أشعار الأراجوز

دي غريبة أوي أصله مطلعش حب، امال احساسي ده كله كان ايه طب، اول ما بعدنا الشوق اللي كان مبهدلنا، زمان وقت القرب ودقات القلب تزيد ضرب، كله اختفى ومبقاش بيجي على بالنا، وده والله مش تقليل أبدا منه، أنا مستغرب برضه وأكتر منه، حقيقي مرايا الحب عامية  لسه غالي بس بشكل تاني، وكنت فاكر من غيره هعاني، بس الحياة مية مية دي غريبة أوي معقول كان إعجاب، أنا مشوفتش كده لا فيلم ولا كتاب، وهو قدامنا كان قلبي بيحفظ كلامنا، كان كلام أحباب من غير حساب ولما غاب، فترة ازاي مبقاش كده بيوحشنا،

سيب لي نفسك بس الليلادي، سيب عليا كل حاجة أنا راضي، متعملش مجهود ولا تفكر، كله موجود بس أشر، أعملك اللي عايزه وأكتر، انت ارتاح وخليك زي العادي، أنا جايلك دلوقت وهنروق، متضيعش وقت وتتزوق، القمر قمر في كل حالته، وأنا عيني بتعرف تفرق لو عايز تفرحني الليلة، حضر لي جملة جميلة،  وقولهالي من غير كسوف، كفاية بقى دور التقيله

لأ بقولك ايه هتعمل مجنون هبقى واحد خنيق، ياريت ننزل شويا بالتون ياريت نبطل زعيق، وفتح في وشنا اللون بلاش سوادك الغميق، كلامي ليك يا واكل ناسك، يا شبعان من خيري، وفي أرض غيري،  بتزرع خيرك وترمي أساسك، كلامي ضايق احساسك، طب معلش يا بيبي، اتكلم براحتي هو انت اللي دافع، ياما كنت بتزودها، وعليا كنت بتسودها، الضحكة لحبايبك وليا مدافع، مالك مش عارف تدافع، معلش خيرها في غيرها،

قيدت صوابعي العشرة ليك، كنت بطول بالي عليك، كنت الأول وباجي بعديك، وانت يا حبيبي اللي فيك فيك تسكت تسكت ولما تتكلم لسانك موس، تبان حنين ولما بتتجنن عليا بتدوس، لا طريقتي ولا طيبتي عرفت تهديك،  عملت عمايل يخلدها التاريخ، وكنت بتقابل بالتوبيخ، وانت عايم بمية البطيخ، ولا على بالك واللي فيك فيك 

في حالة كتمان عايش فيها، بتخلق آمال وبتصبرني عليها، لو صرحت مش عارف بعديها، هبقى كسبت ولا خسرت، كله وارد خمسين خمسين  حالة المغامرة عليها وليها، ولو السر هيعيش بالوقت، خليه عايش بالسر سنين أنا جبان جايز، وكل الكلام بتاع لو نفسك وعايز، و الشجعان هي اللي بتكسب الجوايز، كلام يتكتب بكتابين، ولا بأغنية في دقيقتين،  ده الأمل بيعيش على احتمالين خسران أو فايز،

أنا مش محتاج قمر ينورلي ليلاتي، ما انت أهو موجود ومنور حياتي، ومش محتاج الشمس ولا منها دفا، ما حضنك سداد وقلبي بيه أكتفى، ناس تحب نهارها وناس تحب الليل،  وأنا مش فارقه معايا طول ما انت معايا، ما انت كل دنيايا ومخلي الجو جميل، علشان انت جميل بصورة محدش يتصورها، أنا كده بعيش معاك أجمل أيامي، ميهمنيش حاجة غير تكون قدامي، أشوفك كل دقيقة هنا على الحقيقة، ولما أرجع أنام أشوفك في أحلامي،

يا حبيبي غصب عني نفسي وقفت منك، لا أنا قادر أشوفك ولا أسمع حاجة عنك،  مهما تعمل دلوقتي ومهما كده تحاول، مش فاضل جوايا حاجة تخليني أسامحك،  أصفالك  دي حاجة بقت أصعب من اللي في خيالك، أعديهالك  طب واللي فات أعمل فيه ايه ما هو هيبقالك، ولو تعرف حاولت ازاي وكام مرة كده علشانك، هتشكرني وتقولي شوف حالك يا حبيبي غصب عني انت وأنا بتحدي، عشان أكسبك بقيت لازم أسكت وأعدي، أو أكسب نفسي وساعتها لازم أخسرك، ليه وصلتنا للحالة ديا وانت والدنيا ضدي، 

واخد فكرة عني مش صح، بيها شايفني بيسمع عني مش مني، وأنا قدامه يعني أهو حي أرزق، ياما قلبي تعب من الشرح، ومش فاهمني  مقرر إنه كده يعرفني، وده كلامه وأسلوبه يا نهار أزرق، من وجهة نظره هو قلبي حافظه،  أي تغيير بالنسبة له ده تبرير وكلام كتير  وهو كده صمه رافضه ومش عايزه، واحد مهما أقوله اللي جوايا، وأتكلم وأحرق  غير نفسه مش بيصدق، أنا شايفك كده خلاص خلصنا، يا سيدي طب أسمع الحكاية، وكلام المنطق  وقبل ما بحرف أنطق، يتكلم هو وده اللي كان ناقصنا، 

بقى بتخاف يا حبيبي من القرب، وبتقول عادي بتكسف أسأل عليك، بس عايزني أقرب أكتر ليه طب، ليه عايزني أنا اللي تملي أرضيك،  عندك مشاكل وياما وضحتها،  بتعمل عاقل وتوعدني تحلها، مهما تفوت أيام لسة كل حاجة زي ما هي  ليك طبيعة صعبة وقاسية، عايز طريقة ومعاملة خاصة، مهما تعدي أيام طريقتك معايا برضه عادية بدل ما تعاتب يا حبيبي بتهاجم، وتقول كلام يزعل أكتر و يضايق، دافن زعلي عشانك وعليه رادم، وأحاسب على كلامي وانت فيها سايق،

ايه حلاوتك دي كلها، لا لا أنا مش قدها، اخفيها كده لا تتحسد عليها، عينيك دي ايه سرها، مش طبيعي سحرها، وعليها نظرة تخطفنا بيها، لأ أنا مش متصور، الكاميرات ازاي قادرة تصور، الجمال ده كده من غير ما تخاف،  كل يومين بلاقيك على غلاف،  جمالك لوحده بينور،  بيخلي اللي مش شواف يبقى مصور، طيب أنا منين أبدأ، اللي شايفه ده مفهوش منطق، وبحلف بالله دي لا هي مجاملة، ولا أنا زودتها حبة في المبالغة،  جمالك عايز له مهدأ، وطريقة في المعاملة عشان يصدق،

بقيت بتغلط كتير، وبين الغلطة والغلطة غلط كبير، ما تشوفلك قفلة، أعمل ستوب حبة باين لك خرفت، يلا وداع من غير سلام ولا حتى شرفت، عمري ضاع جنبك كده تمام ولا قصرت،  يلا وداع على ايدك أيام كل ألوان العذاب شوفت، بقيت حد. تاني، واحد غريب والغريب بتنكر حناني، وعمال تتحداني، وانك التوب وأنا مش مقامك دلوقت،

لو طيبة الدنيا كلها جواك، مخليها ليك سايبها هناك لا الكون هيكون أحسن، ولا حالة حبيبك هتتحسن كل واحد فينا وعنده كنزه، ولو على حبيبه خاف وعزه، ايا كان المبرر أو كان عذره،  مكسوف يعبر او عقله وزه، حبيبه هيعاتبه وربنا هيحاسبه، والدنيا باللي تناسبه، هتبليه في حظه وتبريه من كل الحلو اللي فيه وتهزه، لو براءة الملايكة كلها فيك، ومخبيها ومش بتبان عليك  المستفيد أكيد شكلك، طب حبيبك فين من برائتك

انت وأنا قصاد بعض هنا، بس بعيد يجي من كام سنة وسنة، انا تملي موجود،  وانت وجودك محدود، تغيب تغيب وتعود، تزود ما بنا شويا الحدود، زيادة تأكيد  عايزني معاك هنا أو هناك زي الملاك،  وعايز تبقى معايا سرقة  وتمن عليا بشويا حنية وتشوف كتير عليا تحسسني بهواك،  أنا وانت مع بعض من أمتى، ولسه أغراب  لا عايز تقرب ولا تبعد حتى، وعايش مبسوط، وأنا عايش مربوط، بين شطوط وشطوط، غرقان وانت بتزود شروط، تقفل الأبواب 

