أشعار الأراجوز

أنا مش عارفك عشان أفتكرك ولا أنساك، قصة وخلصت وحياتك لا بتيجي في بالي ولا بسهر ليالي بستناك،  قصة وخلصت عقبالك فيه ناس جوه ذكرياتها تتحبس، وتضيع عمرها اللي لسه جي  وتموت قلبها مع إنه حي  وياعيني على عقلها يتلحس، أنا بقى بعيش أصلي مليش في الزعل، ولا بتعلق باللي فات مادام كده عدى بتعب و أهدى مهما حصل، ده الخير في الجايات 

مع القمر ده يحلى السهر، يخطف عيون يدوخ قلوب،  وطار النوم من العيون،  وهو ده يا قلبي المطلوب،  ما القمر الليلادي On Fire وأنا الليلادي علشانك فاضي لك، متفرغ ليك و free بحبك بقولها ياريت الناس، تبلغ و توصل ليه ده إسمك لوحدك والله يتغنى،  دي أحلى أغنية ولا ايه ومن الساعة دي انت حبيبي، وشريك معايا بالنص  أيوة خلاص بقى مسموح، ليك تكتب لي النص  وتسأل عن التفاصيل وأجاوب،  ولا لغيرك أقدر أبص 

أديني بقول وبعيدها كمان واضح الكلام، ومش بخفيه كده تمام  ياريت تشجيع، من الجميع الليلة  كل واحد أعرفه من زمان ولا من أيام، أنا بعفيه من الإهتمام  والاحساس بيا، ولا في أي تفصيله وبلاش تعتبروها مني جميله، ولا منكوا تقصيره، وبلاش تسألوا ليه، خلوا الحياة تبقى جميلة،  سهلة كده وبسيطة، وكفاية اللي بنعدي بيه، أديني بقول أنا مش بستنى ولا مركز، مع حد ولا لحد متحفز عملت ومعملتش ، فاهم محدش بيده حيلة وكفاية يبقى بنا المعروف ويفضل أولوية،  تشوفني تسلم عليا  من غير عتاب، مفيش حساب بين العيلة

دي المظاهر خداعه، صورة أكلة ولا حتى، قعدة رايقة ع البحر ساعة،  في الانستا أو أي حته، قالوا والعه وبكل قناعة، وخد صيت إنك سعيد ممكن تشوفي من بعيد، شجرة خضرة و طارحه جديد ممكن تشوفني كمان، نخلة عالية موجودة من زمان  بس الحقيقة أنا زي، صحرا فاضية وعايش وحيد لو طلعت في الإذاعة، وكنت بتبكي مش هتشكي، هتفضل ترغي حطوا السماعة،  عن فوايد الإيجابية تحكي،  خليكوا زي كده يا جماعة،  وتسجل شريط وتعيد وتزيد أظن يبقى من النطاعه، تحسد واحد ع الضحكة، ده من الحزن عنده مناعة، أبقى أمشي معاه السكة، وشيل شيلته ونفس البضاعة، وأرجعلي ياريت ساعتها بالمفيد

قاصد قاصد كنت قاصد،  وكله كان بالقصد  طب حاسب حاسب  قولي ليه أعاتب، وفي مين أحاسب، يا حبيبي ما انت حاسب  كل فعل وكل رد، ونسيت بالفعل الود، والنسيان كان كان  يا حبيبي عن عمد الدنيا فيها ياما، وخدتتك الدوامة،  ياحبيبي مش دي كانت حجتك، مشيت وكملت في دنيتك، طب ليه عايزني في سكتك، أفضل واقف واقف ياما  مستنيك لحد ما تقوم القيامة، الدنيا دي متاهة، وخداك جواها، يا حبيبي مش دي كان كلامك،  الحياة مظبوطه حلوة أيامك، ولاقي وقت تملي لكل أحبابك، بس وقتي أنا خلص معاها  وانت عايزني أفضل استناها،

