أشعار الأراجوز

عشقي ليكي ضد القوانين، مع الطبيعة و ضد الدين، ومين اختار يحب مين، ياللي ماشيين بالكره تسترزقوا، تدوا ده لده وفي دول تفرقوا،  الحب بالحب يتقابل، ده العرف اللي بيه نتعامل، مش مهم مين رافض ومين قابل، القلوب قبل التقاليد اتعملت في الإنسان،  حبوا بدون مقابل، حبوا بعض حب كامل،  القلب ميعرفش غير الحب الشامل، وده الشيء الوحيد المفيد كده للإنسان،  عشقي ليكي مقلبش الكون، مقامتش القيامة قبل ما تكون، ولا زاد الحكومة ديون، بقيت ملعون عشان حبيتك، موافق باللعنة ومنها خبيتك،  عشقي ليكي بقى خطر، و شر وفتنة للعالم وبطر،  وهما عن الشجر منعوا المطر،  ياللي وتر عودكوا سكاكين، لحن موتى بالقبور ساكنين، 

كنت فارش لك بالدهبات القلب،  وانتي عملتيني تمثال من فضى، كنت في ضهرك أنا أكبر حزب، كنتي في ضهري شوكة معارضة،  محدش هيفهم كلامك، نظرة عيونك في ملامك،  محدش حافظ أحلامك، بيجري يحققها بدالك،  وانتي في مكانك، محافظه على أمانك،  غير اللي مش معبراه، ومعتبراه حاجة عارضة  كنتي ليا الجرنال الخبر والعنوان، كنت ليكي مجرد سطرين بفقرة، كنتي الحقيقة والطريقة والكيان، كنت احتياطي عندك لحد بكرة، أنا مجرد تجربة بلونة اختبار،  تعرفي بيها السكة ترميها خردة، كنت الحارس والمرشد والنهار،  كنتي الخوف وقلبي بيه صدى، 

حبيت زمان مرة واتنين، بروح بالحنين، برجع لما أسمع حرفين لام والف، كلمة لا بس بأسلوب مختلف، كده حبتين، وقلبي عرف هبقى وحيد، لأبد الابدين، وشوفتك انتي شجرة كرز، ومع ان سكتك كلها غرز،  مع ان الخطر رن الجرس،  راح لك قلبي بالحب معبي  رجعت أحب والقلب غرز،  لا أتعلم من اللي فات واتعظ، وكنت فارس جايلك بالفرس،  والرد رفضي راجع مفضي درس تالت بقلبي جرح، ما أنا كنت تايب وليه سمح، القدر اشوف وشك السمح،  يوم الصيام عن الغرام ضربت الأرض الورد طرح، راح لحدك تعب وشرح،  رديتي انتي والرد بلح، مسموح الكلام معاكي بالأحلام 

أنا على الأمل مدمن، انسان متفائل جداً، معرفش غير كلمة ممكن  يحصل عن قريب، تقدر تقول ساعات، أنا مدمن محاولات، بعافر واتمنى حاجات  مين يعلم الغيب،  مهما الصياد اصطاد، عدد السمك بالبحر زاد، وياما نجوم وقعت، شوفت السما طفيت،  مهما أغمق السواد،  منه درجات فاتح يا واد، غمض عينك أسكت، من الضلمة دي تفلت، قالوا عليا نحس، بس معرفش اليأس، أنا عايز وليا نفس أحقق اللي حلمته،  قالوا بوشي لأ، قفلوا البيبان والسكة، قلبي يديني زقه أكمل اللي بدأته، اللي يسيب ويخون، واللي عليه أهون، واللي بيكسر بأيد الهون  في مجاديفي وحلمي، النهاية مش نهاية، مهما قالولي كفاية، طول ما النفس جوايا،  هفضل أحاول وأجري،

قفلت باب قلبي وراه، عايش بس على ذكراه، وقولت لنفسي ولقلبي، متبقاش لو مش هتبقى معاه سألوا هتقبله لو رجع، وهو ايه راح في مرة و رجع،  غير الندم غير الوجع  حبيته زمان و راح لحاله، ليه يرجع وايه يغير احواله،  دلوقتي في حبي وقع  صعب أصدقها وبأقول وماله، ياريته يرجع وأنا أعمله البدع، قفلت قلبي ورميت مفتاحه، قفلته بأفراحه وجراحه، مش عايز حاجة، من شجر التفاح غير تفاحه

 أصعب النهايات  هي النهايات اللي بتتساب مفتوحة، بنفضل محبوسين جوة تخيالات، نعيش الجاي ولا نستنى اللي فات، وتاخدنا الاحتمالات  بنعيش حياتين واحدة طموحة، والتانية كل ثانية فيها مجروحة، وبتعدي سنين وفرص للبدايات، من حقك تقولي رأيك، وترفضيني بلأ براحتك، اختارتك، وانتي قدامك كل الاختيارات  ومن حقي أقول بحبك، واستنى رد فعلك، افهم قلبك، عشان مندخلش في متاهات  ايوة ساعات  كلمة لأ وجملة خلاص خلصت، بتريح وتنهي تعب المحاولات، مكنتش محتاج منك إجابات، كفاية السكات  اللي سمعته جواكي وبيه وضحت،  وعينيكي اللي في الأرض بصت، قفلتي بيها حكايات و حكايات،

