد يريحنا احنا السبب في حالنا، ولا العتب على غيرنا، ولا ايه الحكاية ولا كلنا واحد زعلنا، طب وليه يطول زعلنا، كدة لملا نهاية ليه بقينا بنتكلم، كتير بس عن أوجاعنا وليه مش بنتعلم، من الضحكة في صورنا 

لسه بقولها وحشتيني، لقيتها بتقولي بحبك، وكلمتها بترن وبتسمع  كنت فاكر نسيتيني، في ساعتها ردت بقولك، وكتبتها تيجي نرجع  وأنا مش مصدق، ويادوب هبدأ، بعتت قلوب كتير وأنا بحاول أجمع وكأني بقيت في عالم تاني، و الدنيا كلها مش سيعاني، طب قوليها كدة تاني، بعتت وقالت كفاية هدمع، ايه رأيك في كلامي، طبعاً يا حب نرجع ونرجع واتكلمنا حبة حلوين، قولتليها تيجي نخرج، لقيتها بتقولي هنام  خلينا نظبطها بعدين، قولتلها مش بهرج، هقابلك في الأحلام  زي زمان، فاكره زمان، ردت أيوة فاكره، وممكن كمان أسمع 

كنت فاكر دوقت من الدنيا كل مرها، وقساوة الأيام وخيانة الزمان شوفتها، أفتكرت بقيت أقوى ولا يسكرني سمها، بس كل يوم جديد بتوريني الدنيا الجديد وطلعت لسه برضه بنكسر، وبتعب أكتر من الأول  والتعب يكبر ويطول، مابين أحزاني وهمومي أتأسر كنت فاكر إني خلاص بقيت أحسن، وقد الزمن ودفعت التمن ومش هحزن، وطلعت موهوم أوي وخايب جداً، مسجون في سجن بعيد متكلبش بالحديد واكتشفت حقايق كتير مش أوهام، ممكن تكون قد الحياة أه بس ف الأحلام، كنت فاكر شوقت إيه اخره الأيام، بس لسه بتعب وأتهد زي زي أي حد

ولو كل الناس حلفولي، وقالولي خلاص انك نصيبي، وأقدر عادي أقولك حبيبي، مش هصدق كل اللي قالوهولي يا حياتي وكل دنيتي، أنا لسه عند كلمتي  زي ما كنتي سبب فرحتي، هكون ليكي كل الأحباب  حياتي شايفها بتبتدي، والله أنا قد كلمتي  زي ما كنتي انتي سكتي، هاخدك نعيش فوق السحاب بثقة أنا قد كلمتي، هخاف عليكي من الهوا، هنكمل عمرنا واحنا سوا، اهلا بيكي في جنتي خلاص بديكي كلمتي، هعمل كل وعد أنا وعدته،  هو ده قلبي وهي دي عادته، مش هتشوفي غير حنيتي 

احنا مش هينفع نكمل، مع بعض تاني خلاص  مهما حاولنا نتحمل، مهما سمعنا كلام الناس  بنا حاجة مش راكبة، فيه مرارة في الاحساس  لا حابب ولا انتي حابة، نكمل بس قصاد الناس ما كل اللي سابوا بعض، كانوا بيقولوا بنحب بعض، بص دلوقتي عليهم شوف حياتهم  تاهوا شويا بس رجعوا، وأكيد كمان شويا تعبوا، بس عوضوا كل اللي فاتهم جايز مش هنحب تاني، بس لا يمكن دي النهاية فاكر يوم ما قلبك جاني، وقالي لازم تخلص الحكاية اتفقنا على فراقنا و قرارنا، وانتهت كل حاجة بشياكة محدش تخيل من اللي يعرفنا، نقول عن بعض مالناش علاقة 