حلوة وجميلة  لو تقعد حاطه رجل على رجل،  قصاد القمر مش هستعجب  بحبك ومحتاج عقل فوق العقل، عشان بس يقدر يستوعب  دي كل حاجة بتضحك  في لقاكي كله بيهون، بغمضه عين في لمحة، تاخديني من الحر والزحمة  لقعدة ع البحر رايقة  بشرب مانجا وانتي ليمون، دي كل حاجة بتحبك معاكي حياتي بتتلون، بكلمة منك لو قولتي، في عز الدنيا ما بتشتي، تطلع الشمس دافية  وشم النسيم إزاي هتجنن،

إلى كل أصحاب الكراسي والمناصب، إلى كل صناع المآسي والمصايب، الكون مبقاش مكان، فيه أمان، ولا بقى مناسب، لأي حياة، لنا الله، وليكم نفوذ وجاه،  وحصد المكاسب وتاريخ بالأسود كاتب، دي بقت أحلام، عند العوام، نعيش في سلام، يوم في العام، يمر بدون أحداث، على كل الناس، نحب بعض وخلاص، الورد بدل الرصاص، إلى كل قلب خبيث وطماع، وحاسد خد مكان إبليس وشاع، مفاسد في أرضنا، حل دمنا، وفي حلمنا باع، علشان جاز، وشويا غاز، قام بالحرب أجاز،  وطفل جاع وعالم واحد ضاع،

خلصت كل الفرص، والزمن ضرب الجرس، يفوق القلب اللي اتجاهل،  كل العلامات الحمرا كان شايفها مؤامرة والناس عاملين نمرة مسمعش خلاص يستاهل،  ياريته سمع وخرس  ترجع فين ترجع لمين، كل العناوين  اللي تعرفها من خوفها،  طلبت الحماية من صاحبها،  القلبي المسكين ما انت قلبك شرس  خلصت كل الفرص، والزمن ضرب الجرس، يعلم العاشق ما كان جاهل، وبيبلع لحبيبه الزلط فضل يأوح ف الغلط لحد ما فهم و اتظبط بالجراح مش بالساهل، من الحزن اتلدع واتقرص

قاعد في أوضة ضلمة، قاعد فعلأ مش زي، وكل حاجة حواليا سودة، وأعصابي كلها مشدودة، مش شايف بس خايف، ده الخيال رايح جي،  كنت سامع دبة النملة، والخيال حولها لصورة، أخر ديناصور حي،  في الكوكب معايا ياما، ساعتها بس كنت بتمنى، اتولد بودان مسدوده، ولا حتى مش موجودة، هو كان المفروض أنا كنت أطلع إيه، وكان المكتوب ليا إيه، على الجبين، اللي قراه مين، يقولي ع اللي فيه، هتشوفه ازاي العين، و الأوضه ضلمة فاكرين، لو انت شايف الحقيقة،  طب جرب تغير البصه، وتشوفها من كل الزاويا، طيب ركز معايا، موت الخلق علينا حق،  دي الحقيقة بس القصة،  فيها مشاعر كل دقيقة، هيبقى لحد رحمة، وللتاني عذاب ولا بينسى، الوصف ليه مليون طريقة، والدنيا هي بس الجريئة، معاك نص الحكاية، والنص مش كفاية،

وحيد بعيد  بيقولوا عنيد وكمان مطيع، سعيد كداب  مع نفسي قبل الجميع، مليش في التجمعات،  ولا فتح المواضيع،  بريء وليد والناس أكيد، بتحب اللي يبيع، كلام أحلام،  ولو كان أخرس برضه تمام،  قصاد المايكات هينطق سكات، يقوموا العبيد يقولوا عيد، كلامك والله مفيد منه نستفيد، ويستنوا منه الجديد والتقاليع، مبحبش الوحدة  وبخاف أبقى قطعة، بازل تضيع  مبحبش الوحدة ولا أمشي حتى، ورا القطيع مبحبش القطعه  بس قرب الناس، بيصبني بالترجيع صوت شيخ  وصوت صريخ وصوت خليع،  دي شماريخ  و قايده جوايا نازلين تقطيع، في بعض واتهامات، وضميري عامل مذيع،  فصيح بليغ نازل توبيخ، فيهم بشكل فظيع، وشويا أخبار، لزوم التوليع بين الأفكار،  بيلم مشاهدات يزود إعلانات،  يعمل بالفسيخ حبة صواريخ، حلقة من المريخ مع المسيخ،  من ماية البطيخ عمل مشاريع،