بتلوم عليا علشان قولت، وبحبي لها صارحتها، في وقتها ولا خوفت، يا قلبها ليه سكت، كنت عارف ردها، بان على وشها، واللي ما بنا انتهى، حالا دلوقت،  سامحيني  لو كان فيه فرصة ولو نص في المية،  تحبيني  مكنش ينفع اسيبها تروح من ايديا، بتلوميني  أنا أسف غصب عني صدقيني،  اعتبريني كده بخيالي سرحت، بتقولي ليه بس اتكلمت، مجاش في بالي،  انك تهواني وفيا دوبت، يا غالي ولا لمحت،  انت عارف حالي، قلبي فاضي خالي، كلامك موج عالي، وأنا فيه غرقت،

عيونك دول، جابوا فيا مية جول،  وقبل ما افكر، تقولي يلا حبيبي سنتر مش بلاحق، على جمالك وبقلبي بسابق،  يمكن مرة أقدر، ابقى في قوة عنتر وأهد الكون لو تحب، واخليه يكون  على شكل قلب، ايوة قلبك انت  واغير قانون الحب، ما أنا مجنون  و عاقل وبغير وصعب، عايزني ازاي انت  كلامك ليا، بيسحرني جداً ويحير فيا، قول كمان وكتر، وخلي قلبي هو الدفتر مفيش زيك، والله مش عشان بحبك، انت لدنيا السنتر، وعلى منطقة الجمال مسيطر

أنا عمري ما اتحبيت، ولا حد اتمناني، وكأن قلبي فاضي على البلاط،  وطالع من احساسي ريحة شياط،  قالوا النصيب متقسم بالغيب ٢٤ قيراط، مفيش ولا واحد منهم في الحب جاني،  فاتح قلبي تملي،  في عز الحر وبرد طوبه،  لا حد شافني ولا مالي، والوحدة عليا مكتوبة، أنا طول عمري بتنسي، ومحدش بيفتكرني، وكأن روحي صحرا زي السراب،  وكل اللي عملته رده عادي يتساب،  قالوا النصيب لازم يصيب وطلع نصاب،  و زبونه الطماع ما هو بالجنة كان معشمني،

أنا اللي غلطان في حقي، واتعلمت اللي يعمل جميل، ياخد قصاده وقتي، علشان الناس نسايه، بتنسى بس الحلو والجميل،  ابقى لسه مضحي بليل، يصحى يقطع معايا، ويقولي أفتكر كده كفاية، الأذى كده يتبروز،  ويتحط لصاحبه يافطة وعنوان  ونتكلم عليه كتير، نجري وراه بالمشاوير، عشان يرجع ولا بنحرم، والعزا للي معزز،  حبيبه ومديله الحب والأمان  الله يمسيه بالخير، كان طيب وكله خير، يادوب عليه بنترحم، أنا اللي أستاهل كده أتعب، عشان اديتله زي الهبل، من قبل ما حتى يطلب، وده مينفعش ولا صح، تبقى في منتهى النبل، بتدي يبقى تاخد الدبل، بلاش ببلاش تحلب، بير الحنان مسيره يشطب،

وقت كلامنا سوا عن غرامنا،  تسكت تتلغبط و تسرح منا، طب مالك ترد مفيش حاجة، معينة  وهي في العادي لسانها مبرد،  وحالها لا على الحامي ولا بيبرد، ودي حاجة صغيرة يعني مجرد، عينة على اللي بيحب لازم يثبت،  بالكلام بالأعمال بشوق قلبه، بتحبني بجد وفيا متبت، على اللي ادعى يجيب البينة بشوفها بتضحك فرحانة وبتسلم، وليه واحنا سوا قدامي بتبلم، بتتكسفي ولا بتخافي ولا بتتعلمي، في قلبنا 

اشتري مني ده أنا بغني ليكي مش عليكي، بحلم بيكي نهار وليل، وجوة النني مرسومه عينكي، ليا بتميل، بشوف بيها العمر جميل، الوصول  لقلبك كان لقلبي أخر محطة،  مشيت السكة بشوقي خطوة خطوة،  لقيت في نصها يافطة،  مكتوب عليها أسفه للإزعاج الطريق مقفول العيون  مكنش ليا فيها مش بفهمها، وانتي عيونك قافلة قدامي الهامها،  حبيتها وخبطت على بابها، رديتي عليا من وانتي وراها صعب نكون تهون  كل السنين اللي راحت مستنية،  وضعف كل السنين اللي لسه جاية،  لو دقيقة حسيتي فيها بيا، وشوفت حنان بالغلط طلع لحظة جنون

عشت أنادي عليه، وعلى قلبه وعينيه، وفضلت مستني الرد، قال مسمعتش بجد،  سمعني كنت بتقول ايه،  لأ بجد سمعت الرعد، عامل فيها من بنها، وأنا مستنيه العمر كله، اديته مشاعري هانها، اديته عيوني عانها،  جنبه على الأرض، وقلبي خلاص أنهى،  حبي ليه وفي ودنه حد يقوله، سمعت الرعد عامل فيها قال تقيل، والغرام كده مش همه، عملت له الف جميل، طمنته من رعب الليل، قالي مش بتخض، ولا بخاف من القتيل،   لو اتكلم حد يقوله في ودنه، سمعت الرعد 

عايزني لما يعدي أقف انتباه، لما يتكلم اتفق معاه، معملش أي حاجة من وراه،  ولو هتقتل قبلها أقول  يأمر وأرد من غير كلام، واديله كل شويا التمام، ناقص اعمله تعظيم سلام، ده ولا كأني بحب صول لأ ده طالع فيها أوي أوي،  طيب مع الناس وعليا قوي، واقف ضدي يا مشاعري ردي، انفد بجلدي قبل ما قلبي يستوي  يوعدني وأفضل عمري استناه، والوعد أوام ينساه، ويقولي كده فيما معناه، انه كان شويا كلام معسول