أعملي حسابك وفي خطتك، أنا مهما هشوف في سكتك، خطر مطر ولو بين كل خطوة وخطوة ألف حجر، أنا مكمل أنا البطل، ما دام هشوف بالأخر ضحكتك، طبيعي الكل يغير، والدنيا بالمرصاد تقف قصاد، اللي حبهم كبير، وتزود العناد والقدر أهو سداد،  بس أنا على الوعد والميعاد اللي فيه صحبتك طبيعي كده يتحالفوا، كل الحساد والكلام يتعاد، وأنا مشاعري حلفوا، وهما الأسياد وحبك الزاد، والمية وحبي ليكي زاد مع كل خط برسمتك 

مهما بعدي دورت ولفيت، وعلى أحسن مني حفيت، مش هتتحب زي ما اتحبيت، كده من كل قلبي الورد البلدي عشان رخيص قدام الأفرنجي، ميبقاش عزيز ولا يزغلل ويلمع في العين، ولما الغريب عليه يفتري يقول يا منجي،  ويرجع يشتري اللي باعه كده من سنين، هتعيش بعدي وعليا تتحسر، وتخاف تبين انك بتخسر،  تدخل قصص تخرج متكسر، محدش عليك هيسمي

انت والله بياع شاطر، وابن سوق  تبيعني كلي وتشتري خاطر، وتعمل ذوق  تبيع قلبي وتفتح الدفاتر، تحسب الفروق  وبعد ده كله انت فاكر، بتعمل جمايل وبردها بالسوء بتقول طيب جدع وقريب، طيب قول، بتحلي البضاعة بتاعتك قدام دول و دول، وانت بتعيب عليا وقريب، هتخلص مني، ومش قادر أكرهك عشان أسلوبك عاجبني، انت والله ما كنت شاري، من إول يوم  يعني بتتسلى وأنا غاوي، أعيش مهموم  سوى ما خلى وعمل بلاوي، وجاله نوم  وفاكر انه طبيب مداوي، متربي وهايل، وكمان مظلوم

الحالة صفر الحالة ج، قفلت اللعبة وخسرت الجيم، وانت يا حلم يا عديم، المنفعة سنة اتنين تلاتة أربعة، بجري عليك، ولا اللي بيجري على يتيم، ازاي تكوني حلمي ولئيم،  في الحلم وسيم، في الحقيقة كوميك وميم، عمرك ما كنت بيا حليم، هي ليه الأحلام،  وليه أنا مش بنام زي ما بقوم،  ليه تعلقني ع الشماعة زي الهدوم، وليه أستناها على الدوام كل يوم،  تحت الصفر أنا والطموح، وبقول عليا حد طموح، حلمت أكون وفين ما أروح، يشاوروا لي  ياخدوا رأي و يشاوروني، ما أنا خبرة، بس في الواقع وبكل وضوح، في الفشل أنا عبرة ومفضوح، عامل زي اللوح، يقع يتكسر وسيرته تروح، عمري ما نجحت ولا مسموح،

فكيتي التكشيرة من حزن الواقع والمية و حداشر، اللي مرسومين على وشي، بأبتسامة جميلة زيها ملقتشي، شيلتي التعويذة وحظي الواقع من الدور العاشر، وفرح السنين اللي ماتعاشي،  ومن ساعة ما جيتي مفارقشي، أنا ممتن ليكي لأن، انتي أول قلب يحن، يديني حب ويساعدني، وفي حضنه ياخدني، شافوكي فراشة للنار بتحن،  خافوا عليكي تتحرقي مني، حليتي العقد وبلمسة نهيتي على كل الكلاكيع،  خليتيني أرجع طبيعي، وعايش العمر معاكي ربيعي،

أسكت بقى شويا أسكت كده لو سمحت  عمايلك وقت الخصام، كلامك ساعة العتاب، بيبعدني عنك أوام، بيزود على الزعل عذاب، مكنتش تقصد طب أعمل بيها ايه دلوقت كلامك عكس كلامك، فيك ايه مالك،  ولو كل واحد هيتحاسب على نيته،  طب ليه بتحاسب قلبي على غلطته، أعذارك التعبير خانك، طب خد بالك،  أسكت بقى شويا أسكت كفاية صدعت  بعدت جيت لومتنى، كنت خايف لك من كلامي،  جيت أعاتبك هاجمتني، كنت قاسي أوي قدامي، مكنتش تقصد ولو قاصد كنت ايه قتلت

الكلام مع بعض بقى بيبعدنا أكتر، فا نسكت أحسن  انت لا حمل نقد وبترد قبل ما تفكر، او حتى تسمع  وقلبي اللي عايزه يحس انك عايزه، ولو بالكدب مثلاً  لا بنا شويا تفاهم، وكل واحد واهم، وتملي احنا بنساوم، مين ياخد من التاني أكبر حته  وعشان تبقى فاهم، لسه في حبك حالم، بس يا حبيبي يا عالم، هنقدر نكمل كده لحد أمتى بتقول كلام عكس اللي جواك، أيوة ما أنا عارف  بس الكلام مبقاش مفيد معاك، وانت بنفسك شايف  الحل عندك مش عندي صدقني، من حلك خايف

اللي يبيعنا مش بنبيعه، وبرضه كده مش عايزينه،  واحنا قاعدين براحتنا عادي لأي حد بنتبرع بيه، مش فاضيين لحيرتنا ولا مستنيين مكسب فيه، مستغني ومتهني، مش هتقف عمرها عليك يعني،  أسمع بقى لو سمحت، وأحفظ الكلمتين دول  بتغيظني وبتغني، بكرة ترجع تعيط قدام مني، وابصلك من فوق لتحت، وأمشي على طول دي الناس نوعين بالكتير،  نوع شرير ونوع أمير، وانت لوحدك نوع بس غريب ممنوش تاني، وحتى وصفك ممنوع يتجاب سيرته بالأغاني،

روحك شوارع فاضية هادية، كلها ورد و شجر، وأنوار بتتمايل وترقص كلها جاية من ضي القمر، تحلى فيها بالسنين التمشية، بعيد عن كل الناس المنشيه، ومن الفجر للعشية أنا وهي في سمر، أنا قلبي كان معطوب لمس طرف التوب، طلب الغفران طلب يتوب، وانتي قبلتيه هوا  ضحكتك مراكب ملوك راسية، هنا على النيل، تضحكيها تاخديني فيها توريني عالم جميل، مفيهوش غيرك انتي انسيه، وانتي ملاكه وانتي الجنية،  وأنا لا بيا ولا عليا ماشي وعليكي بميل،

مش مرتاحه،  هو ده كل اللي همك، هو ده بقى رد فعلك  واللي حارق دمك، وأنا اللي بشكيلك مش لاقي معاكي راحة، من تعبي اديك بتفه، وعايز تخلص وتسلم، بتقولي مش بتتكلم، اديني اتكلمت بصراحة، وبصراحة خلتيني أندم بتدافع قبل ما تسمع، طب مالوش لازمة، أي عتاب بالمناسبة، ولا الكلام معاك براحة، وبصراحة خلتيني أندم 

أنا واحد على باب الله، فارد ايديه جناح،  مستني يطير والطيران مش متاح، يعني واحد معتوه  واحد قلبه مش معاه، شارد بالدنيا سواح، بيمشي الخطوة ولفين ما الدنيا براح،  وبكل سكة يتوه متكتف مش حر، وبكدب وأقول أنا حر، بتكتك في الحر، وبصيف بالشتا ع البحر، وعمري خالي من أي شيء كان بأختياري، واحلامي بالسر، قلبي عليا كده عصوه بجدف أنا بالصبر، والمركب حرف جر، بخرف ولسه البر، بيخوف وكله كده شر، رخيص وغالي بينهم حطوا حالي،  وبقلم حبر، قلبي من قلبهم شطبوه بيفوت كل العمر، ويموت كله إلا المر، مخضوض في ايه مر، معروض لمين الأمر، بمكان عالي خلوني أنا وكل موالي، قطفت لهم تمر، قلبي مني قطفوه 

انتي حربة ولا حرية، انتي لعبة ولا حقيقية، انتي غالبه ولا مهزومه، انتي حاجة مش مفهومة، بتقولي بص في عينيا، مش شايف حاجة فيها، بتقولي خد شوف بعينيا،  مش شايف حاجة بيها، أعمى ولو العيون فيا، أشمعنا تختارني عيونك ديا،  لا فيا شيء يتحب، ولا فيا أصلاً قلب، لو كنتي ناوية على غلب،  مش هيفرق معاه ياما شبع ضرب وسم في التفاح، ولو كنتي عشمانه في حب،  مبقاش يحوق فيه دوا كليات الطب ولا علاجه مباح، يعني غير متاح لأي أفراح، ولا فيه مكان تاني لجراح،  انتي ضربة ولا حنية، انتي ايه ردي عليا، انتي غربة ولا حضن، انتي بجد ولا ظن، بتقولي أنا واحدة عادية، لا يمكن دي استحالة، بتقولي انك ليا جاية،  ابدا ما كانت بالقواله،  غريب ولا وطن ليا، فا غريب تعرفني فرحة أو قسية،