يا نهار ده من كتر الإنتظار، بقى بيتحول لحاجات عجيبة، يا حرام و يادي المصيبة، و يادي الحوار واخده على كرامته و بيحزق، وكل مدى عمال يزرق، بقيت شيفاه بعيني زي أفاتار، أصله مستني أرد عليه، وأنا مش عارفة أرد بأيه، نصبر شويا يا بيه يقولي كفاية هزار مستعجل يا ناس ليه، مكنوش كام سنه عدوا بيه، وعدوا عليا زيه إشمعنا هو بينهار أصله مش فاهم وحاسس، الموضوع صعب خالص، أديني وقتي بقى لحد ما أوصل لقرار

عايشين أنا وهي حياة كلها هنا،  براعي مشاعرها و شايلها في عينيا، ويمكن أكتر من كده وأهي جنبنا، أسألوها هنا لو كنت قصرت شويا، لقيتها بتقولي فجأة وبكل صراحة، معاك بقالي فترة مش مرتاحة، وبجد مبقتش فاكرة اخر مرة، حسيت براحة ولا كنت مبسوطة امتى، أتاريني ظالمها وهي فضلت ساكتة، قولت فاهمها من غير ما أسمع منها، محاولتش أفهم حتى إيه احتياجاتها، وإيه احلامها ده الغلط مني مش غلطها،

كان زمان يا عيال، فيه بجد أبطال، وكان فيه برضه، أبطال من ورق النهاردة بقى يا أسطى، يا بالميديا يا بالواسطة،  و زمن الفيس والانستا، النجم اتخلق يبقى بطل في الحال، رجل أعمال وأسد، لو فسد ولا سرق، لو حسد اللي اترزق بياخد دور البطولة في بوست، يهاجم الهكسوس والإنجليز والفرس، بس يمجد كده في الهولوكوست   خبير مخصوص يديك ألف درس، إزاي تجدد النت بأقل كوست  والاقتصاد مدروس شرح و وعظ،  بالكلام يسدد ديون لو عوزت ميهموش الفلوس لكن يجوز، قبل ما تشوف المحتوى كلنا سوا،  بسرعة الهوا كبست  بياخد دور البطولة في ريل،  يشتم فلان وينهش في العرض،  واحد واحد نازل بالتقيل  يحلف بزمان وبالتاريخ والأرض،  ويتوعد جامد لأوروبا بالويل رصاص مليان جوة الكيبورد، ويفضل قاعد يحاكم الجيل يلعن الأمريكان في كل مكان،  وكل تطبيق ع التليفون وشايل أيفون، وبيلبس شارلستون تفصيل  يطفي النور ويدخل الخون، يلبس الفضيلة ماسك عنده تاسك، ويجيب سيرة مارك على ماسك، وهو بياكل لانشون بليل 

لو كل الناس دي حبوبه،  طب مين أخلاقه معيوبه، بقينا نشوف الحروب لايف، والقنبلة زي ما تكون طوبة، و ده بيضرب صاروخ أرض جو  و ده بيضرب صاروخ بيعلي الجو  والحياة قرف في قرف، والجو ملزق حر ورطوبة،  وفيه اللي بيحبه أوي أو، ناس زي عليه مغصوبه،  الدنيا مقلوبة مقلوبة  أمنية واحدة مطلوبة، عايزكم تحطوني في أنبوبة، وأدخل في غيبوبة غيبوبة، لا حد يزعجني ولا يعكنني، ولا يبهرني بأكذوبة، عايز أدخل في غيبوبة لو كل الناس دي طيوبه، ليه الخيانة بقت مرغوبة،  وروح الإنتقام هي اللي سايده، وبنلعب ببعض زي الكورة، و ده بيضحك ع التاني ويغفله ليه  و ده بيضحك ع التاني وعامله ايفيه والناس قدام الفساد محايده،  ده بيعمل عصير بدودة، وبتشتريه واقف طابور عليه، ويكتب ع الفيس أيام سوده، 