عندي كلام ممكن يطول، لازم يتقال وأنا هقول، كفاية سكات وانت بالذات ضروري تقف تسمعه  ما أنا قلبي منك مقفول، الكلام ليك مش لمجهول، يعني تهتم تحاول تفهم وبلاش تجرب تتوقعه تعبت بجد مفيش ود وكل حاجة دايماً على القد، ليه كده رد، وقلبك من ايه معمول  تديني دش وكلام دبش لو كلمتك في مرة بقفش، ما هو كده معلش، طريقتك مش أصول بتتعامل رسمي رفض وقبول، وأنا طفل وانت عني مسؤول، طالب غرام مش حرام تحسس بيه مرة حبيبك  بستناك وانت تملي مشغول،  ومش بتسمع حتى لو فضول، فين حنانك شوقك أمانك تقولي هو كده نصيبك

حاطه على قلبك قفل، والتقل خلى القفل مصدي،  فكري تاني وحاولي، بتيجي تردي بالكلام تصدي، ومعاكي رجعت طفل، عينه عليكي كل ما تعدي، حبيتك ماضي وبحبك راضي وهحبك  لأخر دقيقة ولحظة في الدنيادي  اسمعي مني قبل ما تمانعي وبالطبل  البلدي مش هسيبك تبعدي عني  قافلة الشباك والباب، والهوا من بين كل دول، ازاي عليكي يعدي، لعينيكي يطول رافضه الحلول، وبتسألي ليه غاب، العشق اديني أهو بقول،

هتوحشنى هتوحشني، مفيش احساس بعد منك يعيشني، مفيش كلام هيتقال، احلى من كلامك اللي شغال،  جوايا وعمال يوشوشني، وطريقتك وانت بتنكشني تفرفشني، كله هيوحشني، شمس قلبك الطبيب، ليه تغيب، ليه تسيب، حبيب  زيك ولا نصك واحد في عمره مشافشي  نور ضحكتك يا بدري، انطفى بدري، يا قدري، ندري  كان اديك حنان من قلبي بس ملحقشي هتوحشني هتوحشني، معرفش يومي بعدك ازاي هيمشي، من غير ما أشوفك فيه، واسمي اللي بتبدأ كلامك بيه، وصوتك اللي من غيره مبنامشي، وضحكتي اللي مفارقشي وشي، بسببك هتوحشني،

وقت الفراق أهو جه، وقلبي مكنش عايز ده، لا حلم بيه ولا لحظة اتمناه  حاولت أطول في الوقت، ومع الدنيا اكسب وقت، وهعمل ايه هي دي الحياة العيب مكنش فينا، اللوم على الظروف  والعتاب على الخوف من اللي حوالينا كنا أحلى ما يكون، بنتلاقى بالعيون  عايشين في الكون كأننا كده لوحدينا مش هنسى ومش عايز، ده بكل تأكيد مش جايز، وانسى ازاي قلب طيب  ومش هطلب منك. تفتكرني، وتتعذب وتفضل حاببني، اللي جاي هيفرحك قريب العيب مكنش فينا، اللوم على الظروف  والعتاب على الخوف من اللي حوالينا سلام يا أحلى ملاك، مكنتش قد هواك  ارجع لجنتك هناك وسيب الدموع لينا

نرجع لأ اسمع لو تدفع، الباقي من عمرك،  وتقولي أنا رهن اشارتك وتحت امرك، موضوعنا و رجوعنا مبقاش تاني ينفع، ايوة وحيد ايوة مفيش جديد، بس اوعى وهمك ياخدك لبعيد، وتقول أكيد هيقبل، ويخاف على نفسه يدبل، موضوعنا و رجوعنا باب اتقفل بالتأكيد، أفكر لا بطل بقى وأكبر، اللي فات مات، مجنون اللي يحبس نفسه جوة الذكريات، موضوعنا و رجوعنا مبقاش يستاهل يتقدر،

احتليني وخدي خيري، احكميني ما أنا سايب، ادفع جزية ادفع ضرايب، ادخل جيشك واحارب، ما أنا والله فيكي دايب، ومحدش مسلم غيري، بعملك في قلبي طريق، تمشي فيه وتخطي،  ونحب بعض كده بالمتغطي أنا الحبيب أنا الصديق، ثقتك فيه تحطي، ترسى مراكبك على شطي  سويني على نارك،  كليني بالهنا والشفا،  خليني غطا في الشتا، وهتحسي بأحن دفا، أنا هشتري منك الجفا، وازين بأحساسي دارك، 

انا مفيش فيا أمل ولا هتغير، عايز تحبني كده طب اتفضل، مش قادر تقبلني خلاص اصرف نظر، مش هجبرك ولا أشوفك صغير، معاك الحق ترفض او تكمل، عندي مشاكل صحيح ما أنا بشر، بس دلوقت بلاش تعايرني لو تكرمت، عشان فضلت  كنت واضح معاك ولا عمري كدبت، ولا بالتغيير وعدت وأنا برضه فيا مميزات كتير، وانت عرفتها بنفسك شوفتها، زي الإخلاص وصدق الأحساس و الأهتمام، زي حبك ليك يا حلمي الكبير، و حاجات تانية انت لمستها،  محدش فينا كله عيوب ركز في الكلام،