ياللي في العلالي، أنظري كدة حالي،  دي طويلة الليالي، والسكة محتاجه شرح  ياللي في العلالي، مش عارف أنا مالي، طبطبي على موالي، حوليه لغنوة فرح حبيبتي ريحانة جميلة، الشكل فعلاً حلو،  نسيمها يحلي الجو بس الطبع صعب ومر انتي شجرة زينة، أي مكان تحليه،  وقلبي لو يعمل إيه  ما يدوق تمر ولو بعد عمر ياللي في العلالي، سافرت أنا أزمان، شوفت الزمان، ونفس المسافة باقية لي يا روحي انتي نخلة، لا برد الشتا يهزك،  ولا حر الصيف يبتزك عاشق البلح رطب ياتمر روحي طويلة وصابره، تقدري تقولي صبار، والشوك للشوق ينهار لو لمح منك بس أمر دي طويلة الليالي، ماليها فجر، مقاضيها بالحجر، حجزت هي على مالي 

احساسي بيكي باي باي، من قلبي خلاص أهو بح  كان غنيكي مستوى هاي، دوري عليه ما أصله شح  أشحتي الاحساس شحاته، من اللي رايح واللي جاي  اللهم ياقلبي لا شماته، بس انتي تستاهلي كل جرح أحساسي بيكي باي باي، عشت ليكي اخاف عليكي، وأعمل كل اللي يرضيكي  يا أحباب شوفوا التعب، أخد التراب احوله لدهب  أقول يمكن يملى عينيكي، بس كفاية كدة والسبب أنا منها قولت آه و جاي، تغيب وترجع تقولي هاي، بقولك أسمع وعينيها تدمع، أنا حاسة احساس يوجع   مش مبسوطة بحبي ليها، بخبط الحيطة براسي فيها دي مرة تحن ومرة تودع، مش عايز أرد عليها  غير بكلمة باي باي، 

عاشق بتعلم من عينيكي، وكأني طفل لسه متعلم، ينده عليكي  بالعشق فرحان تقولي حبيبي، مسافة السكة أخدها طيران، أنا ليكي  عاشق غلبان في الغرام، وكأني كنت تلميذ خيبان، وحب العلام ف العشق أنا مليش ولا سابقة، في كل حياتي السابقة، وكام سنة عشتها وحيد، وكنت بقول أنا مش فارقه  ضي النجوم من ضيك مسروق، دي الشمس بتطلب الشروق، منك وعينك تدي الأذن، السما تصفى لينا وتروق بعشقك الفرح يكبر ويزيد، ويقول للحزن ولكل جرح، أبعد بعيد أي وصف في كل الكتب، يوصف يادوب حلاوتك النصف، وايه جديد شفايفك في بحرك علامة، واللي في حبك جرئ، عليه هو الملامة

أيوة في حبك زادت أنا حيرتي، من كتر ما بحبك ولا من خيبتي، وبقولها ليكي خلاص يا حبيبتي، أحساسي بيكي لحاله راح أنا أتعلمت وخلاص فهمت، وتعبي كان أكبر درس  وهمت نفسي عيشتها الأفراح  قلبي الحنين بيقولك يحنن، نسيتك في يوم ونص  بيغني دلوقتي بضمير مرتاح أيوة في حبك عشت أنا معاناة، لأ مش هو ده اللي قلبي أتمناه، ضعفي معاك شوفت ده معناه، عادي جداً هيقبل الجراح 

 بحبك وهقول ايه تاني، دورت أنا طول الأيام  ملقتش في كل الكلام، غير بحبك وانتي اللي عحباني  لكل عاشق طريقة، وهي دي الحقيقة معرفش اذوق ف المعاني  مبشوفش غيرك ف الأحلام بحبك بحبك قلبي عايز يقولها يشق بيها ليالي الصمت وطولها تقصر تخسر قدام عينيكي، تعوض تعود قلبي يغنيكي  بحبك بحبك مشاعر قلبي يصونها مش كلمة دي عهد مني ليكي بحبك وهعمل ايه تاني، بعد الحب ايه يتعمل  لقتني بحبك بقيت بطل، وكل الدنيا فيكي محارباني  وأنا قدها وقدود، اندهي أنا موجود ضحكتك اللي مقوياني  سكتك هي الأمل 