والله بحبك من زمان والله انت الغالي، بحبك بعدد حروف الكلام في الأغاني، مسمعتش  صوت المزيكا عالي  ميضرش  هقولها تاني وتاني  طب غنوهاله يلا لحنوها، بيحبك أوي معايا قولوها، طب أكتبوهاله ولا أرسموها، والرسمة بأسمه لازم تسموها،  والله بحبك أعمل إيه قولي إزاي أثبتها، خد قلبي فتش فيه والنتيجة في بيتها، مصدقتش  هات الناس نشهدها ده محدش  هينكر زيك لما يشوفها 

الإنسان ده مخلوق زي باقي المخاليق، والكون برضه ليهم مش بس لمعاليك، لا على راسنا ريشة عشان ننقل العيشه  على سطح القمر ونعمل السما طريق  طب تعالى نشوفها بشكل تاني، وأفهم المعاني أرجوك  يا تقفل الأغنية وتروح و تنساني، الأمر ليك متروك  نفسك تبقى طير، ولفوق زيه تطير،  وتحس كده بالحرية  انت عندك حق، وأنا برضه يا شق،  معاك مية في المية  طب ليه حابسه، كده في قفص،  بتحميه من المشقة طب بجد حقه، لو سألته هيرد لأ،  ربنا خلق الطيور واداها دور مش علشان تبقى ديكور ولا تحبس العصفور عند جنابك في الفيلا ولا الشقة آه يا ولاد اللذين، خليتوا السمك زينة، والبحر بقى حوض  رايح تتفسح وتعوم، هوبا حصل هجوم، ده قرش ولا حوت  حلق يا عم من هنا، وأهو معاك أنا، يستاهل اتهجم علينا  و زي ما نكون نسينا، البحر ده مش لينا، لا على هواك تتأمر في الأسماك  تعالى هنا روح هناك  مش قاعد عند السماك  تقلي وتشوي وتكتر من الطحينة 

لسه قادرة تبهريني، بردود أفعال بتخليني، أندم إني حبيتك إني اتمنيتك وخليتك في أحلامي تزوريني، ما كنا إنتهينا وخلصنا،  وكل واحد راح وشاف،  حياته الجديدة وسكته  ليه قاصده تحسسنا،  في كل صدفة تجمعنا بوجعنا، وقلبها راسم ضحكته لسه باردة زي ما انتي، و بالبرود ياما قتلتي،  حب كان غالي كان بيحلالي، ليالي بسهولة عليه دوستي،

فيها إيه لو قررنا، نهرب من السجون،  اللي جوانا ونكون  على هوانا وكيفنا نسيب مكان بالكدب مليان، نبقى غيرنا ونختار الزمان، وناخد السجان معانا كمان، ماهو برضه زينا مسجون، كل واحد يختار مصيره،  والحرية تصبح ممنوحه، اللي عايز يبقى لوحة، واللي يبدل روحه مع طيره، واللي صفحته ممسوحه، ميكتبش فيها حد غيره، فيها إيه لو وقفنا، الحروب لمدة يوم،  و نروح في النوم  مطمنين على أروحنا ويلعب العيال عمال على بطال، لا نسمع ضفنا ضريبة ع الخيال، ولا يبقى دجال بابا المجال، ولا نبقى تارجت وقت اللزوم،