ياعم بلا هم، ورانا حاجات أهم، زي حياتنا واصحابنا، نعوض اللي فاتنا بمستقبلنا، فوق من الوهم، خلص خلاص الفيلم، مات البطل من الهم، لو فيه جزء تاني اعزمنا، نسيت وقولت تمام الله يوفقك،  مشيت من غير سلام ولا اودعك،  طب ايه اللي رجعك، نسيت وقولنا بعدك عقبالنا ندمت على الفراق بعد ما ضيعك، عرفت وقلبك فاق بكلامك هسمعك،  طب فين اللي يوجعك، قولت كده وقت عتابنا 

يا عديم اي احساس، قلبك ولو من ازاز، كان شاف حبي وخوفي عليه  يا قديم في التفكير، خليت عقلي يطير، قدامك الحب وبتسأل ازاي وليه يا حرام عايش الأيام، غرقان في الأحلام، بتستنى وتتمنى الدنيا تتحول جنة، وكله يبقى تمام  فايتك قلب رايدك، بيحبك وعايز رايك، معقول تقابل بجد أحلى غرام، قلقت وبان في ردك انت ملكش عزاز، ولا بتحب الاستفزاز،  عايز تضايقني وخلاص وتتعبني  ده نظام تطفيش، ولا انت كده مفيش، مش قادر تحب وتعيش في حضني 

أنا كسبان بيكي، ولو قدام عينيكي، خسرت الف جولة، احتاري وهترجعي تختاري،  اللي متجنن عليكي، وهنا بين ايديكي،  هو ده الاولى، ايوة أنا اللي شاري،  و زي ما فيه بنات كتير معقوله،  انتي بنت قلبي وبنت مصر الأولى، وفي اختبار الجمال دايماً طالعة الأولى،  ومين يحبك قدى، خلينا نعمل تحدي، روميو بقلبه وأمره، قيس تعالي نقيس، لو موجودين دلوقتي، مين فينا يعدى،  وتكوني ليه قمره، ويكسب الغالي والنفيس

ليك حقوق وجاي تطلبها،  خليك ذوق عشان أسمعها، بلاش كده لوي الايد والبوز، مش وقت ما تريد وتعوز، هنط لفوق والنجوم أجيبها،  ليك حقوق بالذوق تاخدها، لا لا لا نصيحة طيب بلاش الشغل ده علينا، احنا الرجالة كده بالهداوة تاخدوا عينينا، وقلوب منتهى الغباوة، لو ابتديتوا بالعداوة، وده الكتالوج يا سادة أسمعوا مرة لينا،  لا لا لا يا عسل قلبنا مش هتحس بوجوده، بنقفل برطمان العسل و نفتح المش بدوده، فكروا مرة تغيروا،  أصل بترجعوا تزعلوا،  السيناريو قديم وكل واحد يعرف حدوده،

بهديه ربيع عمري، معاه أنا قسمه، و من ورده ليه قاطف، بهديه وأصبر عليه، مباخدش غير قمصه، و رده عليا عواصف، بحني لرجليه الشوارع، يمشي ولا شايف  بغني ليه ومش شافع، زي الشريك المخالف  تملي بديه دش ساقع، وقلبه حجر ناشف  يهديني شوق بشوك، والسم في العسل، ويحضني بحزام ناسف، يهديني أفوق أروق، وأقول حبيبي وصل، يرجعني للمر أقول أسف، بمد ايدي تملي ليه، قرب لي تعالى يا روحي،  وهو بعيد هناك واقف،  بمد وأسبق عينيه، واخلي جروحه جروحي، وهو البعيد بينسى المواقف،

فوق التلاتين بحبة، والدنيا طلعتني معاش، أيامي لا بتتعاش، أحلامي في الإنعاش، وعينيا مش شايفة القبلة أنا لوحدي إعجاز، شاب عجوز بعكاز،  وعدى العمر معملتش إنجاز، بالمختصر و الايجاز، مليش وجود، الأسم متسجل وصاحبه مش موجود، لا ليا قيمة ولا متعاز، تلاتة فاز،  طاقة جوايا تهد كل السدود،  خليهالك تنفعك في الجناز، أنا تملي بسقط، دايماً محبط، وعلى باب الطموح بخبط، شافني اتلخبط، وبص في الكشف، قالي فين واسطتك يا بأف، قبل ما تيجي لازم تربط، لازم تظبط، مشوفش وشك إلا أخر الصف،  أوعى في دي كمان تتلغبط،

بلاش تحبني كلي، اعشقني نص نص، وأنا قلبي راضي ده كفاية عليه وعليا بلاش بوشي تقولي، احنا معارف وبس، ليه بتلعب بمرادي الكورة رايحة وجاية  وأنا أشتكيك بس لمين، الكل حالته حالة،  ما هو لما نور العين، ياخدنا على خوانه،  ويسيبنا بين البنين، نستحمل كده استحالة، عاش قلبي شاري، شوقه ولا الشمس، وإتك على الصبر قلبي والأمل بيعدد ببلاش بيعي جاري، حبيبي مالوش نفس، وميقدرش يبعد شبر وبرضه متردد