اؤمر سيادتك عايز ايه، فكرني كدة طلبك ايه، واحد حنية من اللي هي، وكمان مطلوب أدلع أنا، شويا وقت للأهتمام بحد، وهنا مطلوب حبة جدعنة، بص سعادتك انت وهي، فكك مني أسمع كلمتين قلبي مصباح علاء الدين  اتهرى فرك، يعمل لحبايبه فرح وسيرك، نازلين طلبات، مفيش خد كله هات، وهاتك يا هلك... فيه بقالهم سنين  قلبي مصباح علاء الدين  بيحقق أماني، معيش حبايبه بشكل تاني، بيعمل معجزات، قال بدالهم الآهات، بيفتكروه ثواني... لما يكونوا محتاجين  شطبنا خلاص وصاحب المصباح روح يرتاح  قررنا ياناس نصاحب الأرواح ومنكم نرتاح ده يجي يرمي لي همومه، وكأنه عادي بيغير هدومه، ده بيطلبني لما يحب يكلمني، ما أنا على مزاجه وبراحته، أول ماتتحل مشاكله يقل، معايا ما هي دي عادته، ده مش أسلوب حتى لو جني، دور بعدي هتروح لمين 

لو السكر عند كل الناس مسكر، انتي سكرك القليل يسكر،  في قلبي مسكر أكتر وأكتر لو مقدر أشرب يا ناس و أسكر، ممكن أشربك وطعمك يسكر، ده لولا العسكر كنت أقدر هي جنية بحر لابسة الحنية توب  ولو عليا أنا ما أتوب  سحرتني بلمسة سحر قولت إيه المطلوب  طلبت قلبي مهر الناس طابور واقفين بالدور، على سكر الغريب والله عيب، لأمتى الخواجة عقدة تدوم  وانتي يا ام السكر مدعوم، مقبل بالوابور ومعدي البحور، حلاوتك حلاوة كل يوم تدب الروح مكان ماهي تروح، والجرح لو مطروح بدل ماينوح، الفرح يفوح منه ويبوح حتة فيروزة من جبل موسى، تملي عروسة من العين محروسة، ودي كل بوسة طبق بسبوسة احساس خيالي من الحيرة خالي، ماتعرفوش لو مجربتوش، دوق منها حلاوة المانجا واخدين هما على طعم الرنجة، صنف غالي للي في العلالي، في السوق متشوفش 

أنا مش غالي عند حد، أنا فاضي من جوة، مليش ضهر ولا حد يسد أنا دهب بس ياعيني، واخدني بيعة و شروة، عايزينه بس بسعر الصيني  أنا مش عايز أي ود، ولا حد منكم يراضيني، احساسكم حاجة مش ولابد يا غاليين أنتوا فين، ليه مش باينين، ولا ليكوا وجود، مع أنكم بقلبي عايشين  مكنتش أتوقع اني أسمع، كلام يوجع، مالوش حدود، وعلى بعدكم أمضي وأوقع أنا مش عايز حاجة منكم، غير حبة تقدير، لأي حاجة حلوة عملناهالكم أنا مش عايز تردهالي، ولا تعملوا كتير، كفاية عليا تحسوا بحالي وطبعا مكنش على بالكم، أشتكي من أحوالي، ولا أني أقدر أبيعكم 

ياللي عينيك بتحلي المر، ياللي فيك الحسن مالك، عن العيون بتتدارى عمر؛ مانعينك تظهر او تمر، عرفت السر بحثت عن الأمر، خايفين على بناتهم من كمالك  دي العيون جمال منور فيهم القمر عندهم إله الجمال متصور على قوامك الحكاوي عنك بيخلدوها في المثل  والقهاوي ناسها يملوها لو وصل  كل الشباب للحكومة شكيانا، بتقول إن بنتكم أسرانا وملناش لا رجعة ولا قومة، ما السبب جمالها اللي عمره  ماحصل  وكل تجار السوق حبانا، ده دارنا بالهدايا غرقانة ومن خير الأرض بندوق، ما الناس بيشتروا على أسمها  العسل الخير والطيبة في قلبها سكان، ومش غريبة يبانوا في كلامك، هي مش شبه أي حد كان، هي الملاك في هيئة إنسان، ولو النسيان قام الصبح ناسيان، ما أقدر أنا أنسى جمالك  محفور جوة قلبي صورة ليك بالألوان  ويهون كل تعبي وأحقق كل آمالك 