كل الكلام اللي اتغنا، قبلك ده مالوش معنى، انتي الحب اللي رجعنا، لدنيا مرة تاني يا سفينة آمنه وأمينة، مهما البحور تقلب تثور،  معاكي روحي بحري بينا، ولو مفيش مينا حوالينا، ولا يتهز شعره فينا، ما انتي القبطان وانتي النور، كل الأحلام اللي حلمناها، بعدك مبقاش نتمناها، انتي الفرحة اللي نسيناها، معاها رجعت تاني

تعبت من طبعك، دلعك كده ولعبك، وطريقة تفكيرك وتأخيرك في ردك، طب جدد أنا قربت أمل  تعبت وعلى أخري، وأنا كده دوغري، وبقولها في وشك لا هغشك ولا هرغي، واضح ومحدد وطالب حل ولو مش لازماك الحكاية، هقولها معاك مش حكاية، هاخد عزاك جوة قلبي، ويخلص حبك الكبير جوايا، صعب اسيبك تلعب بيا، حبك خلاص منتهي الصلاحية ولو فارق هواك وهوايا، اديني معاك قدام المرايا، مش اللي هناك هو انت، شوف كده عمايلك معايا، وبلاش تعيش دور الضحية، وكلامي يعملك أزمة نفسية 

أنا اللي كنت طيب بزيادة، وأخر سذاجة، فا أستاهل منك كل حاجة، وأنا اللي لازم يتلام  أنا اللي كنت بتساهل تملي، بالحرف والمللي، تأمر عليا وتفضل فيا تملي، ما أنا طلعت أي كلام وقت الدموع عدى أهو وفات، مش موضوع نتكلم فيه، واحد طيب من طيبته مات،  طب ياحرام ألف سلامة عليه، زمن الحساب عدى وولى وخلص،  وهو العتاب هيفيد بأيه، هطلعني خسران ودمي يتحبس،  ومش ناقص كفاية اللي أنا فيه،

انت صعب أوي وكمان مستفز، في الأذى عبقري جداً وفذ، وفي الحنية مكنش يتعز، ضعيف ودون المستوى، الجفا في كلامك بيه معتز، القسية قدامك تقوم تفز،  وفي الطيبة ملكش حظ، قربك مر زي الدوا، كتر ألف خيرك لحد كده،  حبيبك وحبيبي وأتفرقوا العشاق  أنا أعصابي مش مستحملة، وحياتك صون مرة واحدة الأتفاق انت حاجة وأنا تملي العكس، انت مغرور وأنا مكسور النفس، امتى تطلع علينا الشمس، يتحرق حبك ع اللي هوى، 

غنيلي بصوتك كده الحنين خليه يبين عليلي،  وفيه علي لي بيه يفيض نيلي،  على مشاعري البور، ازرعييني حبه تفاؤل،  ارويني محبة حبة، أطرح شجر و زهور، أنا قبلك كنت ايه، ولا حاجة  ومعاكي بقيت ايه، كل حاجة، أنا الأرض والسما، والمسافة اللي بينهم برضه أنا، وأنا وأنا وأنا ميلي بعينيكي اللي تجنن وبلون معين لونيني، بلونها ارسميني أزرق فاتح نيلي، أشوف الدنيا وردي، وتعليني معاكي لفوق، اعمليني بايدكي سبحة، ألقى أوام بلدي،

ياريت وانت بتلوم، وبتحاسبني كل يوم، تفتكر حاجة مهمة  أنا برضه زيك عندي هموم، خلي في الحسبان أنا برضه إنسان، مش مطبعة لتقدير والأمان، ولا بأربعة قلوب كمان،  هو واحد ويا عيني عليه غلبان، ياريت قبل ما تخسرني، تحاول حبة تستحملني، وتقدر اللي أنا فيه متعرفوش عشان مش بتسألني، بلاش تقولي اتكلم، أعمل كده زي واتعلم، فيه ناس ترمي همومها وناس تعيش في صمت تتألم، بحاول على قد ما بعرف، أشيل عنك وأخفف، بس أوقات بتعب عادي والله أخاف وأضعف، من الطبيعي والعدالة،  مبقاش جو وحالة، ومنتهى الظلم ليا والأنانية تشوفني زي الآله،

مستهلك ومش ناقصك انت ولا أي حد في الحياة، اسلك بقى انت وهو مرة ودي نصيحة لوجه الله، وخليك سند زي ما كنت مدد، بلاش طمع وانت يا أبو الحسد،  أعمل مرة بأصلك جرب تشوف الواحد ايه جواه، تعبت اهاتي وأحرق على الفاضي،  وأدي وش الضيف  مش واضح ملامحي وجرحي،  واحساسي اني ضعيف  مش باين يعني عليا تعبي، ولا البعيد كفيف  طب برضه مش سامع آهاتي،  ولا السمع خفيف  خلصان وما عليا حلفان طاقتي صفر او تحتيه، خسران كل اللي اديته واللي حبيته والعمر بلياليه، على اخري ويمكن واخري، فا بلاش تأنيب خليك دوغري، خليك إنسان وحس بغيرك طلع من خيرك واديه، 

حبينا وبكل روحنا، ومن رصيد أفراحنا، ادينا كده وصرفنا، على الفاضي و ببلاش  واللي كان روحنا، جينا معاه و روحنا، بسكينة تلمة دبحنا، واستنى نقوله عاش الناس كلها يا ساتر بقت حاجة غريبة، والطيبة وشرا الخاطر بقى عليهم ضريبة، احنا دلوقتي ضعفنا، عايشين و بخوفنا، وعشنا لحد ما شوفنا، الرخيص فينا باع  راحت فين معزتنا، بقى هو ده جازتنا، بعد ما ضحينا بذاتنا، لواحد كان طماع

الضحكة دي جامدة، والرقة تبقى واحدة، اللي هموت عليها ومن زمان مستنيها الفكرة هي جادة، والسكة سالكة مواعدة، كل خطوة بمشيها مستمتع أنا فيها يا حب العمر أنا تحت الأمر،  أطلب أتمنى أحلم بالجنة، لو عايز حتى تولع الدنيا، كفاية إشارة من عينيك السمر، النظرة مبتسميش، بتغذى عليها وأعيش، يتعمل مقام ليها ويتعلموا من عينيها حياتنا أهي جاية، وحياتنا الغالية،  عشانك انت أخليها فرحة تعيش تغنيها 

اديته كل حاجة عشان ميمشيش، ومهمنيش قولت يتهنى، بخير حبيبه اللي اتمنى  حبه وحنانه يكفيه،  خد كل حاجة وبرضه مرضيش، يعيش معايا ويستنى، كتير راح بسرعة وباعنا وقلبنا ولا فكر فيه، بلاش تترجى حد ولا تستعطفه، مهما بالله تحلفه، الأصل غالب  الحب اللي بجد ميصحش تشحته، ولا قلبك تسلفه، لواحد عايب اديته كل حاجة لحد ما فضيت،  ضحيت وكسبت ايه، لا شكرني حتى غلطة بعينه  رخصني صاحب الغلاوة، خدت ايه ولا حاجة بالتأكيد، لبعيد بيدور عينه، ولا يعرفني وكأن بيني وبينه  حرب و شر و عداوة،

مشغول يا حبيبي طب ما تقول، هصدقك على طول، أنا والله مش بقرا الغيب، يومين يا حبيبي قولت يومين، وغبت حبه حلوين، ونسيت ان ليك حبيب، ولا يهمك الله يعين، ويسهلك الصعب ولو احتاجت حاجة احنا موجودين، مش بايدينا البعد، وهنعمل ايه لازم نصبر و راضيين لو عيبنا اننا مخلصين، هتعود ياحبيبي أمتى تعود، بلاش تستخسر الردود، فينا رسينا و طمننا، وبلاش تسيبنا في نار تتعاش، كلمة واحدة وببلاش،  لينا هترجع ولا بعدنا،

أنا زرعت فيك الفرح، عشان تطرح ورد بس طرحت شوك ليا، والجرح بقلبي وايديا، وردك لما كبر وظهر ، اديته للي لا تعب ولا سهر، ولا كلفت نفسك بالشرح، ولا تبرير ولا رد وهو ده أصلك، ياما ناس تسايرهم تعاكسك، تشاركهم تنافسك، تحبهم تكرهك في نفسك،  وهي دي أخلاقك،  ياما ناس تبنيها بأشواقك، تتهد فوق دماغك، حلوين بس في خيالك، انت كنت أرض بور، أشتريتها بالغالي الكل بيبعد وأنا جيت، دبور وعليا زنيت،  ولما بقالك كده قيمة، شوفتني مرحلة قديمة، وبقيت في أخر الطابور، وطبيعي تنساني

أقول قمر لأ دي كلمة قديمة، خليها ملاك برضه مش جديدة، أوصفك بأيه انت قولي،  دي حكاية صعبة الحقيقة، كان نفسي أعرف أبهرك أسحرك،  وباللي جوايا وبكل كلامي عنك  كان نفسي أقدر أوصفك أرسمك، بس كفاية عليا إني بجد بحبك أقول جميل مش عايزه كلام، حب عمري وهو عمري يطلع كام، طب جرب مرة تساعدني، الحيرة دي والله حرام،