ده شاغل بالي، في الوقت الحالي، أيوة خلاني بتلفت حواليا، بعد ما كنت ماشي طوالي،  زاد جناني ومال عليا، الناس بالإحسان اللي ياخدني بلأحضان،  واللي يسقيني الحنان صعب عليهم حالي،  وهو لا يبالي لو على العقل أهو خلاص طار،  مش برج واحد لأ دول كتار، لو على الشكل بين صفار وحمار، من اللي جرالي و انتظاري ليالي  تيجي يا غالي وانت لا تبالي مشغول بيه مجالي، وهو مشغول ما جالي، بقيت خلاص بكمل عشايا،  نوم وأحلام بيك يا غزالي، بتكلم يا ناس كده معايا، على أساس أني هو أنده و أرد من جوة، بقيت لا حول ولا قوة ومع كل اللي جرالي، هو لسه لا يبالي 

قبل ما أجي وأصارحك،  كنت صاحبك كنت في صفك، إنسان مالوش مثال، جدع يتعمله تمثال، ده الكلام اللي فيا اتقال حسب وصفك، ولما اتشجعت وجيت واتكلمت، ساعتها ليه  ردك عليا كان غير ما توقعت،  كان عكس تماما اللي حلمت بيه كأنك اتبدلتي وبقيتي مش انتي، قولتي واتهمتي قلبي بحاجات مش فيه قبل ما أروح و أقولها، كنت عندها السند و في ضهرها، وأقرب واحد ليها، الحماية والأمان حواليها، ده اللي كان في عينيها طول عمرها، ولما اتشجعت وجيت واتكلمت، ساعتها ليه معملتش حساب ولا فكرت،  مش كل واحد بتبان الحقيقة في عينيه

إمتى كبرنا وازاي وفين، مين يرد تعالولي بقى يا سنين، و إن كنتوا أيام اتحاسبوا،  مين بيضرب العمر في اتنين، أبو العشرين حرساه العين، لما بيحلم بينهج  ولو فكر بيعرق و ف الشغل بيغرق، مخدوش في المنهج أبو التلاتين ماشي بفولتارين،  وكام نوع مضاد وكيس مليان علاج ودهان،  وبيتسند ع الولاد أبو العشرين طلعلوا شعرتين، كده ع الجنب بيض  بيسرح فيهم عشان يداريهم،  سلم للزمن تفويض  أبو التلاتين أنجح الناجحين، ماشي جنب الحيط  بيروح شايل ومحمل تقايل،  بطيخة وجبنة وبيض 

سمك لبن تمر هندي، دي حياتي و دي قسمتي، منين يجيب ولا يودي، وإمتى بقيت شبه جدي، وبلعب أدوار مش حتتتي،  فيلم هندي دي قصتي، مكلكعة ومكركبة الدنيا عندي،  أماني توقعني على جدور رقبتي، وحلم مصدي تتخبط فيه رجلي، وحلم جديد معدي عليا بمركبة، جابني كده من فوقي لتحتي وقال السلام عليكم يا أفندي  مش ده عنوان شاب يا ولدي  الظاهر كده غلطت يا كسفتي  كل حاجة بايظه يا دنيا هدي، قالشه ملحتي أكونش جوز أمها،  تملي ضدي تسقيني من سمها،  وعلى دماغي تدي وبقت باظه، أفكاري منها تدوسها برجلها وتضرب عيني باليوستفندي  وترجع تطلب مني ودي  وتقول بهزر يلا فين ضحكتي 

مش أصل وكوبي إحنا الاتنين أصلي، وهي شبهي بالمللي، مش في الشكل لأ في العقل،  وذوقنا في اللبس والأكل، لما نحب نحلي،  والاختيارات والقرارات واحدة تملي، ربنا يزيد ما بنا التفاهم، والإهتمام بالتفاصيل، ونظرة عين ترد فاهم، من غير تطويل، ربنا يحرسنا من العين، ويخلينا لبعض، فينا نواقص بس كاملين، بحبنا لبعض، 