ياما ناس في حياتي كانوا عادي في الأول  زادت محبتهم بقلبي كل ما الوقت طول  وناس تانية في حياتي كان ترتيبهم الأول  خلصت علاقتهم بيا زي ما عايزين من الأول إيه اللي بيغيرنا من حال لحال، مفيش إجابة واحدة مع إن فيه 100 سؤال  مش هما دول برضه، اللي أحلى الكلام فيهم مني اتقال  طب هما فين دلوقتي، طب يا حبايبي ازاي الحال واخد في حياتي على طعم المر في الحلاوة تبتدي الحكايات بفرح تنتهي بجرح و قساوة أنا وحياتي مش فاهم ليه العشرة تقلب عداوة وأخسر أنا كل واحد بعد ما زاد في قلبي غلاوة 

يا حبيبي رد ليا، قلب في غيابك تاه  يا حبيبي رد فيا، الروح رجعني للحياة يا حبيبي معرفكشي ومعرفشي غير شكلك اللي في خيالي تعب القلب كتابة وتأليف  كل يوم شتا أو صيف  أتملى المكان بالجوابات، ورسايل كتير بالشات  والوقت حامي زي السيف  تعب القلب خلق معاني  جديدة أكتبهالك أغاني  توصف احساسنا بالمقابلات، تشرح الطعم في القبلات  تعالى لي لو تعرف عنواني يا حبيبي دي الرسايل، تاهت بنا في المشاوير على عنوانك سائل، تعبت من كتر التدوير يا حبيبي بشكي ومعلشي الشكوى دي من وحدة الليالي يا حبيبي بكتبلك، قالوا على أملي جنان فضلت أنا أبعتلك، تيجيني حبيبي بالأحضان تيجيني أسرع ويسمع الكل صوت حضننا و أشواقنا يا حبيبي أعيش، وأشوفك بتقرأ الكلام وتقولي مفيش، من النهاردة غير الغرام وقلبي يلمع تاني يرجع يرسم جوة القلب أسمائنا 

تشكي الهم آه مني ليا، تحكي لي عن الحزن والاسية  لأ أستنى هقولك  مش بتحس الجرح غير بيا، ولو مرة تحزن الدنيا  كلها لازم تقوم لك الدنيا يا حبيبي لعبة، وانت عليك ترمي الزهر  مرة تكسب مرة تخسر، عليا شويا وعليك حبة  كل ماتزعل تشوفني صفر، تشوف عيوبي تحس بالغدر  ودة مش حال أحبة  عايزة أشوف حزنك بعينيا، طب انتي ليه عمرك ماشوفتي  الحزن اللي بعيوني  أنا السبب وبتلومي عليا، حبيتك على قد ما أقدر ده انتي  ولا مرة تهوني  والله بجد أنا تعبت، بأيد صوابعي العشرة شمع تنور  الدنيا كدة ليكي 

أنا أخر واحد في العالم، اللي بتدور عليه، واللي قولتي عليه، أكيد هتلاقيه  أنا أهو موجود يا عينيا، قدامك لحم و دم، وعينيك في عينيا، وهو دة المهم أنا شاكر جداً على صبرك ومقدر اللي ضاع من عمرك كل اللي كان واقف ضدك اندهيه وأصرخي قدامه و فيه قولي له قولت لك هلاقيه مبسوط يا عمري أني قدرك أنا أكتر واحد اتمناكي، وكنتي واثقة فيا، ياما دورتي عليا، اتمنيت تكوني ليا  وخلاص أهو أنا لقيتك، وخلاص انتي لقيتيني، أنا والله حبيتك، قبل ما تعرفيني  أنا أخر واحد في الدنيا، قلبك كان مستنيه، يلا بابك أفتحيه،  يلا هنستنى ليه وأحلى حاجة معاكي، نتقابل بعد السنين ديا، هوايا يبقى هواكي صدفة كانت نية 