ما تقولي بأمانة انتي كإنسانه محتاجه ايه، الأسواق مليانه صفات ياما دوري بقى فيه،  وأشتري النقاوة مش دناوه وأرسي عليه، عايزة حنان يجي أبو الحنان يدي بالمجان،  و يتشال بالدولاب احتياطي لوقت العذاب، ترجعي له عجوزة ويبقى له عوزه أخر الزمان محتاجه أمان يجي السوبر مان والله المستعان، ويتركن ع الرف لحد ما يتداس لك على طرف، تترمي في التهلكة ومستهلكه الحقني بتخان نفسك في جان يحضر بالمكان عاشق ولهان، أهو ده بقى بالذات يتخاف منه وبتاع بنات، تتباهي بيه واخرتها بس ايه كان ياما كان  بتتمني الغلبان واحد شقيان وعاقل كمان، يحضر في الحال بس مش عاجبك الحال، ولا كده عيشته ودلوقتي ميزته فيها حبهان،

أنا لسة باقي عليك، أكتر ما تتخيل، بين حنية أو شوق ليا بين أي كرامة،  هتلاقيني عندك في حضنك ومن غير أي ملامة، ولا في عتابنا هطول انت اللي قولت يا بعاد، وانت اللي مصمم على العناد،  وأنا برضه على إستعداد، اتنازل عن حقي علشان حبي ليك عمره ما كان قليل  انت كمان عايزني معاك، بس كرامتك أوي وجعاك، خايف تحن من جواك، الناس تعايرك وتقول جايلك قلب ازاي عليه تميل 

روحي انتي روحي نامي ننه،  وكلي مع الملايكة عيش وجبنة، واحلامي تعيشي في الجنة،  ومتفكريش فيا ولو ثانية، يا أم المرايا معمولة من وهم،  بتشوفي نفسك فيها آية، و ملاك من دم ولحم،  يا أم البراءة معجونة بالغش، تردي على الحب بالإساءة، وراسمة قلب ع الوش، روحي وأعملي نفسك من بنها، يتحرق عادي كل اللي ما بنا،  ولو على القصة ان شاالله عنها،  ما كملت ولا تتعبي عشانها، 

يا دنيا يا قاسية، يا مملكة المواجع، وملكة الخدع،  ايه بس الموضوع  مش سايبه ولا ناصية، ولا أي شارع، إلا وفيه جدع  بسببك موجوع أنا إنسان أمرك شواه، مقطوف ثمره والداء بقى دواه، مخطوف عمره وبسكة الفرح تاه، الوف شافوه والجرح بس لقاه،  شغوف بالبكا ما هو اللي احتواه،  انسان ازاي والألم اللي ضد طبيعته  اداه وقته وهو اللي نجاه، الدنيا قاسية أوي يا أمي،  بتجيني تعريني وتشوف أحوالي،  تفضح البفتة البيضا في شمالي، تلمح اليافطة العريضة في حالي، تنزع عضمي من لحمي، وتصفي نيلي من دمي، وتقولي يا ويلي من اللي هيجرالي، أنا سلطان بلا جاه، مسحوب الإرادة وضعه زي الشاه،  المنسوب كالعادة للحزن مزوداه، مشطوب اسمه من الفرحة لو جياه، مغلوب أمره ملعون قمره بسماه، سلطان ازاي وشعبي اللي معايا ضدي وانتي انتي عليا مقوياه، الدنيا قاسية خابر يا خال، وهكابر ليه ما هي الدنيا قاصده، معرفش ليه صداني حته صدة، وأحلم ليه تاني ما الحلم صدا، هو الدهب بيصدي يا خال، ولا ده سوء حظ وفال،  وحلمي الفوق لازم له واسطة

عايز تخطف قلبي، هقولك ومش هخبي، عشان عايزك تخطفه، بس لازم تعرفه، قرب تعالى جنبي، وحبني على طريقتي، أهتم بكل التفاصيل، ده أنا لغز كبير، أسهر طول الليل، وأتكلم معايا كتير، بكلام جميل، وطبطب عليا بضيقتي أفهم في سكوت، بحب أنا ايه وليه،  في الوقت المظبوط، تختار تتكلم فيه،  أمتى بكون مبسوط، وامتى تزيد حيرتي

ده طبع حبيبي من زمان، يرميني بالنار يسبني محتار، وهو رايق وبياخد تان، ده أسلوبه و طريقته بالغرام، مبيشغلش باله عايش لحاله، بيموت في الغموض والكتمان، عايش الحياة زي أجازة، والحب عنده كأنه فسحة، يومه يعدي أخر لذاذة، ميعاده واحدة يجي تسعة، يقولي كلام ويخليني متحمس، أيوة كده هندلع بقى، وبعدها يسيبني ويروح يتشمس، حبيبي أعصابه باردة و بنج، أبقى مضايق وهو فايق، يسيبني أولع ويعمل شوبينج،

كنت فاكر الوقت هيخليني أحن ليك وأصفالك، كده بعد ما دوقت فراقك أتجن وأرجع لأيامك، بس دلوقت لما مع نفسي قعدت،  وبعقلي مش بقلبي كده  فكرت، أفتكرت قسوتك وأيام نستك،  ان ليك حبيب وفيها بعدت، ومع الوقت لقتيتني من لما بدأت، لحد النهاردة أنا بس اللي خسرت، أتكسرت بإيديك وبنظرة عينيك، اللي شوفت نفسي فيها ضعت،

 سيبتهالك مخضره، أشبع فيها سيطرة، أتحكم بناس صغيرة، لأ مش في حياتي  سيبتهالك مخضره، أشبع لوم وأفترى، هتعمل ايه يا ترى، لأ مش في اهتمامتي طبعاً دلوقت بتتقطع والحب بقى مقطع بعضه،  علشان أنا بس اللي سيبته، مش هو اللي سابني، وفي الهجر بقطع عليه وببوظ الشو في عرضه، كل حكاويك تصدع كنت لازم أودع وشك، مليش أنا كده في غشك، والله ده ربنا نجاني، يلا مرة استجدع وطلع العقد كلها على نفسك،

أنا هعمل جروب، كل اللي فيه قلوب قلوب، بتحبك زي وطبعا مش هلاقي اللي يحبك قدي،  فا هعملك من قلبي نسخ، تبدل فيها كل يوم، تحبك اوي وبذخ، والحب يكون بالشكل المطلوب،  دي النظرة منك بمية لايك و لاف، وكل كلمة من كلامك تستاهل تتلف، لفة هدايا دي ضحكتك الحلوة بمليون شير، تضحكها للناس تعمل فيهم خير، بس بضحكاية هعمل بمشاعري ليك أكبر حملة، تلف الدنيا تعلمهم فن المعاملة، من الناس الكمل أنا بعشقك وبعشقي بلحن ألحان، واديني أهو للغرام أحلى إعلان، بالملايين يتحمل

أنا مهما أتكلم معاه وأهاتي، وأحكي مشاكلي في حياتي، مش بيسمعني على طول، ولو سمع مش بيفهنني، لأ مش معقول، ده حتى محتاج ترجمة ايفيهاتي، مع إني واضح وضوح يخلي الأعمى ساعاتي،  أنا مهما أشرح ومهما هو رغى، احنا بنتكلم مش نفس اللغة، ولا نفس التفكير والأدمغة،  نتفق على حاجات بعد ساعات، بعد مشاورات وخد وهات، وفي دقايق ألاقي كل ده اتلغى، هو تملي سبب في معاناتي، لا بيفهم عتابي ولا مجاملاتي، دايماً مندفع كده ليه، والتمن اللي اتدفع،  العمر واللي فيه، ما هو بيضيع بشكل يوماتي، غلبت أقرب ليه لا نافع كلامي ولا شافع سكاتي، 

وقت عتابنا أنا كنت خايف عليك من كلامي، لأبعد الحدود، كنت هادي على غير العادي بس أنت كنت، شايفه برود، حتى في عتابنا مش فاهمنا مش حاسس بتعبنا، ولا بحبي الموجود، طب و العتاب ده لازمته ايه، وانت اللي براسك مقتنع بيه، الناس بتتعاتب علشان تصفى ولا الزعل يزيد  جاهزة المبررات كده على طول،  مش غلطان في حاجة من دول، ده انت عتابك عايزله وصفة وأسلوب جديد وقت زعلنا المرادي طول وبتتصرف زي،  واحد ميهموش، كرامتك قالبه على قساوتك مش بتفرق، قلبي مبتسمعوش، واللي مزعلنا تملي بتتحول لواحد تاني، أنا معرفوش، 