أنا مش قديس ولا برضه شيطان، أنا واحد عادي زي زيك إنسان، مع حد خسيس ومع التاني حسيس،  والتلخيص بالخير والشر قلبي مليان، لا أستاهل الرجم  ولا يتعملي تمثال أوقات بكون هادي وأوقات معادي، بمشي يمين وبروح كتير شمال، وأقلب السهم  يشاور ع الغلط من الناحية دي، وأبقى شهم  وأنصح الناس باللي يصلح و يعدل الحال، أعتبرني زي الجواسيس شغال استاذ في التدليس ومن الأبطال في بلادي،  لا أستاهل أتحب  ولا استحق تكرهني أوقات بكون ملاك وساعات حية، روح للمرايا وقدامها هناك تشوفني،  الحكم صعب مظلوم ولا ميستاهلش بوء ماية، صحيح الكدب  بيعدي ع الناس بس على النفس مش بينجي  على ميزانك قيس وعرفني  في النتيجة إبليس هتطلعني ولا مية مية 

هنفضل سوا يعني هنروح من بعضنا فين، تحتاجني تلاقيني عندك بس في دقيقتين، تكلمني أنزلك هوا دول مش عشرة يومين، ودمتم  ده كان أخر كلام بيه اتكلمتم، وفضلت مستني أنا إتصالكم، وفضلت أسال وكان جوابكم، والله مشغولين وتعدي السنين،  ونتقابل صدفة، محتارين، ده بجد إنتم ولا حد شبهكم وشكرا  حياته من غيري بقت أحسن، وأموره تمام نسيني اصلأ، مع إنه كان بيحبني جدا، ده قال وعود ملهاش حدود،  وبعد ما مشي مبقاش موجود، وسابني هتجنن ده حصل فعلاً

مهما كان حالنا، هتفضل في بالنا،  أحلى ما جالنا، الطيب والقريب  ده مهما روحنا، هتفضل روحنا، ولسه بنقول احنا، وده مش غريب  ده مش وقت حساب،  ولا مين ساب ومين زود في العتاب،  هنفضل اتنين أحباب  والحب مش هيغيب لسه ليك بحن، وانت أكيد أظن، توحشني أرن، زي زمان وأرجع أوام لعقلي، وأفتكر دلوقتي، إنك مش ملكي، زي زمان حبيب 

ده من نظرة أنا قلبي داب، لقتني بغني رومانسي و راب، لو مش هتكون ليا والله والله  لأعمل عن الحب إضراب، لو ليك في القديم، اكتب لك جواب،  وابعته بالبريد كده لحد الباب، واستنى الرد يارب يا كريم،  ده اتأخر بجد وإزاي عني غاب، دي اجازة عيد والواد بتاع البريد، سافر للأحباب ولسه في الصندوق الحديد،  جواه كده مرمي الجواب أجيب رقمك منين، وأبعتلك واتساب، راح تقول ولا أخده من الصحاب، بعتله ومعقول ده معملش سين، يارب خير ومعملتش حساب، يمكن مشغول ولا في مكان مقفول، دي الشبكة عذاب وبتفصل على طول، ولا مش عايز يبين إعجاب 

خليني وحيد، ده أحسن لكتير بدون تحديد،  بلاش تفتح موضوع جديد،  بلاش تقرب خليك بعيد،  أنا وهم مش أكيد  مش عايز فرحة وهمية،  وعلى أحبال دايبة أمشي،  هقع ما بين دقيقة والتانية، هقع فيك وبعديها تمشي، إنساني و روح،  ده أحسن ليك وكفاية وضوح، إنساني نهائي واقفل ع المفتوح، من قلبك لازم أكون ممسوح،  وأوعى بحبي تبوح 

دمر حياتي كمان دمر، لسه فاضل جزء منور،  ده جزاء اللي يسلم، حياته لغيره ويتهور، ده اللي بيحب مش بيبقى ملك حد، يعني شركاء سوا مش ملك وعبد، وانت عديت الحد، بتتحكم فيا وتتأمر  المخلص في بيته طالع عليه متربي،  ايه ذنبي إنك عندك عقدة ومعبي، فضلت عليا تعبي، وفضلت مكاني متسمر 