مش كافي قربنا، ولا دافي كلامنا عننا أمشيلك حافي ولو في سكتك شوك مهابوش  تمشي لي بس لو طريقي بالحرير مفروش  ليه بتخافي يا عمرنا، دة الشافي لجرحنا حبنا  نص حالة ونص حب، مكدبتش أنا عارف أنه صعب  اننا نبقى لبعض، نص المسافة قرب والنص التاني بعد بنعيش محنة   نص احساس ونص شوق، النص من كل المشاعر بندوق  رافض الشروط، ومن حلمنا نفوق والكل يبقى مبسوط  الا احنا مش كافي قربي، لقلبك الوافي وهو جنبي  فوق كتافي شايل حلم في عيوني ليكي انتي  لولا الكسوف والخوف اللي فيكي بقولك يابنتي  ما أنا خافي حبي، البكر الصافي حتى عن قلبي 

يا مين يلايمني عليها، مين أهلها وفين نلاقيها، دة القمر هو عينيها، كنا بنسأل ليه مبيظهرشي  يا مين يلايمني عليها، سابت أعصابنا من بعضيها، سحر مالوش زي ماليها، سحرنا وقولنا مبنخافشي أنا شايف عود أنا شايف عود، حلياته من كريستال  أجمل من الورود، حقيقة مفيهاش فصال  أنا شايف تمثال  أنا شايف تمثال، وارد من الخارج  دة جميل جمال، ومش بالمعنى الدارج  انت لو آية انت لو آية، أنا بيك مؤمن  ولو دي النهاية، أنا معاك مطمن انت لو خطر  انت لو خطر، أنا مليش دية  ولا ع البال خطر، أعشق عيونك ديا 

وصلتي للي بتتمنيه ولا لسه، كام قلب دوستي عليه ف القصة، بتقولي ايه أكيد طبعاً ناسية مش دي برضه الحقيقة، زعلتي ليه دلوقتي  لو عندك رد طب ما تردي  بلاش تعملي فيها بريئة، تبيعي الكل وقتي  تدوسي الكل وانتي تعدي وصلتي لأحلامك اللي بعتيني عشانها، وصلتي ولا فيه حاجة ممكن تاني أعملها، تمن حبي كان كافي لطموحها

ولقيت أنا نصي التاني وهو كمان أيوة لقاني  خدني في حضنه رماني  وقالي أرتاح اللي جاي بس أفراح  ومفيهاش أي كلام تاني يا ناس الحب دة رزق  أوعوا تخافوا أبدأ منه، يلا جربوا وأعرفوا عنه  هيغير فيك كل جزء ماشي هو يتكلم عني ويقولهم خلاص إنه وعدني  عمره حبيبي  كدة ما يسيبني  هنبدأ من الأول مهما حصل هنكمل  ما أنا بحبه وهو حاببني ماتقولش بحبك موت أبدا وقولي بحبك كتير جداً متجيبش سيرة الموت أحسن حزن مفيش خلينا بالحب نعيش وحبنا يغير العالم فعلاً 

مش عارف أقول بحبك، مش قادر باللي جوايا أصارحك  قريبين أه يمكن، بس قربنا أصعب من البعد  وأنا أه أجبن، من إني اتحدى لوحدي الأرض  مش شايف غير قلبك مش قادر أقول بحبك ساعة حاسس بحاجة بنا، وساعة إن كل واحد في دنيا  فا بخاف أكون صريح، وبكتفي أنا بالتلميح  حسي بيا لو ثانية، بتحبيني بجد صحيح  مش خايف عليا أنا لأ، مش شاطر قلبي في الوصف بدقة فا خايف أنا عليكي، من نظرة في عينيكي بحيرة وصدمة وشفقة، ليا ولا مليش فيكي 