أنا وحيد، من أول القصة لحد أخرها وحيد، بفرح لوحدي والفرحة يادوب كل فين وفين، وبعزم بيها الناس تشاركني وناس تشكرني، وهي متكفيش متشبعش  طفل وليد،  والحزن معدي طولي وعرضي وضعفي مرتين، بيستفرد بيا مصمم يعاركني ومين يشاركني، لأ متلاقيش متدورش  ولا تروح بعيد، وأنا مش زعلان أنا غيران، لما بشوف لمة  أصحاب جدعان، بينهم مواعيد  كل الكراسي مليانة بالضحكة فرحانة،  وطرابيزتي ملانه، طالبة التجديد  وحيد بالتأكيد، بكون اجتماعي وايه يفيد،  عايش جنب كل الناس وكل الناس مش جنبي، والدليل اديني أهو بغني ومين يسمعني، ولو مجاملة مفيش  محدش مستفيد،  بالزوم والتقريب واحد غريب تقريباً معدي،  يخاف أعديه كده يعني ومين يهتم يعني، يموت أو يعيش  الكومبارس والسنيد،

مبحبش كتر الكلام والشو، وقلبه وشي بلاش تشوفوه، ثانيتين  النفاق أنفاق وكل نفق ليه مدخلين  زي وشوشكوا وقدامي كشوا بنظرة عين بطيبتي وقلبي النضيف، وكفاية مميزات عليهم مش هضيف، أنا الرحيم وأنا المخيف، وانت بالذات  يلعب معايا ازاي يا بهوات، وهو مش تصنيف ومش هقول هرم رابع، ولا أول ولا حتى سابع، هرم مين  اللي اتبنى من حجارة في سنين أنا بنيت نفسي لو مش متابع المشهد والسين محدش ليه عليا جمايل، محدش صحيح كامل، بس التقفيل يفرق ما بنا في الشدة والتحميل  وانتوا عيال أكبركوا فيه عامل ماجستير تحفيل  

علاقة سامه،  ودخلت فيها من قريب، روحي عنده مش مهمة، عايش بس عشان مهمة، أسمع منه وفيه أطيب، علاقة سامه،  وعلى ناره الهادية بتقلب،  ربنا يزيح عني الغمة،  بياخد كل اللي عايزه، وقلبي حافظه و دارسه، بيدوس على نقطة ضعفي، ويستعفي لحد ما يصفي،  قلبي وياخد عزه، ويستكفي بمزاجه وعني يعفي، علاقة سامه، بيقع فيها بس الطيب،  ياما إشارات كانت قدامي، قولت هيتغير علشاني، صدقت الكدبة ليه طيب،

مقدرش أقول كنتي بتحبيني، ولا أقول دلوقتي بتكرهيني، بين البنين مسافة الرمش للعين، احساسك اللي بينك وبيني،  عشت زمان ادي فيه كل الحنان، وقولت هيجي يوم تبقي معايا، صبرت زمان و دلوقتي أنا الغلطان، أنا موعدتكش بحاجة من البداية، ولأ متفهمشي ان ده معناه عيزاك تمشي مقدرش أفضل كده متعلق، والدنيا في عمري بتسرق، لا أنا عدوك ولا طايل حتى قلبك،  وبتتفرج و روحي معاك بتغرق،

مهما تعمل و تتمسكن، وتقولي بص شكلي، وفي الأرض تخبط و تدبدب، لا يمكن تاني أتجنن، ولا أتهف في عقلي،  وأرجع تاني أحب وأطبطب، جينا ندوق العسل من قلبك، طلع شوال بصل حبك، اتغرينا ايوة حصل في شكلك،  وكل ده طلع علينا ومحدش سأل فينا، جربت أشتري خاطرك، عملت بأصلك، وبعتني بالقوي راجع بتتأسف، خليك بحالك وبعيد، قلبي ده لسه جديد،  بشوكه وبشوقه المرادي هيستنضف، 

كل يوم فيه مبشوفكش مش بحسبه، شويا وقت مش مفيد ولما بشوفك مبعرفكش من حلاوتك،  اللي عماله تزيد وتزيد  بحبك حب متحبش، لحد في الدنيادي، وأوعى تقول عليه عادي، حبك عدى كل الحدود  حبك محتاج قلبين، وأنا عندي واحد،  وتعالى حتى فتشني فتش، حبي هيسد وبيه موعود كل كلمة بقولهالك وبعده بحس، اتقال زيها وملهاش عازه  بلغيها فوراً خد بالك وأقول، كلام متألف ليك طازة 

ده مبقاش غير المعيوب، اللي يطلع فينا عيوب،  وقدام الناس يقعد الأستاذ  يلف ويدور و ليه جمهور ما نوع ده بقى مطلوب، لو الكلام على المشاع ردي أنا خصك، مش خفة دم ولا بتاع ده من نقصك، لو عملت الصح فص ملح، انت يادوب وفي ثانية تدوب، احرق جاز وهات اللي في أخرك، وصدعني بالصريخ،  هيفضل الأسد أسد، مهما أتقال مهما اتحسد، والرد بإيجاز دمك كل مشاكلك، شربات فسيخ، ده مبقاش غير المعيوب، اللي يطلع فينا عيوب، وعنده مبدأ يقعد ويترستأ قعدة أسود وباين المجهود وغلطه فيه متعوب، عجباك كده الواصلة وبشرايني بقطع، انت بالنسبة لي فاصلة بقلم بيقطع، بوم طخ بس مفيش مخ، الرد أسلوب مش حدف طوب،

شوفنا زي ما تحب تشوفنا، حبينا بجد وحبك ما خلى،  مكان لحد وفي حياتنا علقنا، افتكرنا بنتسلى احسبنا بنتخلى،  الحب أهو عاش مع حبيبه، والحلم كان حد تاني نصيبه، وفضلنا زي ما أحنا، عمر واقفين مكاننا، القلب عنده دم في عروقه،  مبقاش ماية إلا في شوقه،  لغيرنا ناس بتتمنى، بعدها ربنا ما يوفقنا، ظروفك طب فين ظروفنا، تحب نعدهالك ما احنا عدينهالك،  مرة والف وعشنا نحلهالك،  وقلبك خف وراح يفرح وسابنا،

أغنية تغري الزبون  قلبك بيتاجر في غير المباح، معروف كده قلبك بالعالم أخطر سلاح،  بتبيعي وتشتري في الأشواق، لكل حب سعر في الأسواق،  بتكسبي من الغرام ورزقك من الجراح، وفيه اتفاق كله عندك مباح، مصنوعة من كل كدب وزيف، عيون حلوة تغري الزبون، متريش ويقدر يكيس، صاحب محل ابدا مش ضيف، لحد ما يبقى بالهموم مديون، وفي الاحساس يفلس،  حبك قنبلة منزوعة الفتيل، شوفي في حبك كام عاشق وقع قتيل، زعلوا عليه أهله وأصحابه،  وانتي رد فعلك كان عتابه، ازاي يموت قبل ما تقولي ليه كل تعديل، لسه حسابه معاكي تقيل،

والعمر لو لسه فيه سنين، هحبك فيها و أشيلك ف العين، ونلف الدنيا حته حته سكة سكة ونضحك ضحكة، عالية تصحي كل النايمين  لسه لما بشوفك جاي، الدنيا بتلف بيا، واللهفة هي هي، زي مواعيدنا الأولى،  طب ازاي معقولة، اه معاك دي حاجة عادية  والعمر لو لسه فيه أيام، هنعيشها سوا ولأ مش هنام، نروح أماكننا ونسيب أسامينا تفكرهم بينا وبليالينا، نعيش اللي فاضل زي الأفلام والعمر لو لسه فيه ثواني، هتفضل بحضني نغني أغاني،  مفيش وقت يضيع باللف هنقعد والكتف جنبك الكتف، وأقولك مليش حبيب تاني

أغنية فاهم غلط  فاهم غلط يا حبيبي،  أنا مش بستناك، ولو روحت ولا رجعت، مش بفرح بلقائك، حبي وشوقي غاليين، وقيمتك من قيمة السنين مش العمر، تروح سنين دي مجرد وقت، مع ورق النتيجة قلبي رماك،  حضني مفتوح لهواك مش ليك، واحشني أعيشه بيك مش معاك، يعني بحب الحب اللي طالع مني  وروحه اللي فيك مش اللي جواك، فاهم غلط أكيد، مبقتش بتمناك، مخلص لحبي بالتأكيد، بس مبقتش فداك،  احساسي قيمته أعلى، ليه تقدير ليه معنى ولأي حد، وفي موضوعنا انت كده بعيد، بالأحساس وبالعين والإدراك،

أغنية كلامه مطره  حبيبي لو زعل تتقلب الدنيا، وفي ثانية إلا ثانية، يبقى حاجة تانية، وشه يحمر ويقول يا شر اشتر،  لو قولت بس حرف جر، الموضوع مش هيمر، ردوده سم ومر، وحبة بوم وحبة طخ،  جماله و علامه يطيروا، تهديه دي فيها مخاطرة، كلامه مطره تنزل ترخ، برستيجه نسبته زيرو، يجيوا يشوفوه اللي بيغيروا، وهو طافي المخ، حبيبي لو بس ساعة قلق، الدنيا تولع وتتحرق، واحد جديد اتخلق، أوعى تغشه بيشاكل دبان وشه، كل الغضب اللي حايشه، يطلع عليا وأمعلشه، لحد ما أعصابه يفشوا، ويروحوا ويمشوا بخ،