أنا مش صباره،  عشان على حالها تصبر، وحد بخاطرها يجبر، واللي يوجع واللي يفجر،  أنا حياتي بتدمر، بسببكم يا خسارة  ستوب يا قلبي وكفاية، قولتلك بلاش تجيب لنا كده الكافيه،  انت عليا ولا معايا،  الدنيا مكركبه عليا وانت شايفها صافية، أنا مش طباعة، كلام حلو عايز تسمع، تديني أوردر أطبع، وانت واقف هنا مربع،  خليت حياتي مطمع، لناس كده بياعة

و ده عينه زايغة، ولا بيراعي شعور،  وعيني دايخة، وراه كده زي الدبور،  نفسه في ده من زمان وبيحس مع دي بالأمان  و ده صاحبي و ده غلبان  وأنا في حياته ديكور، بيدور على حبي في ناس تاني، عايز إخلاصي وحاجات تاني، مش مستكفي ولا في ده بيخفي، طماع ومش شبعان من حناني، عايزهم كلهم، وعايزني برضه معاه، إزاي بيحبهم، ويحبني أوي يا الله،  بيتكلم عنهم قدامي كمان  بيتكلم لا مكسوف ولا ندمان طب حد يلحقنى قبل الجنان  ومين يرحمني من المعاناة،

والله قمر بيدور بدر البدور، وطله شمس تملى الدنيا نور، ومين السبب في كل السرور،  اللي في حياتي غيرك،  ده اللي يقول أي كلام غير ده،  يعمل لعينيه ليزك  ويخلي حساب الدكتور عليا أو خد عيوني دول وبص ليا يا تتكلم بالمعقول يا تهدا،  ما هو ده البيزك  الطابق مستور ومش واخد بالي،  يا متغاظ داري غيظك  روح أكشف نفسي من سكات  أيوة أنا مسحور بست البنات  بس انت غيور أوي يا غالي، وزايد معانا تركيزك

دي قصيدة مش جديدة نفس الحروف نفس الكلام  هو هو الخوف هي هي الآلام  اللي كتبتها في مليون قصيدة ايه النتيجة  غير تغيير التواريخ في النتيجة أنا هنا بكتب وأكتب وانتي  هناك بعيدة أيوة انتي يا بعيدة أنا معنديش أوصاف مفيش  فاضي جوايا إحساس غربة زي كده الدوايا من غير لمبة نازلة من سلك على مفيش  بس بتعيش  لحد ما حد يجي ومقولكيش   يركب لمبة فيها فا تنور  من مفيش  بس الكهربا متجيش ايه هقول وليه ولا بتسمعيه ولا عارفه إنك المقصودة  زي اللي لابس نضارة سوده في عز الليل على عينيه عشان تحميه من نور قمره واللي فيه ما أنا بالنسبة لك ليل حالك  لازم تعديه فا تنامي بدري وتنسيه انتي الخضار وانتي العمار وأنا الصحرا ومكان مهجور ولدعة نحلة وقاتل مأجور أنا في نظرك من الأشرار  وكل الأفكار  اللي بتجيلك بجد مش هزار فا كفاية قصايد ومغنى  وكتابة أشعار واسيب وقت للمرار

سرق قلبي مني، وكل حاجة عني،  لما بعتلي لينك بعينيه الزرق  وفضلت عليه أدوس، قام مهكرني  طلع يا ناس فيروس، من المحبة مبتكر  وياريته خد فلوس، وحمد ربنا وشكر أنا العاشق ومش معشوق ولا إسمي اتذكر  وقولت وماله يا واد مرزوق  طلع حبيبي هكر  أتاريني ياما كنت ملزوق  على شباكه استيكر أنا والله خوفت، من تحت لتحت، قاصدني قصد، وجابني أرض  ده واخدني نوت، وبدوسة Shift خلاني آه فيه أموت، وهو قلبه حجر  لا عليا بيفوت، أوام راح هجر  عمل مني حكاية، ولا اتهز له شعرايه، ربالي الخفيف وعمل save وبعدها داس Delete في النهاية، خلاني عند الناس بقيت، ولا لبان دكر  ولما واجهته لقيت، الكل قام نكر 