حبيبي بيلعب بيا دور ورق، ويخم كمان من خوفه، وغريبة قلبي ولا اتحمق، لصاحبه وهو عارف ظروفه، وعادي مهما هو فيا سرق، مشاعري تزودله بين كفوفه، معاكي في ايدك الواد والكومي، بتلعبي وتقامري،  بالسالب رميتي وبصرتي، وأنا الواد الدايب من يومي، ويا عيني من صبري، بقى شايب قدامك انتي،  والشايب عقاب مش مكسب، ألعب مهما ألعب، انتي برضه اللي كسبتي، حبيبي بيلعب بأشواقي ويتسلى، بيختبر بهوايا شطارته، وقلبي سايبها ع الله، مفكرش ولا مرة في هيبته، ماشي وراه وعليه بيترمى، ميزعلش لما يشوف خيبته،

كل اللي حبيتهم بعدك، طبق الأصل منك، كانوا شبهك، نفس الطباع و الاندفاع، نفس القلوب والأسلوب،  والهجوم خير وسيلة للدفاع، يعني هي هي كل المزايا والعيوب، اللي كانوا عندك، حبيتك أنا ألف مرة، يختلف الوقت والأسامي  مع ان المشاعر حرة، محبوسه في حبك الغالي كل اللي حبيتهم حكايتهم، تشبه لحكايتنا، بدايتهم ونهايتنا، نفس الرد والرفض، والحيرة ديا بيني والحرية، والخوف من عيون الأرض، ومر البعد وطعم كلمة قرب ليا، والدنيا خلاص خدتنا،

للعشق اصول، اولها لازم يكون موصول،  وتانيها دنيتك أنا اكون فيها كل ناسك وشعبك، الحب مودة، وليه بايدك تقطفي وردة، وتشميها وانتي مش ناوية تحطيها على راسك وشعرك، لو حب العالم والدنيا كلها، جواك ليا وبتخبيه ومشاعرك ولا بينتها، قدام عينيا هنكسب ايه انت وأنا، رد عليا الحب نور، ميقدرش يخفيه ألف سور،  لو كان موجود أكيد هيبان عليكي لحظة تجلي، والود وده، يدي الكون لون وده، والبيبان اللي قفلاها بوشه زمان يهد فيها ما يخلي، 

دق دق، انت نازل في قلبي خبط، وقلبي رق، ماهو مش حمل فك وربط، مالك بقى، طب هو فيه ايه بالظبط،  دق دق، قلبي على حبك اتزق زق، ومعاه حق، ما انت ما يتقالوش لأ، شد وحط، تحت كلمة بحبك ألف خط، بس أوعى كده ترميني بعد ما تشدني،  تسمعني كلام وتشجيني وهوب تصدني، أنا قلبي رهيف مش قد عمايل الحب اللي تخوف، وبغرق من وأنا ع الشط بس أوعى مرة تخلف بعد ما توعدني، بعد كل كلامك أحلف وقولي صدقني، وبلاش تملني استحملني شويا وبجد حبني، هتاخد عندي مية بنط 

خلاص اللي ما بنا ساعات ساعات،  وتزيد المسافات ما بنا مسافات، أكتر من أي وقت فات،  حد في الدنيا وحد مات، وأنا الأكيد التاني ما أنا الجاني،  والسكات عمره ما نجاني من المتاهات، والحيرة والغيرة على قلب تتعمل حلقات،  هنروح وهيفضل معاك جزء من الروح، كل ما تكون فرحان، يختفي يتنسي زمان، كل ما تكون مجروح، يظهر يبان بوضوح خلاص اللي فاضل ساعات وساعات، بتكون الأوقات القليلة بالذات، من أصعب و أوجع الحاجات، عدوا ما بنا سنين واحنا الاتنين، على الثبات ساكتين وأسعد النهايات، زهقت ملت ده الحب عمره ما يبات،

عندي كلمتين، ليه الحديد بيلين، وانت من سنين  هي هي عينيك على نفس الحال، حال استثنائي، لا نار أشواقي، ولا حتى أدائي  في حبي ليك خلوا ما بينا مجال، منبهرتش من كل اللي عملته، أكتر من اللي طلبته،  مقولتش أجرب من باب التجربة،  مفكرتش تقرب حتى لو تسلية، مش بطلب غير أشوف اللي قدمته، ليك انت قدرته، مالك بارد، معرفش إنك زاهد، ولو قلبك جامد تملي على الكل بس اللي حبك غير، قلبي مرسوم، في سما غيوم، وبطريقك كل يوم  انت عليه بتطل بس مفيش تغيير، 

أنا حبيت عشقت و دوبت و هاديت، قلبك حب كل الأحبة واستنيت،  تحبيني ولو حتى بنص المحبة، او ربع شوقي يبان عليكي ياما اتمنيت، ده في كل خطوة، زرعت لك شجرة،  والود فرشته ورد ريحته عطرة،  سكتي مفتوحة وخضرة، جناين تفتح نفسك على المشوار يمشيها قلبك وهو وراضي بالأختيار لا عجب ولا كفى، وحضني ولا دفا، لأ دايماً سابقة خدتي مية لفة، ولقيتك بتغيري الدفة، وأغلى الورود صبحت بعدك صبار من غير ماية ولا حنان عايش ولا إنهار  أنا حبيت واتهجرت و اتقهرت وبقيت، عايش على أمل كداب وياريت، أموت وألقى لنارك أي باب، بيكي و معاكي أنا كده كده انتهيت،