أغنية والله أنا صح لو عايز مني حاجة يسمعني أحلى مدح،  لو ليه عندي حق بياخده تالت و متلت، ولو أعاتبه في حاجة يفضل يعيط ويسح، معقول تقولي لأ وعلى قلبت وشه يثبت، طب والله أنا صح، وهي ديا حالته،  مش عارف حقيقته ولو بيها واجهته،  يبين طيبته ويرتبك للصبح، تقولولي كنت سيبته، هيعرف قلبك وقيمته لو بعته، طب وهو ده يصح، لو مرة يكون رايق يصدعني بكمية رغي، وساعات كتير أكون أنا أخر واحد يعلم، طول عمره لما أضايق يهز دماغه بالنفي، وزي واحد مجنون مين يهتم لو أتكلم،

غنيوة أكمل سعي  قدامك يا روحي بينزل عليا الوحي،  وأقول كلام زي بتاع الأغاني والأفلام، مقولتوش قبل منك ولا في الأحلام،  كده تمام يعني أكمل سعي، حبك ده حاجة كبيرة عليا، محلمتش بيه ولا يجي بخيالي، قلبك ده حاجة كده عالمية، تحبني أنا لأ ده أنا حظي عالي، معاك يا قلبي أنا بفقد الوعي، ومحطتش منطق غصب عني مش مصدق، شاورلي انت بس منين أقدر أبدأ، وأنا هنطق ومش هبطل رغي،

أغنية اه قول كده  اه قولتلي، ليه كنت عليا بتفتري، وتبيع فيا وتشتري، مراهن على طيبة قلبي  اه قول كده، الطيب دلوقتي المشكلة، يستحمل من ده و ده، ويداري في دمعته ويخبي معذور بجد ومعاك حق، وأنا اللي أستاهل الحرق، محظوظ وقعت مع حد زي، واحد مبيقولش لأ، والله عتبتني، أحب تاني و توبتني، ما كنت بتقول بتحبني، كسبت ايه غير الأذى 

أغنية يا جحا ياللي ماشي توزع اتهامات، وتظلمني كل كلامك مليان مبالغات، و مفقوس  ليه بالسر تبعتلي سلامات، و تبوس  وقدام الناس تقول مفتري، وتشيطني بيكسب تعاطف بالنهنه، مكلف وصارف في النحنحه، بيستعطف الناس عشان تصدقه، بس الناس عيونها مفتحة، بتسمع وتضحك يا جحا، بيحب الدراما وبيعمل مسلسلات، هابطة بيشوف نفسه ملاك بجناحات، بعينه  ويحكي ياما ويلم لايكات، تعينه  يكدب ويقول قلب أبيض، زي البفتة

أغنية انت أستاذ  انت استاذ شاطر، في القسوة تفتح سناتر، وقدام الدنيا تحاضر، وتألف ألف كتاب  انت استاذ مميز، نقطة قوتك بتعرف تمييز، مين تجرحه كويس، ومين تديله عذاب زعلان بقى كده علشان، كام حكاية  عدوا من تحت ايدك لبر الأمان، والنهاية مكتبتهاش بإيدك طب والله ده جنان لأ بلاش ثقتك تقل، عشان مستواك حبة قل، هتلاقي أكيد حل، وأنا أهو أكبر مثال  بعترف قدام الناس، غبائك مالوش مقياس، كبوة وتعدي في الإنجاز، لسه أذاك شغال

غنيوة أنا شفاف  ازاي تخاف هو ايه أنا شفاف، قولي إزاي تحس بخوف وانت معايا، بقولك لأ الكلام ده مش على هوايا، والله وبحلف من البداية،  الأمان أضعاف والفعل إنصاف،  خليك شواف وحس باللي جوايا، عايزهم يقولوا يا عيني حبيبه عايش قلقان، عرضه و طولوا واحساسه بحبيبه كله كلام،  لأ بقى ده لا عاش ولا كان، عايزهم يشوفوا بعينك حيرة وحبيبك موجود، خليهم يشوفوا فرحة كبيرة معرفتهاش قبلي، بحلف و الله خير الشهود، 

أغنية  ولتصحبك السلامة روح روح يا خاين الأمانة،  روح على بلدك وغير جلدك، وانت شاطر فيها بالأمانة،  ما دي عوايدك ،وسنيني تشهدلك  روح روح ولتصحبك السلامة، أشكرك على صبرك وعلى تعبك،  اديتني من خبرتك في الملامة،  وأكون فيدتك، ومضيعتش وقتك  أتعشم تكون اتبسطت، معايا طول الوقت، سايب لي ذكرى وعلامة،  هفتكرها يوماتي لأخر حياتي، وعايش فيها زي الدوامة، بخطتك خلاص نجحت مش هنسى الدرس، عندي طلب واحد بس،  يعني روحي فيك عشمانه،  احكي قصتي وخيبتي وكسفتي،  وكل اللي عملته فيا ياما، من غير أسامي بس،

أغنية مع أطيب الأمنيات بالتوفيق  عايز تمشي أتفضل، وهوصلك بنفسي للباب، يارب دلوقتي تكون بتمشي  وانت راضي والخدمة خلتك سعيد بديك الفرصة تفصل، على مزاجك الأحباب، عايز حاجة تاني متتكسفشي  قول عادي يمكن حاجة تفيد و بألف السلامة ومع أطيب الأمنيات بالتوفيق،  وأمنتك أمانة تخلي بنا مسافات مش بتضييق، متقطعش الجوابات، وانت عارف طريق البريد هتحتاجه في النهاية لما كل الحكايات تخيب، وهتتكسف من المقابلات، وعيوننا تتلاقى من جديد عايز تمشي طبعاً، ممكن عادي مش مهم، بس وانت ماشي خلي بالك  مبقاش مكانك وهجيب فرش جديد واعمل حسابك أحسن، في حاجة لحرقة الدم، اتبطرت على الجنة روح لنارك  وانت بارد ابقى شغل التبريد 

أغنية احنا خلاص  حبيبي خلاص بهديك مفتاح الخلاص،  وباخدك من ايدك أوديك للناس،  مفيش بنا مواعيد، ولا سهر وتنهيد، ولا خوف وتهديد،  مكنتش مبسوط و ده الأحساس، شوف الجديد احنا خلاص، ومش بلعب دور الشهيد، ومش ملاك بالتأكيد ولا شمعة بتتحرق كده وتقيد، كل الحكاية صاين للنهاية ذكرياتنا الحلوة حوايا، حتى وانت بعيد لسه إخلاصي ليك برضه مفيد، ومش فداك أكيد ولا هضحي بحاجة مش هتفيد، بعمل العادي الطبيعي وراضي غريب بقى للدرجادي، لازم أبقى عنيد ونجيب في سيرة بعض ونعيد، ومش بهواك مريض متخليش عقلك يروح لبعيد،  هشوف حياتي وأرتب ترتيباتي بهديك بس أمنياتي، تعيش مرة سعيد ويدخل الفرح حياتك ويزيد،

غنيوة مفيش مننا  اللي بيسأل عننا، لأ مفيش مننا،  ولا اتنين زينا، دايبين عاشقين، ومش شايفين  حد غيرنا هنا، ياللي بتسأل عننا، احنا اللي في تاريخ العشق بنراجع،  احنا اللي هيكون حبنا أهم مراجع، احنا اللي مهما زاد عشقنا متواضع،  وبراحة عليهم يا روحي هما مش قدنا لما بنمل ننزل سوا نلف الشوارع، واحد يتكلم والتاني مركز وسامع،  على بعض تملي نتعكز وايه المانع، بالصراحة بنعدي كل حاجة واقفة ضدنا

أغنية عرفتي قيمتي  عرفتي قيمتي، طب والله ضحكت، يعني بعد ايه  واصلاً كل ده كان ليه، مش فارقه دلوقتي،  معايا ندمتي ولا عقلتي،  لفي وخدي الباب في إيدك ومعاكي الأسف، عنوان القلب اللي ليكي اتوصف،  غيرته بعد ما بعدتي، خفي وابعدي مش حبيبك ولا مقدر ظروفك، بقولها بوضوح مش عايز أشوفك،  حبة كرامة لو سمحتي، يا بنتي يا حبيبتي، أنا خلاص بعت، ومش مهم ليه  كلام ومش هناخد وندي فيه، ومش هضيع وقتي، خلاص انتي كده قديمتي،