أنا السبب أنا السبب، أخد القرار من هنا، بعد تفكير سنة، وعينك ما تشوف اللي انكتب،  وما شاء الله عندي قلب وعقل،  واحد قفل والتاني في عجل،  ويارتني كده بتعلم الأدب، في الأرض أدبدب، عايزه عايزه هموت عليه وهو أختيار مهبب، من حمله ماشي مأتب، وخلى وشي يحبب، ومحدش يبص فيه  هعقل وأبقى مرتب، هختار براحة وعلى مهلي المرايا تقولي بتكدب، وهوب ع الزحليقه أركب،  وأرجع أعيط واندب، كل مرة عليا بعلي

يا رزاق الأرزاق، يا عليم يا فتاح، العرض لسه متاح، ولكل الاذواق، ليه تكتم الهم بس ياعم  ما أنا فاتح محل فش الغل،  عندي مآسي تناسب الكل، قرب يا بيه قربي يا آنسه، الدنيا مغلسة قلبي الحل، تعالى خدلك قلمين، وطلع غلب السنين، في قلبي المسكين، ده كل شيء مباح،  من كل شيء داق، ويرجع يقول سماح، أوعى ابدا تهتم أوعى يا نجم  تعالى هتكفي الكمية، جرب قبلك مية، خون وأضرب لكمية، والله هترجع فرحان، بيع فيا وخد ضمان، الجرح فيا بالمجان، أوعى تخلي دم أطلبني بالأسم 

يا حزن بتدور، على قلب منور، ياخدك بالحضن  تعالى هنا عندي أنا  قلبي يساع وليك مطارح  ما اللي جاي واللي رايح، فاكر قلبي ملطشه،  واحد مشاعره منتشه،  من أي حد بالحب سارح، يشتري ويتغفل  يجي كده يبعها للمغفل،  وترجع روحه منعنشة، لا يا واد فالح  ده اللي جاي واللي رايح، فاكر قلبي ملطشه، يا مجروح فاهمك، القلم على خدك،  سايبك ملوح  تعالى قرب مني وجرب  طعم إنك تبات جارح  ما اللي جاي واللي رايح، فاكر قلبي ملطشه، واحدة عاملة مفتشة،  وهي سلك عقلها سايح، كل مرة تلبس  تيجي لأبو قلب ملبس من الفجر لحد العشا، تدي له في نصايح

مهما يفصل بنا بلاد، وتترسم ما بنا حدود، كلنا لأدم بنعود، كلنا من نفس الأجداد،  ومهما أتغير الزمان والمكان، و بنينا سدود،  هنرجع ونعود لبعض  دي الأرض حياة لكل الولاد  وهيفضل الإنسان إنسان، مهما كانت الألوان، قبل وبعد الأديان،  زي الشمس في كل زمان،  اليوم والأمس وبكرة كمان،  معروف منين بتبان مهما كترت كده اللغات، هنفضل برضه نفهم، بنفس الحلم نحلم، يتشال ما بنا المسافات، مين أختار أسمر وأبيض، وبأيه نتكلم، بطل تعلم ع الناس  دي الناس حياة مش تصنيفات 

حبي ليكي واصل للشمس، وحبك ليا على قد الهمس، حبيتك وقولت في العلن،  حبيتي وخبيتي على الزمن، و وحدي لوحدي بدفع التمن،  وانا في حبك مرمي بالحبس،  أنا فين وانتي فين،  فرق السما من الأرض، والصبار عن الورد أنا من العشاق اللي بالملايين، ملهمش حد، وانتي من القاسيين اللي على صوابع اليد،  الواحدة بتتعد،  شوقي ليكي بعدد البشر،  شوقك ليا ولا مرة اتنشر، حبيتك ونزلتها في الأخبار، حبيتي وخبيتي عن الأسرار، وحدي لوحدي خدت القرار، أتاريني أعمى البصيرة والنظر،