لو تسألني الحب يعني ايه،  الحب ياحبيبي ضعف، ويزيد قوتك للضعف  ولما يقابلني أنسى أنا إيه قبليه يعني يجننتي وعقلي يكبر بيه، أضرب كف على كف، ما أنطق قدامك ولا حرف  لما تكلمني وقلبي تسلم عليه الحب حالة عكس عكاس، ميفهمهاش الناس  ولا تتوصف بالكلام، تتحس بس بالأحساس  الحب نار وجنة الخلاص، فلسو وماس  ولا تحسه العقول، احنا بنعيشه وخلاص زي حكايتنا أنا وإنتي يا روحي، كل ساعة بحال، ندوب نتشد ف الحال  وتزيد حيرتنا لو قولتي هتروحي  ونغير سكتنا ونقول خدنا قرار، بسرعة نرجع اومال، دة بعدنا محال  هنكمل حياتنا سوا مش أختيار 

بتهرب من مكان وتروح مكان... شايفينك فاضي  مع إن جواك بركان  حكاويك كلها ده كان ياما كان... كلها ماضي  ده كله حصل زمان أخر مشاعر حسيتها كانت من سنين وسنين  وأة من ساعتها كله بقى تحصيل حاصل  كل المشاعر نسيتها وألوم أنا على مين  وايه بس أخرتها محتاج مع الحب أتواصل إنسان عدى عمره التلاتين... وقلبه خالي  حب كدة مرة ومرتين  من طرف واحد وآه يا عين... هو ده حالي  نفسي أعرف المشكلة فين

أهدي وهدي وواحدة واحدة براحة كدة فهميني منتش قدي في عنيكي بشوفها وبيها بتحسسيني اللي على خدي ده دمع نازل كدة من عيني خدي وأدي معايا مرة و مرة على بر رسيني من بعد كتر السفر، ياما عشت ياما شوفت  حبك في قلبي أتحفر، وعشقك طلع خطر انا منه خوفت، مع إني أفتكرت في عينيكي هرتاح عدي وهدي بالعيون دي اللي تملي مجنناني مش بيدي اعشقك انتي من بين عيون عشقاني لو مرة تردي وأعرف ليه انتي معذباني ما الود ودي أعرف على فين مودياني من بعد كتر السفر، ياما عشت ياما شوفت من الحيرة قلبي انفطر، وحبك جن و حضر انا أستسلمت، وقدامه سلمت وقولت والله سماح 

هنفضل لحد أمتى نعاند و نأوح  محدش بيفضل معانا لحد الأخر وهي دي الحقيقة كدة من الأخر الحب في القلب هو اللي جارح محدش بيفضل ولا حد مكمل،  صفحات في حياتنا ابتدوها، وسابونا احنا نكمل  محدش بيفضل كدة زي الأول،  يبتدوا معانا كل حاجة، ويقولوا لوحدك كمل دة ياما ناس كتير أوي ياما اتهنوا بخيري أنا ولا حد غيري ملقتش منهم حد لما قولت يا ويلي جم وراحوا سابوا الجرح علامة

في السما الصافية شايفك انتي جاية،  حاسس روحك دافية مختلفة يا حبيبة، دقت طبول وزفة لاعبت نفسي رفة، عشان نتقابل صدفة في فرصة قريبة، دة الحنين زاد حنين، والقلب ماعاد يتحمل  سيبنا السنين للسنين، وقولنا نبدأ من الأول  وأمتى الحكاية تبدأ، واحنا من بعض تايهين بعد السما من الأرض ده بعدنا عن بعض، حكم مفيهوش نقض ولا قاضي استئناف، أنتي السؤال وأنا الرد أقربلك من أي حد، مع أن طريقنا سد دايما منه احنا بنخاف، عايزك تكوني ليا وانتي كمان يا عينيا، بس الدنيا ديا هي اللي بتفرق القسمة، هحارب ومش هسكت للوضع ده هرفض، وفي حبك مش هتهدد يا أحلى بسمة،