أغنية وأنا مالي حضرتك  بتسوق ليه دلوقتي عليا معارفك، علشان أسمعك بس شويا، مش أنا اللي على حسب وصفك،  تقريباً على ما أفتكر، كنت يا عيني في الحزن خاطفك، بنيمك وأصحيك على قسية، عرفت غلطتك طب وأنا مالي حضرتك، دي مشكلتك و قضيتك،  طب جربت تطفي وتشغل الجفا،  الناس جرحتك وانت الله وأكبر على رقتك،  سكتي مش سكتك، انت بقيت مطفي ويلا بالشفا، موديلك ايه قولي بس التقييم، لغتك ايه عشان أكلمك، عامل حركات بلدي وشغل قديم، ده العفو عند المقدره،  ومش قادر أسامحك وانت عديم، الاحساس ازاي بس أفهمك،

أغنية بطلناها الشغلانة ديا  اهلا إزيك واحشني ممكن نتكلم شويا، طب ممكن تفكرني بأسمك وتقوله ليا، معقولة مش فاكرني، أنا حبيبك اللي ياما كنت ليه بتغني، بعادك والله واجعني، وشوقي ليك هو اللي تاني رجعني، فوق يا بيه مفيش حاجه زي ما هي،  وشوق ايه ده اللي باين في عينيا، بطلناها الشغلانة ديا، وبفكر بس فيا، بقعد مع اللي بيضحكني، عارف اللي بيبسطني، والعمر ضاع معاك في مناهدة ومهاتيه، بطلناها الشغلانة ديا، والله مش بإيديا، بختار الهدية اللي تعجبني، الوحدة مش هتبلعني، عايش على مزاجي وقتي كله ليا، اهلا إزيك سلام ده كل اللي ما بنا، راضي بكده تمام مش عاجبك ودعنا، براحتك عيش الأحلام، اتحسر وكسر وأعمل زي الأفلام، أنا نسيتك أوام، ومتنساش تقعد بالضلمة وتعيط بالأيام،

غنيوة يا حبيب الروح  يا حبيب الروح، أنا هنا ومش هروح ولا هبعد، ولا عندي طموح أبعد من وجودك قدام عينيا أطمن ويلا قول، وأتمنى على طول وأسرح،  هو كنت أطول ألمح بس طيفك يكون حواليا أعتبرني كبريت يولع في سعادة، ويقيد نور صباحك، أعتبرني مخاوي عايش كالعادة، يداوي كل جراحك، أعتبرني خارق مجبتوش ولاده، خالق كل أفراحك، شوفني الصاحب اتملي هو العازم،  ويحاسب في الخروجات، خليني الأب الشديد والحازم، وبالقلب كل الحنيات، وأنا الحبيب اللي هيفضل ملازم،  والطبيب وكل الحاجات، 

أغنية زي ماتحب تقول  عايز مني اية تاني، راضي وكله مجاني، ألعب أنا دور الجاني، وانت تبقى المجني عليه، سيبتك تكتب قصتي، أحكي للناس قسوتي، يدوني من اللوم حصتي، وانت قلبك يتطبطب عليه، قول فيا زي ماتحب تقول قول،  ريح نفسك وطلع براحتك اللي جواك،  حسن من صورتك قدام اللي بيستنوك، ومفيش مانع تطلع روحك ملاك،  وزود حبة كمان على كل دول،  كمل حياتك وشوف كده اللي وراك،  معملتش أنا كده علشاني، وانت عارف لو مكاني، هتخاف وهتبقى اناني،  مش هتعملها ولو مجنون، محدش قال إنك مقصر، مطلعك كسبان وانت بتخسر،  بس بعد ده كله مستخسر، تبين تقدير في العيون، 

أغنية المادة الخام  مهما نعمل لهم أحسن عمايل، ومهما يجي بدالهم القلب برضه لمكانهم شايل، وهما ولا على بالهم الحب اللي علشانهم قايل،  أشعار بالنهار وبليل أغاني وهما في عالم تاني،  وبنسوي تملي لقلبهم الهوايل، المادة الخام للبخت المايل، وفشل عام بكل أختيار،  الناس والأحساس، والطريق اللي يتداس،  لا برافو و هايل  المادة الخام لسوء الطالع، وفشل دام طول الأيام،  الحياة والمعاناة، والصديق اللي معاه،  والدمع اللي سايل  الكلام كله من القلب طالع،  صادق كل حرف من الشوق الوصف وانت طالع، وهما من أنهي صنف بالذوق واللطف أنا طامع،  بتلام بالسلام وبعيون قوية وأنا هو الضحية،  تضحي وانت ساكت سامع، 

أغنية عايز تحب  عايز تحب طب بتعرف تعد، أصل الحب مش بتاع ورد،  اه هو جميل ولطيف وبيعمل جو دمه خفيف، بس في الأخر زينة، شويا ويدبل ويتبدل الود، وتبقى حكايتك حزينة، ونهايتك زيه مصيرها الأرض، الحب في زماننا غالي، تسمعه كده في الأغاني، قلبك ده مش وقته وهو ده الحال  الحب في أيامنا أحلام، تتفرج عليه في الأفلام،  تعيشه على حقيقته درب من الخيال عايز تحب طب ما تبطل طيبة، أصل الحب ده بتاع اللعيبة، اه هي جميلة ومطلوبة تمثل بيها الأدوار المكتوبة،  غير كده محدش هيسقف، ياما جربت كسبت الخيبة، وبجد مش عايز أسخف، جايز قلبك بيشوف الغيبه،

غنيوة واقفة ومربعة  انتي في قلبي قاعده كده متربعة، مأثرة فيا وطباعي بيكي متطبعة، مين ينافسك إلا بس نفسك  يسمعوا حسك يتلموا بأستك وانتي واقفة ومربعة،  طب مجمعه، اللي حبيتيه حالته ايه، ومحظوظ جداً قد ايه،  لو أتجنن والله ده قليل عليه، انتي سبب قوتي مضروبه في أربعة، سر سعادتي و شجاعتي اللي مسمعه،  الجمال خصك يطول بوصفك  وينزل يعاكسك يطلبك عايزك وتقولي معلشي متسربعه،

أغنية انت لسه هتفكر  محدش بيتعب في الحب، غير احنا العبط، بنختار بعناية كل حكاية، والنهاية ياعم نشبع لطم  بنحب قلب لا ليه مرسى، ولا باينه شط، وماله تمام القلب عوام، ياخدنا لحم ويرمينا عضم هو انت لسه هتفكر، العيب عمره ما كان عيبه،  هو جامد ومسيطر، العيب فيك لازم تجيبه، تتعلم بقى وتتشطر، ولا يفضل قلبك هو ونصيبه، الحب مش عايز ناس، بيضا وبيور، وقلب واعي يقدر يراعي، عايز حد يعرف يرد الطاق طاقين ومش بيحس، ويلف ويدور، بحقه يتبت تالت متلت، وتعرف تسد قدام العند

أغنية على طول الخط  اللي تعمله العجب، وقدام منه تتغلب،  وتكون معاه في منتهى الذوق والأدب،  هتشوف منه قسوة للركب وغباء تفضل كويس على طول الخط،  لا تشتكي ولا تتغير، تبقى كده حبيبه،  وفي جيبه الصغير، تتشال وتتحط، وبحنية فيك يمن بيها عليك،  مش حب لا سمح الله فيك،  ده بمزاجه مش أكتر، اللي تعمله اللالي، وفي مقامه تعلي، تشرب في هواه المر بداله وهو يحلي، هتشوف منه الوحش تملي كإهداء 

أغنية الحبيب لو نسي  مش همانع ولا هستغرب، وأنا شايف بعيني وبجرب، الأذية جاية من الغريب، بس إزاي يأذيني القريب، من غير ما يحس بتأنيب،  أفهمها إزاي دي طيب، الحبيب لو نسي فترة عذره بيكون معاه، يمكن خلصت طاقته، محتاج ياخد مساحته، بيسيب بس بتفضل مكانته وبستناه  الغريب لو قسي وكان قصده وعلى هواه، يمحي الحلو بعناده، يحيي الجرح قصاده، وأساليب بيعملها في بعاده وعجباه طبيعي كل اللي مشافشي، ومقربش مني ومعرفشي، حنيتي وخيري فيا يعيب، قادر أفهمها وأقول معلشي، أهو جرح كأنه محصلشي، لكن انت لأ مقدرشي،

غنيوة لا تخاف ولا تقلق  يا حبيبي لا تخاف ولا تقلق،  ايه يعني في الأشواق نغرق،  دنيتنا اللي جاية بتاعتنا، الماضي عمره ما هيفرق، انا أهو مارد وبين ايديك، بيقولك أحلم شبيك لبيك، كل الأحلام اللي عينيك نسيتها، هرجعلك سيرتها تعيش حلاوتها، وتتحقق في لحظة ليك، بحبك جامد وأشواقي مجانية، عايش عشانك وروحي الجنية، بتتمنى بس أمنية تراضيك،   وتفرح فيك بالسعادة تمليك، في كل لحظة جاية،