وأشمعنا أنا محبكيش، دي كل حاجة حبتك، صراحتك ودقتك حبتك،  طريقتك في مشيتك، حلاوة عشرتك ودقتك، على البيبان ولمستك، على قلبي اللي مبيغنيش، أشمعنا أنا محبكيش، الدنيا كانت جارحة معاكي وبيكي مسامحة،  خليتيها تلم الجرح يطيب، وتفرق كده اليانصيب  على الغريب والقريب ومفيش مفيش،  كانت بتطرح صبار، دلوقتي ايه الأخبار،  على الجنبين جوزة الطيب،  والحظ الحلو يصيب،  كل اللي ليكي حبيب عمره يعيش، أشمعنا أنا محبكيش، دي الدنيا كلها عشقتك، القمر ينور بضحكتك، والشمس تشرق ناحيتك، خيرك ده من جنتك، يكفي الزمان حنيتك،  يغني روحي وأنا معييش، طب أشمعنا أنا محبكيش،

قاسي جداً، لدرجة تموت،  صعب معاها قلبي يفوت، وصعب برضه عليها أتعود، قاسي جداً، لدرجة تحزن وده منك بقى العادي، تظلم تقسى وتعادي، وعايزني أستحمل طريقتك وعشان بحبك أسامحك خلاص يعني للدرجادي، شايف جرحي عادي، مليش حق أزعل من كل اللي بيحصل ولا أعاتبك حاجة صعبة، وحياة بتتعقد،  زي ما تكون غاوي عليا تنكد، قفلتها بوشي وانت متأكد، أنا مش لعبة، ولا مجرد رغبة 

كنت طول عمري واقف جنبك، يوم بيوم منتهى الرعاية، مية في المية حماية،  وطاقة أهتمام كبيرة جوايا،  طالعة من قلبي ليك ولقلبك، عملت ايه انت ليا أو معايا، وانت شاهد مقصرتش، بس انت قصرت،  واستخسرت، تديني مرة شويا حب ودعم،  ولو كنت قاصد مكنتش، أقل من كده عملت، وكنت سيبت، حاجة كده أفتكرهالك يا عم، كنت فاكر هلاقيك، هنا في ضهري، تسهر سهري، من غير ما أطلب ولا أناديك، كنت فاكر أختارت، اللي بيشتري خاطري، ووقت خطري، لقيتك انت أول واحد بعدت،

وماشية الحياة عادي، ولسه بنفس الرتم  يوم تاخد ويوم تهادي، ويوم تفتري قطم  طبق الأصل من حياتنا سوا فصل فصل  ياما موتنا ضحك، و ياما شبعنا لطم متديش لنفسك أكبر من حجمها،  خسارتك كبيرة تمام، والحلم بيفضل حلم، أه كنت أكتر حاجة أنا بحبها، بس بتعدي الأيام، مع ماتش حلو ولا فيلم، أنا لسه عاقل وهادي، مخدتش يعني سم  اه تعبت وخدني عنادي، وحسيت بحرقة الدم  مكنتش فل حياتي معاك، عادية زي الكل  عشت أيام ف الهم، فا خلينا في المهم

بتشك في هوايا، لا تعالى هنا أفهمك الحكاية،  سطر سطر وكلمة كلمة، كده من البداية، وأفكرك بالسنين وشكل المعاملة،  وكل موقف بنا وجملة، لحد ما تقول كفاية، بتجيلك لحظات شك، وماله معاك حق، مقولتش يعني لأ، براحتك اتأكد  اللي بنا عمر، وياما علينا هيمر، ميضرش في الأمر، بحبك أجدد واخد على خاطري، لسه معرفتش يا قدري، راكب معاك قطري، لأخر محطة مكمل عشان حبنا، مش تعود مننا، ليك في عقلنا، وقلبنا خطة

عندي كلام خليه بيني وبينك، عشان الثقة تقريبا بنا غابت، وقت عتابنا شوفت في عينك، حاجتين بقى مالهمش تالت،  شوفت إحساسك تقيل وثابت،  متهزتش ولا حاجة عليك بانت، معرفش ده كان كله تمثيل، خوفت تبين خوفت تميل، ولا ده كان حقيقي وخلاص راحت، فعلاً أيامي ولقيت البديل، عندي كلام كتير وقولت نصه، رد فعلك خلاني أسكت و أخاف، كنت بقول كلام يمكن تحسه،  كنت واقف قدامك بس شفاف،

أنا خشبة على وش الماية طافية، جاذبة الغرقان صالح و طارح أنا قشاية التعبان، والناس اللي راكبة مركب دافية، بنت ذوات وسط المالح خشبة مش بالحسبان،  مستشفى جرحى بروحي المرحة،  بعمل بهلوان عشان تحس بالأمان، وترجع راضية فرحانة مسامحة،  أنا برواز متعلق بالحيطة في زاوية، بدون ازاز ولا بلاستيك لا أجرح ذكريات سيادتك، تتغير الألوان والإنجاز وذكريات تانية،  تتغير يا مسمار يا سعادتك وأفضل أنا على حيطتك،

كل شيء جوايا بالانتظار بيموت، كان جوايا مدن ولا جنة عدن دلوقتي بقت بور، قلب مهجور من الناس والطيور لا ماية ولا نور، مالوش سعر مبقاش قدام الكون حر ولا ليه صوت،  مولود في الدنيا بلا نصيب ولا قدر،  حتى الحظ مجاش،  لوحدي من غير ضهر وده خطر، بواجه مصير غشاش،  كل طريق قدامي بأصرار مقفول، وأنا اللي ياما فتح شراينه وسمح يعدوا بفرح، يوصلوا بأمان ساعدوني أنا كمان أنا غرقان، ردوا بسرعة الزيت والشمعة خلصوا على طول،