كنت طول الوقت كل ما أفارق حد، أقول قسمة ونصيب هيتعب بعدي كتير،  لما يروح وعني يغيب  وأفضل طول الوقت أخسر كل حد، وأقول مينفعش حبيب بس والله ده كتير، أكيد فيا مشكلة و عيب بخسر أنا بس اللي بخسر، معلق حياتي عليهم و متأثر اللي كسبته بس الوحدة، قلبي بقى ازاز متكسر كلهم عاشوا وفرحوا كملوا حياتهم ولا وقفوا، يظهر أنا الخايب وهفضل ع الحال ده كتير، والحزن لا مخلي ولا سايب  كل حكاويا عنهم وأنا عمري ما جيت ببالهم، لا حبيبة ولا صاحب مهما كان اللي بينا كبير، الطيب هو اللي تملي بيحاسب 

أحلى الكلام ليكي موصوف لك،  كل الأهتمام قلبك يستاهله، حتى الجمال قدامك مكسوف لك، ولما بنام حبك بندهله، في الأحلام أنا بشرح له  يا هل ترى بيقولك دي زي النيل، عامل في البلاد جميل، أسمك جميل  جواكي خير مالوش مثيل  دي زي الماس، كنز في بلاد الناس، يغني ناس  بيكي عن سؤال الناس  في الأفلام نجمة شباك،  تحلى الأيام لو عينيها شافتها، تصنع سلام ما هي ملاك، ومش كلام عشان حبيتها، في الغرام أنا خطوتها تاخدها هنا و هناك 

مش باقي من ذكرياتي  من عشترتي و صحابي  غير وداع وكوم أوجاع  حد هان عليه عتابي  حد محبته زودت اتعابي  وحلم ضاع بأختيار سوء في عز النهار بالسوق اتباع فاقد الذاكرة والتذكرة اتجاه رايح بس  ساكت كلامي واحلامي مشافتش شمس  مش باقي غير أسامي  ورقم تليفون أتغير ورسالة بسؤال والجواب ماتقال  فضل فيا كدة يحير بأول حكايتنا مكنتش أتصور يبقى الحال النهاردة مايل وأنا مش هرضى أتحايل ع اللي مال

أنا المسالم طول عمره ومعاكي عشقت المخاطر على السلالم هنا أمره يطلع ويقع كدة الشاطر محتار هواه مش عارف لفين هواكي مودي  انا عندي حبه حب، كده على قدي  وعندك أحلى قلب، بس لمين تدي   مين كدة حلمه معدي ويفضل طول السنين وردي  خدي وادي مع نفسك  انا حسك، أنا حارسك  تعالي نحلها ودي  تعالي نحلها ودي  انتي الأمنية الأولى والتانية ولحد اخر الأماني  انتي قلبك مالي عينيا مش عايز أنا حد تاني  خايف طيرك يوم ما يطير على شباكي ما يعدي

يا قصة عمرنا يا قصة هو لسه فيه أمل لسه  سؤال من برة المنهج، بجري وبعافر وبنهج  يمكن ألحق كاتب القصة وأسأله وعينيا ليه بصة  ليه أنا بحس كدة بخسة  و احساسهم بارد متلج أهون عليك تهون عليا، ودة الطبيعي والعادي والمنطقي  بس ليه كدة يا عينيا، بتدمعي لو حد منهم يشتكي  وهو مين فيهم راح،  وفكر مرة بس يرجع و يعتذر  ف الحياة حلمنا تاه  هو معاه ربنا هو يتولاه  قلبنا دة هيبقى قدوة، ولا يتاخد مثل وعبرة أوعى تعمل زيه في هواه  مع إن إخلاصه تتمناه  بس ليه الناس شيفاه  وبيعاملوه كأنه بلوة 