أغنية زي ما هي  فاصلة، الدنيا ما بنا فاصلة، قصاد بعض وكل واحد في أرض، مفيش بنا حاجة واصلة، فاصلة، كنت سايب بنا فاصلة، والنقطة حطيتها والصفحة انت طويتها، أستعجلت وكأنها ناقصة، لسه الأشواق زي ما هي، لسه كل حاجة طبيعية، ولسه الحنين في مكانه، بين قلبي وروحي بيتفسح، ولسه الحب قافل دكانه، مش راضي يفتح، مآنش أوانه ولا متفق معاه عليا، خالصه، مشاعر كانت خالصه، وحب طاهر ولا يتاقل بجواهر، ليه يدخل مع الدنيا مناقصة، 

أغنية مش بتحرم  يا حبيبي يا روحي يا ابن اللذين،  بقى بتسيب حبي أنا وقلبي هنا، وتروح للي بيعملك البحر طحينة، ويضحك عليك بكلام حلو و زينة،  وطبعا تخيب من هنا وترجع تعيط من هنا مش بتحرم ابدا ولا بتبطل، يعني قولت عقلك متعطل، طب مشاعرك فين مش متشافه  بدباسة بتخرم قلبي بعمايلك، بتعاقبني عشان قلبي مايلك، و ده إدمان لازم منه تتعافى يا حبيبي يا قلبي يا نور عينيا، مش بتعرف قيمة الورد إلا بعد، ما بتروح تدي لغيري اللي ليا،  وتخربها وأصلحها أنا ما أنا لقيه، وترجع تحلف وترد اتعلمت وخلاص بجد،

أغنية أصبر كده عليا  أصبر كده عليا شويا وليك روقه، أصبر على رزقك هفوق لك حاضر،  جهز نفسك هحاسبك وأعمل بروفه،  ولا حاجة هتنسيني و وريني يا شاطر، تعالى نفتح لبعض الدفاتر، مين كان موجود، ومين بيقول مش فاكر، لو اتزنق في الردود،  تنكر انك مطلع عينيا، و القديم والجديد عليا، لو هتكدب يشهد علبك الماضي والحاضر  تعالى وأقف قدامي لو قادر، بطل بقى خوف، عايش معايا الغايب الحاضر، و عذرك معروف، مخدتش بالي مش متأكد، مكنتش والله أقصد،  نص ومحفوظ فالح تنظر عليا وتحاضر 

غنيوة خلي بالك  وخلي بالك من عقلك، اللي جاي جنان، أصل حبيبك كان مجنون كده من زمان،  ولما شافك روحك وجمالك، حالته زادت، والله من حلاوتك ممكن ياكلك انت متعملش حاجة، اقف كده و ربع،  حبي ليك مطرقع، واللي فات هنعمله بالونات،  و بشوقنا يفرقع  انت متتكلمش كتير، حضورك مسمع، على الخير هنتجمع، ونعيش أيام ولا الأفلام، و بمزجنا نتدلع خلي بالك من روحك، انت مش قدي، سعادتك دي عندي أنا واخدها تحدي، طب وحياتك لأخلي حكاياتك، كلها فرحة، أرفع براحتك سقف طموحك

أغنية اللي علم التاني  معرفش مين انتي يا حبيبتي ولا الدنيا، بس اللي علم التاني القسية، معرفش لمين أبعت سؤالي ويرد عليا، عايش سنين والحيرة هي هي، نفس الطباع والحب اللي اتحب وضاع، و الصورة اللي مش كاملة، نفس الطريقة والحقيقة اللي مش حقيقة، نفس البيئة اللي ساوت الشاري باللي باع، الاتنين ازاي نفس المعاملة،  نفس الكلام اللي بتقولبه حبيبتي أيام، الدنيا قالت زيه للكون،  نفس الضغط والسخط و الأوامر بالشخط،  ورسم الخط اللي أمشي عليه حتى بالأحلام، بدل المرة يجي مليون،  نفس المصير اللي مش عارفه حد غير، انتوا ليا للعبة العروسة، نفس العقل والشكل والاحساس بالتقل، وبرضه النقل من السعادة لأقله التقدير، بمنتهى السهولة ولمسة ودوسة، 

أغنية الوضع الحالي  أنا هفضل شاري طول ما أنا غالي، وعادي أبيع ولا أتوه ولا أضيع،  لو افتكرت حبي هيفضل ساري، تحت أي ظروف زي الوضع الحالي، أنا مش تمليك ولا رهن ايديك،  زي ما من قلبي بديك، مستني المقابل، تفتكر يا أصيل أشوف منك تقليل،  وتحسسني ان ليا بديل، وافضل قابل، لو اديك عينيا تردهالي حنية، ويمكن أكتر شويا، والود متبادل، أنا مش جني وبأحلامك مداينني، أحققهالك و تسيبني، خليك عادل،

أغنية مش بقولك  الدنيا لو قاسية، لم قساها اللي بعينك رخصها، مع اذاها اللي جاي من ناسها، حطوهم بكيس يكون مقاسها، وطوحه بعيد من افريقيا لآسيا  مش بقولك متزعلش، لأ أزعل بس متشيلش، وخلي الصبح ميطلعش، غير وضحكتك هي الشمس أوعى حزنك ياخدك، ده أحسن وانت لوحدك، تقدر تاخد وقتك،  و تتعلم ازاي متبقاش باللمس  الدنيا لو ظالمة،  خد الظلم وسيبه على بابها، وفي الحلم صاحبها وسيبها، ما هي الدنيا ليها أحبابها، تنور لهم وتخلي الباقي ضلمة

غنيوة أنا جاهز  أنا جاهز أشيل الحزن ده من عينيكي، وأرجع النور اللي انطفى فيكي،  أنا جاهز وعايز انسيكي، كل لحظة قسى في ماضيكي،  الحزن مقدرش على جمالك يغطي،  وأنا مقدرش غير أعملك من روحي طريق،  تمشي فيه وبكل سلام تخطي،  ترسي وعيونك تنام على شطي،  أنا جاهز أشيل حملك فوق كتافي، بقولهالك أهو معايا أوعي تخافي، أنا مخلص وبنفذ وشافي، وأفتكر ده كله يكون وافي، 

قصيدة الغراب  انا الغراب العراب، وش الخراب،  اللي معشش في كيانك، وملوش محل من الإعراب،  انتي الحكومة وأنا إضراب، انتي الوطنية وأنا الانقلاب، الغلط فيا وانتي على صواب، شيفاني خطية ومشاعرك حجاب،  ازاي أكون حارسك وخوانك، إزاي هنكون اتنين أحباب، من امتى الدومة، بعد اكلها بيفضل ليها صحاب، بتتشاط مهمومة بهم الطلاب، قرف الدراسة ونرفزة أستاذ، حصة علوم وفيزيا وحساب، انا حزن سنين الشباب، وانتي فرحة حصة الالعاب، ورحلات الجامعة وكل ما لذ وطاب،  فا ازاي ممكن افكر يتقفل علينا باب، شايفك ديني و إيماني، رفضاني بإيمانك،  وبتستغفري بعد رد السلام اللي حياني،  زي العاصي و عن ذنوبه تاب، ازاي أكون حارسك وخوانك، إزاي هنكون اتنين أحباب، أنا الغراب الهراب، ملك الإنسحاب، من كل قصصك وحكاياتك، كده وبدون ذكر أي أسباب،  مع اني مهتم وبهمك متصاب، انتي الضحكة وأنا الاكتئاب،  انتي الكاش وانا الاكتتاب،  حبيب بكاش والصدق غاب، كتباني بالرصاص بمذكراتك، وكلام رصاص فيا يغتاب، وقبلت ألف لوم، وكنت عادي بالأيام بتساب، حزين مهموم نار وعذاب،  شوقي حموم حنيني مسموم،  أحساس...

غنيوة مبروك عليا  تعالى نروح مكان فيه بحر، وعليك انت الجمال والسحر، نقعد يومين ان شالله شهر، الكلام معاك مش هيخلص، خليك معايا وقدامي بالتحديد، بتفائل بيك في كل الجديد، العمر قدامنا نحكي ونعيد، ليه نستعجل ولا نلخص، مبروك عليا انت، طول عمري محظوظ، بس معاك حظي اضرب في ستة، حبني زي ما تعوز، بطريقتك إزاي وامتى، تعالى نسهر سوا بالساعات، مش مهم لو المهم ميعاده فات، حياتنا سوا أهم الحاجات، الا شوقنا كله بيخلص،

أغنية روحي و دنيتي  ده اللي تعبت علشانه، بدل ما هو يديني حنانه، وراني فنونه في جنونه، ساب لي الحزن مكانه خسرت جمال روحي و دنيتي، معاه مش بعده، خد كل حاجة وهو اللي سابني وفارق، شيلت من على وشي ضحكتي، واديتهاله رسمتهاله، عجبته الضحكة بس صاحبها مش فارق، كنت بحفر في البحر، زي اللي معموله سحر، وكان مميز جداً ومحفز، تديله عينك مهر