مهما تقاسيني تشقيني، وتشقيني بروحك نصين، تزعليني سنين تصالحيني ثانيتين، طيفك مصاحبني ساحبني، انتي حبيبة العين، انتي الحنين وجوة العين، تهف روايحك تواكب الحالة،  ياسمين و عنبر، وتطوف ألوانك، مراكب رحالة، مع موج البحر، أشوف ملامحك أسامحك وأعبر، بحور الخصام وكأنه ولا السحر، واخدة روحي و تروحي، وجروحي تملى الفراغ، قرش صاغ مع صاحبه داخ، ترجعي ترديها تعالجيها، وأشوف قلبي القديم، صاغ سليم هادي وحليم، 

دنيا ظالمة نورها ضلمة، والواد أبو قلب بريء فتح لقاها،  سكتها متاهة، ملهاش كلمة،  ضاحكة عليه ومفهماه، احلامه اللي جواه،  ليها معنى، وانها جنة،  ويجري من دنيا لدنيا، ونفسه اتقطع، مهما في مسافات قطع، وقابل ناس تانية، لسه في مكانه في حفرة زمانه وقع، الدنيا شقى، وأشمعنا بقى،  تمشي تحت طوع وبمزاج الظالم، وعيون العالم، فيا مبرقة، تتفرج وتسخر مني، وعلى طيبتي تعايرني، وقلبي البندقه، يتهري دقدقة،

أغني ازاي عن الأمل وعن بكرة، وأنا اللي عايش طول عمري نكرة، مجرد رقم في الكون، عندي طموح عايز يكون، مين اللي حابسه وسرق المفتاح والأوكرة،  عملت كل المفروض بسنيني دفعت الأجرة، عندي في قلبي لسه أمل، بس أنا مخبيه، خايف والله أغنيه، ترجع يا صاحبي تقولي، وتعاتبني عليه، بتكدب علينا ليه، خايف عليك كده من التعب والكآبه، احلامنا صادقة وأمينة بس الدنيا كدابة،  وبتغرف من أكبر شوال، للي حاله عال العال،  وانت وأنا مش شايفانا غير ولاد ناس غلابة، هوا في هوا بنخسر سوا ملك وكتابة،

يا عزيزي الدنيا غابة، والغابة ملهاش عزيز، الاسود بس والديابة، واحد CEO والتاني مشارك في التأسيس، كنت فاكر إني الفرس، ليا مكتب طلع قفص، دخلته بعقود كدابة، عقود عمل للنسانيس،  هوووس أشتغل وانت كاتم النفس جرب يا عزيزي تبقى ايزي، الصورة منيلة عارف وهيزي،  أعمل طموحك مسدس خرز، وألعب بيه بدل ما تتفرس، أحلامك مش حبة الكرز،  ولا فيه أصلاً تورتاية يا كريزي، يا عزيزي ملكش غيري، عزيز كله خلص، ازعل اشتكي اتقمص،  في ثانية تترفس، ويتجاب غيرك وغيري، حتى الحمير بتتفرز، عشان تمسك لهم الجرس،  وتبقى واحد من الحرس، بقطاع خاص ميري، مش محتاجين شطارتك عايزين مزز

قلب غير مرغوب فيه، اه يا قلبي  من الدنيا من الناس، أهو قلب وخلاص، مالناش دعوة بيه، ليه نشغل بالنا ليه، قلب غير مرغوب فيه، انت يا قلبي اللي زرعتهم ورد هنا في أرض،  روحي و عمري،  عملت من دمي شربات وماية ورد،  يشربوها وتروي،  حرثت روحي عشان كانت جروحي هتسد،  طريقهم لحلمي، قيدت قمري طول الليالي لعينهم بجد، ويشوفوا أمري،  وفضلت قلب غير مرغوب فيه من حد، ولا قدروا تعبي، أنا المهاجر وسط حيطاني، كل يوم  والضيف وسط مكان مكاني، معلوم  والغريب بين العيون عرفاني، مهموم  أنا اللي الدنيا حطاني، في البحر بعوم  ليه مش بمشي وسط الناس معرفشي  بعوم ليه ولفين وازاي أخد نفسي مغرقشي  مقالتشي ولا مجاوباني، برد مفهوم  قلب غير مرغوب فيه ولو بشكل مجاني،  أو نصره للمظلوم  قلب غير مرغوب فيه، بشكل عام  لا غربان ولا حمام، صانوا عشرة أيام،  الكل شبع من خير بيديه، ولا حد أعترف بيه، خدهم خام، وسابوه لما بقى لهم مقام  كل دول طلعوا على سلمي، وياما دبوا اللي كبر واللي علي علي، بعد ما شبوا في وقتها كان قلبي حلي، وبعدها سبوا اللي ع...