أجمل ما فيك كل ما فيك  كل الكلام ما يكفيك  غنا الضحى لحد المسا... بيتنسى  مع انه متغني ليك  لكن ما يساويك بحبك وقت الربيع ورد، بحبك في عز الشتا برد وتخلي الخريف يعدي ضيف،  ونسمة صيف تهديني ورد بحبك وقت الكلام والحكي،وأحبك لما توافقني الرأي  تشوفني حلم حقيقة وعلم، تشوفني وهم أشكي للأرض  أوصي قلبي عليه وكل اللي حواليه  يا ناس أهتموا بيه  عدى أهدا لكل الأعدى... مودة  نورلي الطريق بعينيه  ربنا يحميه كل علاقتنا دقايق جيتلك مضايق عرفتني عني حقايق بطريقتك عرفتك وعلى طيبتك... يا بختك وعلى قلبك الرايق اللي حنانه سايق 

عد معايا يلا يا قلبي، مينفعش على بعض نخبي، كام مرة احساسنا معبي، حب وخير للحب كتير، وعمر ما الحب عبرنا بتعرف تعد ولا زهقت، كام مرة فيها انت صدقت، وكام مرة فيها أنا فشلت، نلقى حد يحبنا بجد، أو غالين مرة يعتبرنا  حكاياتنا الفاشلة قدامي، سبقاني في كل خطوة  حب أو عشرة ولا أحلامي، مفيش فيهم حاجة فارقة أولها بوصل لسابع سما،  وأخرها بلقى قلبي إترمى  أنزل أجيبه من ع الأرض،  وكأن احساسه زي الورقة  عد معايا أصل إحنا، شركا كدة في الرحلة، عايشين في نفس المحنة، بيقولي كفاية ليه بالحكاية، دي دلوقتي بيها بتفكرنا  حتى انت زعلان مني،  ما انت عارف غصب عني،  بتحسر علينا إكمنى، لو فوتنا الدنيا و موتنا، محدش هيحس ثانية بغيابنا

بسمة و دة مش أسم بنت  دة رد فعل مني لحد عدى جنبي... ومعرفوش  دنيا و دة مش أسم بنت  و ليها حل غني و علي الصوت علي... متكسفوش ياما صفات في أسماء بنات  كل ما ننادي عليها، نفتكر نعيش بيها واللي فات خلاص أهو فات  يلا ننسى ونعديها، حياتنا حلوة نخليها  زي البنات ما هي حلويات  تحلى حياتنا بأساميها، بصفاتها الحلوة فيها  رحمة أيوة مش أسم بنت  دة هو المطلوب منا رحمة تعيش بنا... و فينا سلمى و دة مش أسم بنت  أمنية تفضل أرواحنا سلمى بمحبتنا... و أمينة

مكنتش أعرف يا حب إنك ندل، كلك زيف وش تمثيل، سيناريو واقع مالوش مثيل الأحساس ضيف وممثلين هواه، ومخرج يادوب على باب الله،  مكنتش أعرف إنك ماتعرف العدل نحب ونعمل أكتر من المفروض نحب ونعمل أكتر من اللي علينا نحب و ندي بس ناخد مرفوض مع إن قلبنا دة غالي في القيمة بنداوي فيهم من غير شماته وهما ياخدونا بالحضن سرقة ونطلب منهم الاحساس شحاته ونطلب ياناس تقدير مش شفقة

سكة سكة هنا سالكة وسكة تانية فيها عركة وكل سكة في حياتنا ليها علامة زي الماركة سكة سكة هنا وضحكة وسكة عاملة زي الشبكة في السكة كل حكايتنا حكاية فلة وحكاية سكه شايف اللي هناك ده كان سكتي وغير فكرتي  عن نفسي وعن الدنيا واللي معدي هناك ده كان أمان لحد ما بان  اللي جواه في ثانية الناس سكك والاحساس شكك  ولكل سكة نهاية تسلم لسكة تانية سكة سكة اكشن حركة سكة هادية رايقة و فكه  وآه يا سكة في ذكرياتنا اتبعترنا فيها زي الفكة