حتى الأحلام الجميلة، اللي بنعيشها كل ليلة، بتضغط الحياة علينا، وتصعبها ليه ما النهار منيل بنيلة، وأنا مش عيل حيلة، بس ما باليد حيلة، وهعمل ايه أنا مش فاشل أنا مش فاشل، اظبط الميزان وهتشوفني واصل،  قاعد معاك راس براس وبفاصل،  وبحقق أحلام في الفواصل، اظبط الميزان  أنا مش فاشل وانتوا يا ناس مالكوا، مش ناقص كلامكوا، بنعرف برضه أخباركوا، حظ لابس بدلة لولا شويا علاقاتكوا، ونواديكوا ومجتمعتكوا، مكنش حد هيعبركوا، ما هو زمن عره 

علشانك أنسى اللي ورايا، واركز بس في اللي معايا، ده انت يتفات لك بلاد، وناس مش حته ميعاد، مين هيكون أغلى منك عندي، ينفع كده تختبر هوايا، انت تفوق تفوق تفوق، غلاوة أغلى من الغاليين، انت تصحى تفوق تفوق،  حلاوة مفيش منها اتنين، انت فوق فوق فوق، نقاوة قلبي قبل العين، أنت المطلوب خالي العيوب، وعلى الفرازة وكلك حنان،  انت كيوت وحبوب وطيوب،  وأخر لذاذة ومعاك فرحان، أنا بدوب بدوب بدوب، وشوقي طازة وحيرة وجنان،

سلام على كل الأحلام اللي نامت في سلام، سابت صاحبها اللي حلمها واللي كان حاببها،  مشكور على المجهود ونيتك الحلوة بانت،  لكن كفاية كده تمام، راحت وقالت سلام وهنتقابل بس لما تنام، لكن في الحياة  مفيش بنا أي كلام  هتلاقيني في الحال، ولا تغميض العيون بقى محال، متحرمين على بعض، لا انت عوام، ولا أنا طوق نجاه، بصاحب بس اللي معاه، حظ او مال، يا جدع عندك حاسه سمع أسمعني ياريت، أنا مهما روحت وجيت مجرد أحلام جواك اتبنيت، لو مفيش حظ واللي يسند قلبك لو وقع، هتلاقيني جنبك صديت، خلصت انتهيت،  بطل عشان عندك أمل لسه وبدون زعل،  عندك ايه بيه تشتري حلم قبل ما تنتهي،  تعيشه حقيقة بلاش تتعذب مفيش عمل، بلاش ارجوك تتقتل، أفتكر الأيام دول،

أنا حلم أحلامي أهو واقف عليه القيمة  هناك بعيد، متونس وملموم على شلة أحلام قديمة وأنا وحيد، أنا اللي خالقه، وهو اللي حاكمني، على سكوتي محاكمني، وصبري مضايقه، هو هناك وأنا هنا، والمسافة مش قريبة، وكتير مشاكل بس أهم مشكلة،  بالتحديد وبدقة، مفيش بنا سكة، وأنا على جبل كبير، أرمي نفسي وأطير، يمكن أوصله وألمسه كده بالكتير، وألمح منه ضحكة، قبل أخر دقة حلم بريء زي المولود لسه بسلوفانته كان واعد، وبخوفي اللي في طروفي أنا خونته  علمته يباعد،  وكل حاجة بتطغطني، ياترى أنا خسرته، ولا اللي خسرته، وبقى يكرهني،

أنا عملت كل حاجة غلط، اديتها حنان اللي عمرها في حياتها ما شافته، حسستها بالأمان اللي ولا مرة هي عرفته، وعشانها كنت ببلع الزلط،  حبيت بجد لا برافوا عليا، اللي يحب بجد الزمن ده كل الناس تشوفه عبيط البنات تصد السالك والسهل، بتحب وتتشد  للي يخليها تخبط دماغها في الحيط  تفكيرهم كده وانتي أكبر مثال لكده بجد ضحيت براحتي علشان ايه، القى سعادتي  طب وده برضه يعني كلام عاقلين  تدي وقتي تاخد مقابل، تقول من طيبتي  يتقالك حلوة بس الحياة مملة حبتين  فين الخصام ورصاص في شكل كلام يقلقوا راحتي 

عدت البدايات والوقت أهو فات، وانتي لسه جميلة بنت ناس أصيلة، جنبي في الأزمات في ضهري كل الأوقات،  آلف كلمة شكر ليكي وفيكي، والله ما تكفيكي، ولا تكفي حتى ربع اللي بتعمليه  بدعي لربنا تملي يديكي ويديكي، وليا يخليكي، وأقدر أسعدك أكتر من اللي بتحلمي بيه بتعدي السنين وأنا وانتي فرحانين، كله بسبب مجهودك، بعمل ايه في وجودك، احنا بحسك عايشين، وأسألي قلبي أحلوينا بمين،

اه كنت زمان أنا كل أحبابه،  وكان هو عندي الحاجة اللي تفرح، ياه دلوقتي واقف على بابه،  وهو لسه بيفكر يقفل ولا يفتح، وازاي يسمح، قساوة الدنيا كلها، عن طريقه تعرفني، وعلى ايده شربتها، ولخاطرك أنا استحملتها  وازاي يمسح، الزمن زمن وعمر، كان بينا عرفني، الا لو اديت أمر، لقلبك وقولت وقته مر أي اتنين ممكن يحصل بينهم زعل، وبتتحل لكن انت رجعت خطوتين لورا،  قادر أفهم لو كانت دي حالة ممل، بس انت اتغيرت وشايفني مش قد المرحلة،

تتحط على الجرح يبرد، وكان مين عمله ده طيب، مين في قلبي نازل يخرط، مش انت برضه ولا بكدب،  وده بوشين، وش حنين طيوب وكيوت، و وش أعوذ بالله جبروت،  يوريك الجنة والنار في مشهد واحد، مش اتنين  ياخد بخاطري بس لمجرد، ميخرجش ابدا بره نصه،  و يشوفني تعبان وشه يورد، بيتحمق بس لللي يخصه،  كل الناس فيه بتشكر، وكان كله كده على يدي،  لحد ما قربت أنا أشكر، ماهو محدش قرب قدي،